2 Korintu 3 - Mukanda Wa Zambi 1970

Tuvumbi twa Usendo Waha

¹ Maliji wano kaanalumbunuka ngwo, tunabutula kulisamba nawa, nyi? Hanji tuli nawa ni chikala, ngwe amwe akwo mu kunulweza mikanda ya shindakenyo ya milimo yetu, nyi?

² Ka, yenwene nuli mukanda wetu uze Kristu asonekene mu mbunge jetu, ni atu eswe maahasa kuunyingika ni kuutanga.

³ Chinasoloka pundu ngwo, Kristu iye mwene hanasoneka mukanda uze. Hanaukunjika ku moko jetu. Kausonekene ko ni ulombo alioze ni Mwiku wa Zambi ya mwono. Kausonekene ko ha liwe, alioze mu mbunge ja atu.

⁴ Maliji wano tunahanjika mumu tunafuliela Zambi ku tachi ja Kristu.

⁵ Mumu kutwahashile kwamba ngwetu, tunahase kulinga milimo yino ku tachi ja yetwene, alioze ku tachi ja Zambi.

⁶ Iye watuhele tachi ja kulinga milimo ya mu Usendo Waha. Usendo uze Waha hi wa ku Shimbi jize hijinasonewa ko, alioze wa Mwiku wa Linanga. Mumu Shimbi jize hijinasonewa kujakushiha, alioze Mwiku wa Linanga wakuhana mwono.

⁷ Shimbi hijinasonewa ha mawe, ni uhenya wa Zambi yiusoloka muze ajihanyine. Mumu ha uhenya wa ku meso ja Mose, Aisraele kaahashile ko kumuhulikila meso, chibwe uhenya uze wajimukine. Nyi Shimbi jize jakokele kufwa yijisolola ni uhenya ubwa haha,

⁸ uvumbiko wa Mwiku wa Linanga kuushi ni uhenya Wahiana, nyi?

⁹ Mumu, nyi uvumbiko uze wahishile atu wabwile ni uhenya, shinoho uhenya wa uvumbiko uze wakupwisa atu akwa ululi unahiana chikolo!

¹⁰ Tunahase kwamba ngwetu, uhenya wa mwakono unahiana uhenya uze utangu. Kashika uhenya uze utangu hiwabalika.

¹¹ Mumu, nyi uvumbiko uze kuushi kulinduluka wabwile ni uhenya, uvumbiko uze wakulinduluka ku miaka yeswe uli ni uhenya Wahiana!

¹² Tuli ni hamu kuhiana mumu twakusa mbunge ha chino.

¹³ Kutushi ngwe Mose, yoze wafukile Wanda ku meso jenyi, hanga Aisraele keechi kumona kujimuka cha uhenya wa ku meso jenyi.

¹⁴ Te keeshi kunyingika. Chibwe ndoo musonso uno keeshi kwivwa mwazu Mikanda ya Usendo Ukulu. Mumu Wanda uze uchili ha meso jo. Muuhasa kutanduluka shina muze mutu halinunga ni Kristu.

¹⁵ Chibwe ndoo musono uno, muze akutanga mikanda ya Mose, keeshi kunyingika, mumu Wanda uze uchili ha meso jo.

¹⁶ Alioze, “muze mutu akutewulukila kuli Mwene,” Wanda wakutanduluka, ngwe chize unambe Mukanda wa Zambi.

¹⁷ Mumu “Mwene” kali Mwiku, ni kweswako kuli Mwiku wa Mwene, atu waze aliko kaali akwa kutusuka.

¹⁸ Yetu eswe kutushi Wanda ha meso; uhenya wa Mwene unasoloka muli yetu. Uhenya uze wakukatuka kuli Mwene yoze kali Mwiku. Kakutupwisa ngwe iye mwene. Chenacho twakubwa ni uhenya uze unalise tangwa ha tangwa.