2 Korintu 1 - Mukanda Wa Zambi 1970

Kumeneka

¹ Yami, Paulu, kanganda ka Yesu Kristu ku upale wa Zambi, ni mukwetu Timoteu, tunanumeneka yenu akwa Chikungulwila cha Zambi chize chili mu limbo lia Korintu, ni akwa Kristu eswe a mu chifuchi cheswe cha Gresia.

² Zambi Tata yetu ni Mwene Yesu Kristu anulweze utu ni anwehe uhwimino.

Kusakwila Zambi

³ Tusakwilenu Zambi kanda Tato ya Mwene wetu Yesu Kristu. Mwe Tata wakutuvwila keke ni kutulembejeka chikolo.

⁴ Kakutulembejeka mu lamba lietu heswe, hanga ni yetu tuhase kulembejeka waze akubwa mu lamba lieka ni lieka. Twakwalembejeka ngwe chize atulembejekele Zambi.

⁵ Mumu ngwe chize twakumona lamba hamwe ni Kristu mu lamba lienyi linji, chizechene nawa makatulembejeka ni tachi jenyi.

⁶ Nyi twakumona lamba, kachi twakulimona ha kunutakamisa ni kunulamwina. Nyi Zambi kakututakamisa, ni yenu nawa kakunutakamisa chizechene. Chenacho munutakama hanga nulihumikize mu lamba lize nwakumona, ngwe yetu nawa.

⁷ Tunase mbunge ha chikuma chenu, mumu tunanyingika ngwetu, ngwe chize nuli ni Chihanda mu lamba lietu, chizechene nawa munubwa ni Chihanda mu kutakamisa chetu.

⁸ Mumu tunazange nunyingike, akwetu, lamba lize liatuwanyine mu chifuchi cha Asia. Lamba linji twamwene. Kashika kutwanyongene nawa ngwetu, mutubwa ni mwono.

⁹ Twanyongene ngwe, mutufwa lume ni lamba. Alioze yuma yize yabwile hanga kutuchi kulifuliela yetwene, alioze shina lume Zambi yoze wakuhindwisa afu.

¹⁰ Mwenawo watupulwile ko utoji wa kufwa, ni makatupulula kulutwe. Ewa, tunase mbunge ngwetu, makatupulwola,

¹¹ mumu yenwene munukatukwasa mu kulemba chenu. Chenacho Zambi makakumbulula ku yilemba yinji hakutwala kuli yetu, makatuwahisa; ni anji maakamusakwilila ha chikuma chetu.

Manyonga ja Paulu hakutwala ku wenyi

¹² Ha chikuma chino twakulisamba ngwetu, manyonga jetu kaakutusongwela chize tubwa hano hashi, ni chize twakuliendela nenu. Chinalite ni umwenemwene ni ulinange ku tachi ja utu wa Zambi, alioze hi kuliendela ko ni mana ja atu.

¹³ Mumu tunanusonekena shina yikuma yize munuhasa kutanga nikunyingika. Ngunase ko mbunge ngwami, munukanyingika liakulu

¹⁴ yuma yize haliabwila nunanyingika ha Chihanda, hanga ha tangwa lia Mwene Yesu munukawahilila ni yetu ngwe chize mutukawahilila ni yenu.

¹⁵ Hatangu nanyongene kunuheta hanga ngukanuwahise yisuho yaali.

¹⁶ Mumu nanyongene kunuheta mu wenyi wami wakuya ku chifuchi cha Masedonia, ni ha kuhiluka chami nawa, hanga nikangukwase ha kuhiluka chami ku chifuchi cha Yudea.

¹⁷ Muze nanyongene chino, kafwa ngwe nachilingile ni lwelia, nyi? Hanji kunyonga chami chili cha uutu, nyi? Hanji nguli ngwe yoze wakwamba ngwenyi: “Ewa, ewa” hanji “Ka, ka” chisuho chimuwika, nyi?

¹⁸ Hi chocho ko. Nyi Zambi wamba Chuma, keshi kwalumuna nawa. Chanutamba kunyingika ngwenu, chahanjikile kuli yenu chisuho chimuwika “Ewa” ni “Ka”.

¹⁹ Mumu Yesu Kristu Mwana Zambi, yoze Sila, ni Timoteu, ni yami twambujolele mukachi kenu, kejile ko kubwa ha chisuho chimuwika “Ewa” ni “Ka”. Muli Yesu, Zambi hanatayiza ngwenyi: “Ewa”.

²⁰ Mumu Yesu kali “Ewa”, yoze Wakumanununa yilakenyo yeswe ya Zambi. Kashika, ku tachi ja Yesu Kristu, twakwamba ngwetu: “Chibwe kama Chenacho” mu kuhalisa Zambi.

²¹ Zambi iye mwene hanatutakamisa hamwe ni yenu mu kulinunga ni Kristu. Zambi iye mwene hanatupwisa akwa kulinanga.

²² Iye mwene hanatuse chinyingi chakulweza ngwo, tuli ana jenyi. Iye nawa hanase Mwiku wenyi wa Linanga muli yetu ngwe shindakenyo ya yiwape yize makatwaha.

²³ Ngunavuluka Zambi hanga abwe chela chami, kananyingika mbunge yami! Ngwami, chejile ku Korintu mumu Chazangile kunumwesa lamba.

²⁴ Kutushi kunwambila ni tachi chize chanutamba kufuliela, mumu nunamana nguu mu ufulielo. Alioze twakulinga hamwe ni yenu ha uwahililo wenu.