2 Korintu 13 - Mukanda Wa Zambi 1970

Kushika ni kumeneka

¹ Chino chisuho cha muchitatu mungukanuheta. Mukanda wa Zambi unambe ngwo: “Yela aali hanji atatu chaatamba kushindakenya chikuma cheswe chize maasumana.”

² Nguli ni chikuma chimuwika cha kwamba kuli waze haanavulumuna kulu ni kuli atu akwo. Hinachamba kulu muze nanuhetele chisuho cha muchaali, alioze munguchamba nawa haliabwila muze nguli kusuku. Chisuho chize mungukanuheta chichi kevwila niumwe keke.

³ Nunazange ngunulweze chinyingi chize chinalweze ngwo, Kristu kanahanjika ni kanwa liami. Ewa munuchimona. Kristu hi kali mulelu ko hakutwala kuli yenu, alioze kakulweza ndundo jenyi hakachi kenu.

⁴ Chibwe amuhachile ha kulusu mu ulelu wa mujimba wenyi, hindu kali ni mwono ku ndundo ja Zambi. Mu kulinunga nenyi, chibwe yetu nawa tuli alelu, hindu mu kuliendela chetu ni yenu, tuli ni mwono hamwe nenyi ku ndundo ja Zambi.

⁵ Liesekenu yenwene, ni Chitalenu yenwene, nyi nuli akwa kufuliela nyi ka. Nunanyingika kanawa ngwenu, Kristu Yesu kali muli yenu, nyi? Nyi ka, nyingikenu ngwenu, nuli yisashili.

⁶ Ngunafuliela ngwami, yenwene munutayiza ngwenu, hi tuli yisashili ko.

⁷ Tunaliumbu kuli Zambi kuchina munulinga yibi. Chenacho twakulemba Zambi hi nikulweza ko ngwetu, tunahase kulongesa kanawa, alioze hanga nulinge ni ululi, chibwe yetu tunasoloka ngwe tuli yisashili.

⁸ Mumu kutwahashile kulimika ni umwenemwene wa Zambi, alioze shina kulinga nikulita ni umwenemwene.

⁹ Tunawahilila muze yetu tunalele ni yenu nunatakama. Kashika twakuliumba kuli Zambi mu kulemba chetu hanga nubwe angunu.

¹⁰ Ngunanusonekena chino shimbu nguli kuno kusuku, hanga muze mungukanuheta chichi kahanjika ni yenu maliji akalu ni chiyulo chize anguhele Mwene Yesu—chiyulo cha kunutakamisa mu ufulielo, hi cha kunulekumana ko.

¹¹ Hakusula akwetu, Salenu kanawa! Hilukenu nawa mu majila abema. Banjikenu ku kukanyamisa chami. Livwenu. Bwenu ni sambukila hakachi kenu. Mba Zambi ya zango ni ya uhwimino makabwa hamwe ni yenu.

¹² Limenekenu ni mbeji ya kulinanga. Akwa Kristu eswe kaananumeneka.

¹³ Mwene Yesu Kristu anulweze utu, Zambi anuvwile keke, Mwiku wa Linanga uliendele hamwe ni yenu eswe.