2 Korintu 4 - Mukanda Wa Zambi 1970

Ubite wa yikuma ya Zambi mu yikashi ya uma

¹ Zambi hanatwehe milimo yino mumu ha keke yenyi. Kashika kutwahashile kukokoloka.

² Hitunehuka yuma yeswe ya kuhengeka ni ya sonyi. Kutushi kwonga atu, kutushi kwalumuna maliji a Zambi. Yuma yize twakulinga kutushi kuyisweka, mumu yili yamwenemwene. Twakuyilinga ku meso ja atu eswe ni ku meso ja Zambi, hanga mutu mweswe ayifuliele mu mbunge yenyi.

³ Nyi Sango Jibema, jize twakwambujola jinafukiwa, jinafukiwa kuli waze anatoko.

⁴ Keeshi kufuliela mumu Zambi ya mwakono hanaapupuchisa manyonga jo. Kakwakinda ha kumona Pangu lia Sango Jibema. Jili sango ja uhenya wa Kristu yoze unalifu pundu ni Zambi.

⁵ Mumu kutushi kwambujolela atu sango ja yetwene, alioze sango ja Yesu Kristu mwe Mwene, ni yetu tuvumbi twenu mumu hali Yesu.

⁶ Zambi yoze wambile ngwenyi: “Pangu lipanguke mu milima,” mwenawo hanapanguka mu mbunge jetu hanga jitemuke, hanga jitusongwele mana a kunyingika uhenya wa Zambi, uhenya uze wakusoloka ku meso ja Kristu.

⁷ Alioze yetu, tuli ni ubite wa yikumba ya Zambi; tuli ngwe yikashi yilelu ya uma, ha kulweza atu ngwetu, ndundo jili ja Zambi hi ja yetu ko.

⁸ Kaakutumwesa lamba lieka ni lieka, hindu kutushi kuhonga. Twakuyambashana, hindu kutushi kulekumuka.

⁹ Kaakutuhungumiona, hindu Zambi keshi kutwehuka. Kaakutushinda hashi, hindu kutushi kufwa.

¹⁰ Matangwa eswe twakumbata kufwa cha Yesu mu mijimba yetu, hanga mwono wa Yesu nawa usoloke mu mijimba yetu.

¹¹ Matangwa eswe mu mwono wetu tuli mu utoji wa kufwa mumu hali Yesu, hanga mwono wenyi nawa usoloke mu mijimba yetu yize muyikafwa.

¹² Kulumbunuka ngwo, kufwa kuchakulinga milimo muli yetu, alioze mwono kuwakulinga milimo muli yenu.

¹³ Mukanda wa Zambi unambe ngwo: “Nafulielele, kashika nahanjikile.” Chimuwika ni yetu nawa, twafulielele, kashika twakuhanjika, mumu ufulielo wetu wakukatuka kuli Mwiku wa Zambi.

¹⁴ Mumu tunanyingika ngwetu, Zambi yoze wahindwishile Mwene Yesu ku kufwa, makatuhindwisa nawa hamwe ni Yesu, ni kutuhetesa yenu ni yetu ku meso jenyi.

¹⁵ Yino yeswe yili ha kunuwahisa. Chenacho Zambi akulweza atu anji utu wenyi. Atu waze nawa kaakufumanyisa uhenya wa Zambi.

Ku mahietu mwilu

¹⁶ Kashika kutushi kukokoloka. Chibwe mijimba yetu yinafu, hindu Zambi kakupwisa mwiku wetu Waha tangwa ha tangwa.

¹⁷ Lamba lize twakumona haliabwila lili likepe, kulishi kunyongona Chipinji chisuku. Alioze kuliakutulingila uhenya unji, uhenya wa miaka yeswe, uhenya uze unahiana lamba lietu.

¹⁸ Mumu kutushi kunyonga yize twakumona, alioze yize kuyishi kumoneka. Yize yakumoneka yakutwama ha shimbu likepe, alioze yize kuyishi kumoneka kuyakutwama ku miaka yeswe.