2 Korintu 10 - Mukanda Wa Zambi 1970

Ulemu wa milimo ya Paulu

¹ Atu kaakwamba ngwo, yami, Paulu, nguli chihomboloji muze nguli hamwe ni yenu, alioze nguli ni hamu muze nguli kusuku. Ngunaliumbu kuli yenu ku uhomboloji ni utu wa Kristu ngwami,

² muze mungukanuheta, kanda nukangushinjika mu kulinga Chuma chimwe ni tachi. Mumu ngunanyingika ngwami, nyi ngunazange, munguhasa kulweza tachi jami kuli waze akunyonga ngwo, twakulinga nikulita ni ndako yibi ya uutu.

³ Chamwenemwene, tuli mu mujimba wa uutu, hindu kutushi kwasa jita nikulita ni ndako yibi ya uutu.

⁴ Kutushi kwasa jita ni mata a hano hashi, alioze twakwasa jita ni mata a tachi ja Zambi waze maahasa kubuzula yipanga ya tachi ya mawe. Twakufwenya manyonga a mahuza.

⁵ Twakwonona yuma yeswe ya kulengumuka nayo, yize yakukasa atu jila ya kunyingika Zambi. Twakukwata manyonga eswe a atu ha kwononokena Kristu.

⁶ Nyi hitwamona ngwetu, nwakwononoka kanawa, mba mutuhasa kubatwila akwa pami.

⁷ Yenu nwakutala yuma yize yakusoloka ku meso. Nyi mutu kanalinyonga ngwenyi, kali wa Kristu, chamutamba kunyonga Chuma chino nawa, mumu yetu nawa tuli akwa Kristu ngwe iye.

⁸ Mumu chahashile kwivwa sonyi chibwe nalichichimiekene hamwe hakepe ha chiyulo chize atuhele Mwene Yesu. Chiyulo chize chakukolesa ufulielo wenu, hi kuwonona ko.

⁹ Chazangile mikanda yami kusoloka ngwe ngunafupu kunuvwisa woma.

¹⁰ Mumu amwe kaakwamba ngwo: “Mikanda ya Paulu yili yikalu kanda ya tachi, alioze muze ali hamwe ni yetu keshi hamu, ni kuhanjika chenyi chili chamokomoko!”

¹¹ Mutu yoze wakwamba chino, anyingike kanawa ngwenyi, kulisa chakuhi ku mikanda yize nakusoneka muze nguli kusuku, ni yize mungukalinga muze mungukabwa mukachi kenu.

¹² Chamwenemwene kutushi kuhamuka kulialula hanji kulitesa yetwene ni amwe waze akulizundula ayo ene kuhiana. Kaali yihepuke! Kaakulieseka ni yeseko ya ayo ene, kaakulitesa ayo ene!

¹³ Alioze yetu kutwahashile kulisamba, shina nikulita ni yeseko ya milimo yize atuhele Zambi, muze atutayijile kulinga milimo yetu mukachi kenu.

¹⁴ Kutwahianyishine yeseko yetu, mumu tunakanuheta mu kunulongesa Sango Jibema ja Kristu.

¹⁵ Kutushi kulisamba hakutwala ku milimo, yize alingile atu akwo. Alioze twakusa mbunge ngwetu, ufulielo wenu muutatuka, hanga tuhase kulinga milimo yahiana mukachi kenu.

¹⁶ Mba mutukahasa nawa kutwala Sango Jibema mu yifuchi yize yanujingilika, hi ni kulisamba ko ha yize atu akwo alingile mu yifuchi yo.

¹⁷ Alioze ngwe chize Mukanda wa Zambi unambe: “Yoze unazange kulisamba, alisambe ni chize alingile Mwene Zambi.”

¹⁸ Mumu Mwene Zambi keshi kutayiza mukwa kulisamba yoze unambe ngwenyi: “Nguli mubema,” alioze kakutayiza yoze iye mwene Zambi akwamba ngwenyi: “Kali mubema.”