2 Korintu 5 - Mukanda Wa Zambi 1970

¹ Mumu tunanyingika ngwetu, mujimba wetu wa hano hashi uli ngwe zuwo liakutunga ni makubu. Nyi liafwa, Zambi makatwaha zuwo mwilu, lize kaatungile ko kuli atu. Zuwo lize mulikalinduluka ku miaka yeswe.

² Haliabwila twakutwa mikuma, mumu twakwivwa usona kuhiana ha kuheta mu zuwo lietu mwilu.

³ Mumu, muze mutukanjila mo, kutuchi kabwa uselesele.

⁴ Shimbu twakutwama mu zuwo lino liakutunga ni makubu, twakutwa mikuma ya yilemu yize tuli nayo. Kutushi kuzanga kuzula mujimba uno wa hashi, alioze twakuzanga kuzala mujimba ukwo wa mwilu, hanga mwono umine mujimba uze wa kufwa.

⁵ Zambi hanatululikila tukabwe ni mwono uze. Iye nawa watuhele Mwiku wenyi ngwe chinyingi cha yuma yize makatwaha.

⁶ Kashika twakutakama kuhiana matangwa eswe. Tunanyingika ngwetu, shimbu heswe lize twakutwama mu mujimba uno ngwe mu zuwo lietu, zuwo ha Mwene Yesu lili kusuku ni yetu,

⁷ Mumu mwono wetu hi Wakumona ni meso ko, alioze wa ku ufulielo.

⁸ Twakutakama kuhiana, twakuzanga kutuhuka mu zuwo lino, mujimba wetu, hanga tubwe ku mahietu hamwe ni Mwene Yesu.

⁹ Alioze kuhiana yuma yeswe, twakuzanga kubemena ku meso jenyi, chibwe ku mahietu tuli hano hashi, chibwe ku mahietu mwilu.

¹⁰ Mumu yetu eswe chatutamba kumana kulutwe ha chitwamo cha ubatwilo cha Kristu, hanga mutu mweswe akatambule chize chinamutela, nikulita ni chize alingile mu uutu wenyi, chibwe chibema chibwe chibi.

Uwanyino ni Zambi mumu hali Kristu

¹¹ Tunanyingika chize chatutamba kwivwila Mwene Zambi woma. Kashika tuneseka kulongesa atu. Zambi kanatunyingika kanawa, ni ngunafuliela ngwami, mu mbunge jenu nunangunyingika nawa.

¹² Kutushi kulichichimieka ku meso jenu nawa, alioze tunazange nuwahilile ni yetu hanga nukabwe ni chize cha kukumbulula kuli waze akulisamba ku meso, hi ku mbunge ko.

¹³ Nyi chamwenemwene tunazaluka, tunazaluka mumu hali Zambi. Nyi tuli ni manyonga abema, tuli no mumu hali yenu.

¹⁴ Mumu zango ha Kristu kuliakutuyula, yetu waze tunanyingika ngwetu, umuwika wafwile mumu hali atu eswe. Chinalumbunuka ngwo, eswe afwile hamwe nenyi.

¹⁵ Kristu hanafwila atu eswe, hanga waze ali ni mwono kaahashile kuliwahisa ayo ene, alioze kuwahisa Kristu yoze wafwile, yoze wahindukile ku kufwa mumu hali ayo.

¹⁶ Chize ku tangwa lino kutwahashile kwalula mutu niumwe nikulita ni ndako ya uutu. Chibwe hatangu twalwile Kristu nikulita ni ndako ya uutu, alioze haliabwila kutwamwalwile nawa ngwe chize.

¹⁷ Nyi mutu halinunga ni Kristu, kachi halumuka mutu mwaha, yuma yikulu hiyahwa, yuma yaha hiyasoloka.

¹⁸ Yize yeswe yakukatuka kuli Zambi. Hatangu twabwile akwa kole ni Zambi, alioze, mumu hali Kristu, Zambi hanatuwanyisa ni iye mwene. Ni Zambi hanatwehe milimo ya kukoka atu akwo akawane nenyi.

¹⁹ Kafwa Zambi wabwile muli Kristu ni kuwanyisa akwa hashi ni iye mwene. Kalwile ko yibi yize alingile, ni hanatwehe yilemu ya kwambujola chize Zambi akuwanyisa akwa hashi ni iye mwene.

²⁰ Kashika, tunanwambe mu jina lia Kristu ngwetu, Zambi iye mwene hanatutumu ni kunulongesa. Mu jina lia Kristu tunaliumbu kuli yenu ngwetu, wanenu ni Zambi.

²¹ Kristu kabwile ko ni shili, alioze Zambi yamwaha yilemu ya shili yetu, hanga Zambi atupwise akwa ululi ha kulinunga ni Kristu.