1 Yoano 5 - Mukanda Wa Zambi 1970

Mutuhasa kukumba yibi ya hano hashi

¹ Mweswawo wakufuliela ngwenyi, Yesu mwe Chilamwina yoze Zambi alakenyene, kali mwana wa Zambi. Yoze wakuzanga tata kakuzanga nawa mwanenyi.

² Nyi twakuzanga Zambi ni kufunga Shimbi jenyi, tunanyingika ngwetu, twakuzanga ana ja Zambi.

³ Mumu nyi twakuzanga Zambi, chinalumbunuka ngwo, twakufunga Shimbi jenyi, ni Shimbi jenyi hi jikalu ko ha kujifunga.

⁴ Mumu mwana mweswe wa Zambi tachi akwete ja kukumba yibi ya hano hashi. Ku ufulielo wetu wika twakukumba yibi ya hano hashi.

⁵ Iya makumba yibi ya hano hashi? Shina yoze wakufuliela ngwenyi, Yesu mwe Mwana Zambi.

Shindakenyo hakutwala kuli Yesu Kristu

⁶ Yesu Kristu haneza ni meya ja upapachiso wenyi ni manyinga a kufwa chenyi. Kejile ko ni meya wika, alioze ni meya ni manyinga. Mwiku wa Linanga wakushindakenya, ni Mwiku wakuhanjika umwenemwene.

⁷ Kukuli yela atatu:

⁸ Mwiku wa Linanga, ni meya, ni manyinga. Eswe atatu kaakulikunda.

⁹ Twakutayiza shindakenyo ya atu, alioze shindakenyo ya Zambi kuyahiana, mumu yili shindakenyo yize ambile Zambi hakutwala kuli Mwanenyi.

¹⁰ Yoze wakufuliela Mwana Zambi kali ni shindakenyo yize mu mbunge yenyi. Alioze yoze keshi kufuliela Zambi, kakupwisa Zambi mukwa mahuza mumu kafulielele ko shindakenyo yize Zambi ambile hakutwala kuli Mwanenyi.

¹¹ Ye shindakenyo yili yino ngwo, Zambi yatwaha mwono wa miaka yeswe. Mwono uze uli muli Mwanenyi.

¹² Yoze uli ni Mwana Zambi kali ni mwono uze, yoze keshi ni Mwana Zambi keshi mwono.

Mwono wa miaka yeswe

¹³ Ngunanusonekena yino hanga nunyingike ngwenu, yenu waze nwafuliela jina lia Mwana Zambi nuli ni mwono wa miaka yeswe.

¹⁴ Kashika tuli ni hamu ku meso ja Zambi. Tunanyingika pundu ngwetu, nyi mutwita chimwe Chuma nikulita ni upale wenyi, kumatwivwa.

¹⁵ Tunanyingika ngwetu, kakutwivwa. Kashika tunanyingika nawa ngwetu, twakutambula yeswe yize twakumwita.

¹⁶ Nyi umwe mamona mukwo kanavulumuna, alioze hi mulonga wa kufwa ko, chamutamba kumulembela Zambi, yoze makamwaha mwono. Kukuli mulonga ukwo uze wakutwala atu ku kufwa. Chambile ngwami, chanutamba kulemba Zambi ha mulonga ngwe uze.

¹⁷ Uhenge weswe uli shili, alioze kukuli mulonga ukwo hi wa kufwa ko.

¹⁸ Tunanyingika ngwetu, mwana wa Zambi keshi kunyongonona kulinga yibi. Mumu, Mwana Zambi kakumufunga, ni mwe Chingulungulu kahashile kumulinga chibi nichimwe.

¹⁹ Tunanyingika ngwetu, tuli a Zambi, ni mwe Chingulungulu kakuyula akwa hashi eswe.

²⁰ Tunanyingika ngwetu, Mwana Zambi haneza hano hashi, ni hanatwehe malinjekela hanga tunyingike Zambi yamwenemwene. Twakulinunga ni Zambi yamwenemwene ni Mwanenyi Yesu Kristu. Zambi kali Zambi yamwenemwene, ni kakuhana mwono wa miaka yeswe.

²¹ Ana jami, ehukenu mahamba.