2 Korintu 2 - Mukanda Wa Zambi 1970

¹ Chenacho nabatwile ngwami, chichi kunuheta ni kunuvwisa chinyengo.

² Mumu, nyi mungunuvwisa chinyengo, aya maanguwahisa? Shina yenu nahele chinyengo!

³ Kashika nanusonekenene mukanda uze. Te Chazangile kunuheta mba ngunuvwise chinyengo mumu chanutamba kunguwahisa. Mumu hingunakunuka ngwami, muze ngunawahilila, ni yenu nawa nunawahilila.

⁴ Nanusonekenene mukanda uze ni chinyengo chinji ni kubihilila, ni masoji anji, hi kunuvwisa chinyengo ko, alioze hanga nunyingike chize nakunuzanga.

Konekenenu Chivulumunyi

⁵ Nyi umwe hanevwisa mukwo chinyengo, chinyengo chize kanguvwishile cho yami, alioze yenu, hanji amwe hakachi kenu. (Chazangile kunuvwisa chinyengo kuhiana.)

⁶ Lamba lize atu anji haananwehe linazuku.

⁷ Alioze haliabwila mukonekenenu, mutakamisenu. Nyi ka, mevwa chinyengo chahiana mba mehuka ufulielo wenyi.

⁸ Kashika, ngunanwambe ngwami, muzangenu.

⁹ Mumu muze nanusonekenene mukanda uze, nazangile kunweseka mu kumona nyi munwononokena maliji jami eswe, nyi ka.

¹⁰ Mweswe mutu munukonekena, ni yami nawa mungumukonekena. Nyi hingunakonekena umwe mutu, nachilingile mumu hali yenu, ku meso ja Kristu,

¹¹ hanga Sakwonga kechi katwonga. Mumu tunanyingika mana jenyi.

Chinyengo cha Paulu ku Troa

¹² Muze nahetele ku limbo lia Troa, mu kulongesa Sango Jibema ja Kristu, nawanyine ngwami, Mwene Yesu hanangwehe jila ya kulongesa atu.

¹³ Alioze nulibikalile kuhiana muze Chamwene mukwetu Titu. Kashika nashikile akwa Troa, yinguya ku chifuchi cha Masedonia.

Kukumba ku tachi ja Kristu

¹⁴ Alioze tunasakwila Zambi! Mumu mu kulinunga ni Kristu, Zambi kakututwala matangwa eswe ngwe funge waze akwachile mu jita, ni kutumbata ha mukana ni kunyingikisa atu eswe ngwo, Yesu hakumba. Zambi kakulinga ni yetu ngwe maji a vumba libema waze akukupuka vumba lio ku kanda jeswe, hanga twambujole sango ja Kristu kuli atu eswe.

¹⁵ Mumu tuli ngwe maji a vumba libema waze Kristu akulambula kuli Zambi. Vumba lize kuliakuya kuli waze Zambi analamwina ni kuli waze anatoko.

¹⁶ Kuli akwa kutoka kulili vumba lia kufwa lize liakwashiha. Kuli waze Zambi analamwina kulili vumba lize hakwaha mwono. Iya mahasa kumanununa milimo ngwe yino?

¹⁷ Kutushi ngwe atu akwo, waze akuwezela yuma yikwo ku maliji a Zambi. Alioze twakuhanjika umwenemwene weswe ku meso ja Zambi mumu tuli a Kristu, mumu Zambi iye mwene hanatutumu.