2 Korintu 12 - Mukanda Wa Zambi 1970

Yuma yize Mwene Yesu alwezele Paulu

¹ Changutamba kulisamba, chibwe kulisamba kuchishi kukwasa nichimwe. Alioze ngunazange kuhanjika haliabwila hakutwala ku Usolwelo ni yinyingi yize Mwene Yesu anguhele.

² Ngunanyingika mukwa Kristu umuwika, yoze Zambi azezwishile ndoo mu lilu lia muchitatu. Miaka kumi ni yiwana hiyabalika kulu. (Chanyingikine nyi chamwenemwene Zambi mwilu amuzezwishile, hanji yabwile chilota Zambi wika Unanyingika.)

³ Ewa, ngunanyingika ngwami, mutu yoze Zambi mwilu amuzezwishile ndoo ku limbo lia Zambi (Chanyingikine nyi Zambi mwilu amuzezwishile, hanji chabwile chilota Zambi wika Unanyingika.)

⁴ Kwenako yevwa ko maliji waze mutu kahashile kuhanjika hanji kwalumbununa.

⁵ Ngunalisambe hakutwala kuli mutu yoze. Alioze chalisambile mumu hali yami mwene, shina yuma yize yinalwezana ulelu wami.

⁶ Nyi nazangile kulisamba, hindu chichi kubwa chihepuke, mumu ngunahanjika umwenemwene. Alioze Chazangile kulisamba, mumu ngunazange angweseke ni yuma yize akumona ngwo, nakuyilinga, ni yuma yize nakuhanjika.

⁷ Alioze Zambi kazangile yami kulengumuka kuhiana mumu ha yikomokeso yize angulwezele. Kashika wanguhele yikola ya lamba. Yikola yize yangwijile ngwe kanganda ka Sakwonga hanga angulambe kuchina mungulengumuka kuhiana.

⁸ Yisuho yitatu nalembele Mwene Yesu ha kunguchiza yikola yize.

⁹ Yangukumbulula ngwenyi: “Utu wami unakuzuku, mumu ndundo jami jakusoloka kuhiana muze unalele.” Nakuwahilila kuhiana kulisamba ha ulelu wami, hanga ndundo ja Kristu jibwe muli yami.

¹⁰ Kashika nakuwaha ni ulelu wami, ni sahu, ni lamba, ni yihungumiona, ni kubinda, mumu hali Kristu. Mumu muze ngunalele, mba nguli ni tachi.

Chinyengo cha Paulu hali akwa Korintu

¹¹ Ngunahanjika ngwe chihepuke, alioze yenu nwangushinjika kuchilinga. Yenu chanutamba kunguchichimieka, mumu, chibwe nguli wamokomoko, hi nguli mulelu ko kuhiana tunganda twenu alemu.

¹² Nalihumikijine kuhiana ni milimo yize nalingile hakachi kenu. Ku milimo yize Zambi yasolola yinyingi, ni yikomokeso, ni yipupu, ha kulweza ngwo, nguli kanganda ka Kristu.

¹³ Ku Chuma chika chanulingile kanawa ngwe mu Yikungulwila yikwo? Shina hakutwala ku chize chanwichile mbongo, nyi? Ngukonekenenu uhenge uno.

¹⁴ Talenu, chisuho chino cha muchitatu ngunazange kunuheta—ni chichi kunwita mbongo. Ngunazange yenu atu, hi mbongo jenu ko. Hi ana ko chaatamba kusweka mbongo ha kukwasa yisemi jo, alioze yisemi chaatamba kusweka mbongo ha kukwasa ana jo.

¹⁵ Alioze munguwahilila chinji ha kunwaha yuma yeswe yize nguli nayo, munguhasa kulihana chibwe yami mwene ha kunukwasa. Nyi mungunuzanga kuhiana, kumana yenu mununguzanga hakepe, nyi?

¹⁶ Yenu nunatayiza ngwenu, chanutwikile yilemu. Alioze mutu mukwo mamba ngwenyi, nabwile Chilembekese, nawa ngwenyi, nanwongele.

¹⁷ Ngwe kuchi? Hakachi ka waze nanutuminyine, umwe walile yuma yenu ni ulembekese, nyi?

¹⁸ Naliumbile kuli Titu ha kunuheta, yingutuma nawa mukwetu, yoze nwanyingika, hamwe nenyi. Nunahase kwamba ngwenu, Titu yalia yuma yenu ni ulembekese, nyi? Iye ni yami, kutushi kulinga milimo ni mbunge yibema, nyi?

¹⁹ Chize kuze ndoo musono nwakunyonga ngwenu, twakufupa mana ha kulisambisa ku meso jenu. Hi chocho ko. Twakuhanjika ku meso ja Zambi nikulita ni chize azanga Kristu. Akwetu akwa Kristu, yuma yeswe yize twakulinga, twakuyilinga ha kunukwasa.

²⁰ Ngunevu woma ngwami, muze mungukanuheta, chichi kanuwana ngwe chize ngunazange, ni yenu kunuchi kangumona ngwe chize nunazange. Ngunevu woma ngwami, mungukanuwana nuli ni Vunda, ni ukwa, ni ufwatulo, ni kuzwela, ni kakowelo, ni kalundanganyishi, ni kulifuza, ni yizungozungo.

²¹ Ngunevu woma ngwami, nyi nanuheta nawa, Zambi yami makangukolesa sonyi ku meso jenu, ni mungukalila mumu atu anji haanavulumuna kulu. Ndoo musono uno kanda achehuka utanji wo, ni kuzengewa cho, ni yitanga yo ya sonyi.