2 Korintu 7 - Mukanda Wa Zambi 1970

¹ Akwetu, akwa Kristu, Zambi hanatulakenya yize yeswe. Kashika, chatutamba kulibemesa ku yeswe yize yakubihisa mujimba ni mwono. Tulikolezenu hanga tubwe akwa kulinanga, ni kuvwila Zambi woma.

Uwahililo wa Paulu

² Twazulwilenu mbunge jenu. Kutwalingile chibi kuli yenu, kutwabihishile niumwe, kutwongele mutu niumwe.

³ Chambile chino ha kunuhisa. Mumu ngwe hingunachambe kulu ngwami, twakunuzanga kuhiana, kashika tuli hamwe ni yenu matangwa eswe, chibwe mu mwono chibwe mu kufwa.

⁴ Ngunanufuliela kuhiana, nakulisamba hakutwala kuli yenu. Mu lamba lietu heswe ngunatakama, ngunawahilila kuhiana.

⁵ Chibwe muze twahetele mu chifuchi cha Masedonia, kutwabwile ko ni uhwimino. Twamwene lamba lieka ni lieka, twahamikine ni atu, twevwile woma mu mbunge.

⁶ Hindu Zambi, yoze wakutakamisa akwa mulekeleke, yatutakamisa mu kuheta cha Titu.

⁷ Kutwatakamine mumu ha kuheta chenyi wika, alioze nawa mumu te hatulweza chize yenu nwamutakamishine. Yatulweza ngwenyi, nunevu usona ha kungumona; nawa ngwenyi, nuli ni chinyengo ni nwakungusambisa ku meso ja waze anangulelesa. Kashika ngunawahilila kuhiana haliabwila.

⁸ Mumu, chibwe mukanda uze nanutuminyine unakanuvwisa chinyengo, yami Chishi ni chinyengo ha chize nausonekene. Te ngunakahasa kwivwa chinyengo muze ngunakanyingika ngwami, hinanuvwisa chinyengo.

⁹ Alioze haliabwila ngunawahisa. Chishi kuwahilila mumu nanuvwishile chinyengo, alioze mumu chinyengo chize chalumwine mbunge jenu. Kutwanulingile chibi nichimwe, mumu chinyengo chenu chabwile cha uzambi.

¹⁰ Mumu chinyengo cha uzambi chakwalumuna mbunge ya mutu, chakumulamwina. Kashika kuchatambile kulinyenga ha chiyo. Alioze chinyengo cha hano hashi chakukoka kufwa.

¹¹ Talenu chize Zambi hanalingi ni chinyengo chize cha yenu. Hichanwaha manyonga abema mu kutwama kanawa ni kusoloka ngwenu, kunushi uhiso, nwakuvutwokela yibi, nwakwivwa woma, nwakunguvwila usona, nwakulihana ku milimo, nwakubwa ni hamu kubatwila waze akulinga yibi. Mu yikuma yino yeswe nunasoloka ngwe kunushi ni yitela.

¹² Chibwe nanusonekenene mukanda uze, chachilingile mumu hali yoze halinga chibi, chibwe hali yoze hamulinga chibi. Alioze nausonekene mu kushindakenya ku meso ja Zambi ha chize nwakutuzanga.

¹³ Kashika twatakamine. Kutwatakamine chamokomoko, alioze twawahilile muze twevwile uwahililo wa Titu ha chize nwamutakamishine.

¹⁴ Nanuchichimiekene ku meso jenyi, ni kunwangukolesele sonyi. Tangwa heswe twakunwambulwila umwenemwene. Chimuwika nawa, ngwe chize twanuchichimiekene ku meso ja Titu, chinakasoloka chamwenemwene.

¹⁵ Kashika kakunuzanga kuhiana, muze akwiwuluka chize yenu eswe nwamwononokene, ni chize nwamutambwile ni woma ni kuchikima.

¹⁶ Ngunawahilila kuhiana mumu ngunahase kunufuliela ha yuma yeswe.