2 Korintu 6 - Mukanda Wa Zambi 1970

¹ Kashika yetu, waze twakulinga hamwe ni Zambi, tunaliumbu kuli yenu ngwetu, kanda nulelesa utu uze Zambi hananulweze.

² Mumu Zambi hanambe ngwenyi: “Ha ola ya utu wami nakubanjikile. Ha tangwa lia ulamwino nakukwashile.” Tala, yino ye ola ya utu wa Zambi; musono lie tangwa lia ulamwino!

³ Kutwazangile niumwe kutumona ubi mu milimo yetu. Kashika hi chibema ko kutalingisa mutu niumwe chibwe iya.

⁴ Alioze ha yuma yeswe yize twakulinga, twakusoloka ngwetu, tuli tuvumbi twa Zambi. Twakulihumikiza ni uhomboloji mu lamba, ni mu luyinda, ni mu yinyengo.

⁵ Haanatulambe, haanatuse mu zuwo lia lamba, haanatubinjisa. Hitunalingi milimo ya lamba kuhiana. Yisuho yinji kutushi kuhasa kulia hanji kuya tulo.

^6-7 Twakulweza ngwetu, tuli tuvumbi twa Zambi: mumu ha mbunge jetu jibema, ni ha chinyingi chetu, ni ha uhumikizo wetu, ni ha utu wetu, ni ha mana aze Mwiku wa Linanga akuhana, ni ha zango lize kulishi ulembekese, ni ha longeso lietu liamwenemwene, ni ha tachi ja Zambi mu mwono wetu. Ululi wetu uli ngwe mukwale wa jita ni wa kukinda jita.

⁸ Kaakutulemesa ni kutuvwisa sonyi. Kaakutushililika ni kutuchichimieka. Kaakutumona ngwe tuli akwa mahuza, alioze twakuhanjika umwenemwene;

⁹ ngwe kaatunyingikine, hindu eswe kaanatunyingika; ngwe tuli afu, hindu tuli ni mwono. Kaakutumwesa lamba, hindu kutushi kufwa.

¹⁰ Kaakutuvwisa chinyengo, hindu twakuwahilila matangwa eswe. Tuli yiswale, hindu twakubichisa anji. Tuli ngwe kutushi nichimwe, hindu twakubita yuma yeswe.

¹¹ Akwetu mu Korintu, hitunanwambulwila umwenemwene, hitunanwazulwila mbunge jetu.

¹² Kutwanuswekelele manyonga jetu, alioze yenu hinunatuswekela manyonga jenu.

¹³ Haliabwila ngunanusonekena ngwe nuli ana jami. Lingenu kuli yetu ngwe chize twakulinga kuli yenu. Azululenu mbunge jenu.

Kutoweza kanda nulinunga ni waze keshi kufuliela

¹⁴ Kanda nulilema kanga yimuwika ni waze keeshi kufuliela, mumu ndako ngwe yize kuyishi kulita. Ngwe kuchi ululi muulichinga ni ubi? Ngwe kuchi Pangu mulihasa kubwa hamuwika ni milima?

¹⁵ Kulivwa chika chili mukachi ka Kristu ni Sakwonga? Hanji ngwe kuchi mukwa kufuliela mahasa kuliendela ni yoze keshi kufuliela?

¹⁶ Ngwe kuchi zuwo lia Zambi mulihasa kulivwa ni mahamba? Mumu yetu tuli zuwo lia Zambi ya mwono, ngwe chize Zambi iye mwene hanambe ngwenyi: “Mungukatwama mukachi ko, mungukaliendela no. Mungukabwa Zambi yo, no maakabwa atu jami.”

¹⁷ Kashika Mwene Zambi kanambe ngwenyi: “Chanutamba kutuhuka mukachi ko, chanutamba kulihandununa no. Kanda nukwata ku Chuma chimwe cha luchisa, mba mungukanutambula.

¹⁸ Mungukabwa tatenu, mba ni yenu munukabwa ana jami a malunga ni ana jami a mapwo, Chenacho anambe Mwene Mukwa Ndundo Jeswe.”