2 Korintu 11 - Mukanda Wa Zambi 1970

Tunganda twa mahuza

¹ Ngunazange nulihumikize kama hakepe ha manyonga jami wano a uhepuke, ewa lihumikizenu!

² Ngunanuvwila ukwa, ukwa wa kuli Zambi. Mumu nuli ngwe mwana pwo wa kulinanga yoze kanda chilimona ni lunga, yoze hingunalakenya kumumbachisa kuli umwe lunga, Kristu.

³ Ngunevu woma ngwami, manyonga jenu maabihaa, nawa ngwami, munwecha kulihana chenu kuli Kristu, ngwe chize kapela wongele Namutu ni ukanyame wenyi wa mahuza.

⁴ Mumu nunatayiza muze mutu mukwo uneza ni kunwambujolela sango ja Yesu mukwo, hi yoze ko twanwambujolele. Nunatayiza nawa kutambula mwiku ukwo ni sango jikwo, kuhiana Mwiku wa Linanga ni Sango Jibema jize twanulongesele.

⁵ Ngunanyongo ngwami, tunganda twenu anene anene kaanguhianyine nichimwe!

⁶ Tangwa likwo nguli chikukumi, alioze chamwenemwene nguli ni yinyingi yinji. Hitunanunyingikisa yo kanawa tangwa heswe ni mu yuma yeswe.

⁷ Muze nanulongesele Sango Jibema, chanwichile kwami mbongo, chalisuchile ngwami: “Nguli mutu munene.” Alioze nambile ngwami: “Bwenu yenu atu anene anene.” Chuma chino chabwile chibi, nyi?

⁸ Muze nalingile milimo mukachi kenu, Yikungulwila yikwo te yaakungufweta. Chino chinalumbunuka ngwe, nguneyi ubite wo ha kunukwasa.

⁹ Muze nabwile mukachi kenu, nyi te hinabwa ni chikala cha mbongo, Chanuhele lamba ngwami: “Ngwehenu mbongo.” Mumu akwetu akwo waze akatukile ku chifuchi cha Masedonia yaangunehena yuma yeswe te nahonene. Nalifungile ha kunwaha yilemu chibwe ku cheswe Chuma. Chenacho mungukalifunga chibwe kulutwe ha kunutwika yilemu.

¹⁰ Ni umwenemwene wa Kristu, ngunashindakenya ngwami, mutu niumwe wa mu chifuchi cha Gresia mahasa kungukanjisa kulisamba chami.

¹¹ Kuchi mba ngunahanjika chino? Mumu Chishi kunuzanga, nyi? Zambi kaananyingika chize nakunuzanga.

¹² Yize nakulinga, mungunyongonona kuyilinga, ha kuchiza mahuza ja waze akuzanga kulisamba, waze akwamba ngwo, kaakulinga ngwe yetu.

¹³ Atu waze kaali tunganda twa mahuza, kaakwonga atu ni milimo yo. Nawa kaakwamba ngwo, kaali tunganda twa Kristu, alioze hi tunganda twa Kristu ko.

¹⁴ Hi Chuma cha kulishimwoka ko! Mumu chibwe Sakwonga iye mwene mahasa kwalumuka ngwe kanganda ka pangu!

¹⁵ Kashika, hi Chuma chinene ko nyi tuvumbi twenyi kaakwonga atu akwo ngwo, kaakulingila umwenemwene. Ku songo maakatambula nikulita ni yuma yize te akulinga.

Lamba lia Paulu ha milimo yenyi ya unganda

¹⁶ Ngunambe nawa ngwami, mutu niumwe kanda anyonga ngwenyi, nguli chihepuke. Alioze, nyi mununyonga chino, ngutayizenu haliabwila ngwe nguli chihepuke hanga ngulisambe hakepe.

¹⁷ Chamwenemwene yuma yize ngunahanjika haliabwila hi ya kuli Mwene Yesu ko, alioze ngunahanjika ngwe chihepuke.

¹⁸ Atu anji akulisamba ni manyonga ja uutu. Kashika ni yami nawa mungulisamba.

¹⁹ Yenu nuli akwa mana, nunahase kulihumikiza ni yihepuke.

²⁰ Nwakulihumikiza, nyi atu kaakunupwisa ndungo jo, hanji kunuseununa yuma yenu ni mana, hanji kunuliongela, hanji kunulelesa, hanji kunulamba mbangala.

²¹ Ngunevu sonyi ha kwamba ngwami, twabwile atu alelu kuhiana kulinga yuma yino. Alioze, nyi umwe mutu kevwile ko sonyi ha kulisamba ni chimwe Chuma yami ngunahanjika ngwe chihepuke ni yami nawa chichi kwivwa sonyi ha kulisamba.

²² Ayo kaali Ahebreu? Ni yami nawa. Kaali Aisraele? Ni yami nawa. Kaali a ku Chikota cha Abrahama? Ni yami nawa.

²³ Kaali tuvumbi twa Kristu? Ngunahanjika ngwe chizaluke. Yami nguli kuhiana ayo! Nahondanganyine kuhiana ayo, nabwile mu zuwo lia lamba yisuho yinji, nalambiwile kanji kuhiana, nabwile mu utoji wa kufwa kuhiana.

²⁴ Yisuho yitano Ayuda haanangulambe ni fimbo (shikote) makumi atatu ni livwa.

²⁵ Yisuho yitatu Aroma angulambile ni fimbo (shikote). Chisuho chimuwika angwashile mawe ha kungushiha. Yisuho yitatu nabwile mu meya, ulungu yiufwa. Chisuho chimuwika nabwile mukachi ka meya ola makumi aali ni jiwana.

²⁶ Muze te nakwendangana, nabwile mu utoji ha kuzala cha njiji, ni utoji wa akwetu jami Ayuda ni wa yilambala. Nabwile ni utoji mukachi ka membo ni wa mu puya, ni utoji wa tulanga lwiji, ni utoji wa akwetu akwo akwa mahuza.

²⁷ Hingunahondangana mulimo ya lamba ni milimo yikwo yize yanguhongesele. Yisuho yinji te Chishi kuhasa kubomba tulo. Nevwile zala ni pwila. Yisuho yinji nahonene yakulia, yisuho yinji namwene lamba lia chishika ni uvu nawa.

²⁸ Chazangile kwalula lamba liami lieswe, alioze tangwa ha tangwa nakunyongena Yikungulwila yeswe. Yuma yize yakungwaha kulema mu mbunge.

²⁹ Nyi umwe malela mu ufulielo, ni yami nawa mungulela. Nyi umwe mavulumuna ni yami chinyengo chinji mungwivwa mu mbunge.

³⁰ Nyi Changutamba kulisamba, mungulisamba ni yuma yize yinasolola ulelu wami.

³¹ Zambi kanda Tata ya Mwene Yesu kananyingika ngwenu, Chishi kuhanjika mahuza. Jina lienyi lifumane ku miaka yeswe!

³² Muze nabwile mu Damasku, mukwa kuyula mu chiyulo cha mwanangana Areta yatuma tufunga ha kwiza ni kungukwata ku yajilo yize yakutuhukila ku limbo.

³³ Alioze akwetu yaangubalikisa ku kapenda ka chipanga cha limbo lize. Mba yaangusunwishina mu kapaya. Chenacho nachinyine.