1 Yoano 4 - Mukanda Wa Zambi 1970

Mwiku wa Zambi ni Mwiku wa Mukwa Kulimika ni Kristu

¹ Akwetu, kanda nufuliela eswe waze akwamba ngwo, Mwiku wa Zambi akwete, alioze esekenu ha kumona nyi Mwiku uze ali nawo kuuli wa kuli Zambi, nyi ka. Mumu akwa munanyi a mahuza anji haanamwangana hashi heswe.

² Ha chino mununyingika Mwiku wa Zambi: weswawo wakutayiza ngwenyi, Yesu Kristu hanalumuka mutu, kuuli Mwiku wa kuli Zambi.

³ Alioze weswawo kuushi kutayiza maliji wano, hi Mwiku wa kuli Zambi ko, alioze Mwiku wa Mukwa Kulimika ni Kristu. Nwevwile ngwo, muukeza, ni haliabwila hiuneza kulu hano hashi.

⁴ Alioze ana jami, nuli a Zambi. Hiunakumbu akwa munanyi a mahuza, mumu Mwiku uze uli muli yenu, uli ni tachi kuhiana mwiku uze uli muli akwa hashi.

⁵ Kaakuhanjika yuma ya hashi, ni akwa hashi kaakwevwa, mumu kaali kwo akwa hashi.

⁶ Alioze yetu tuli a Zambi. Yoze Unanyingika Zambi, kakutwivwa. Yoze hi wa Zambi ko, keshi kutwivwa. Ha chino twakunyingika Mwiku wa umwenemwene ni mwiku wa mahuza.

Zambi kali mukwa zango

⁷ Akwetu tulizangenu, mumu zango liakukatuka kuli Zambi. Yoze wakuzanga kali mwana wa Zambi, ni kananyingika Zambi.

⁸ Yoze keshi kuzanga akwo kanyingikine Zambi, mumu Zambi kali mukwa zango.

⁹ Zambi hanatusolwela zango lienyi ngwe chino: yatuma Mwanenyi wa wika hano hashi hanga tubwe ni mwono ku tachi jenyi.

¹⁰ Zango lize lili ngwe chino: hi yetu ko twazangile Zambi, alioze iye watuzangile yetu. Kashika yatutumina Mwanenyi ha kubwa kuka ha shili yetu.

¹¹ Akwetu, nyi Zambi hanatuzange Chenacho, nyi yetu nawa chatutamba kulizanga ni akwetu.

¹² Mutu niumwe hanamono Zambi nilimwe tangwa. Alioze, nyi twakulizanga ni akwetu, Zambi kakulinunga ni yetu, ni zango lienyi mulinyongonoka muli yetu.

¹³ Tunanyingika ngwetu, hanatwehe Mwiku wenyi. Kashika, twakunyingika ngwetu, twakulinunga nenyi, neye kakulinunga ni yetu.

¹⁴ Yetu hitunamono, ni hitunambujola ngwetu, Tata hanatumu Mwanenyi ha kubwa Chilamwina cha akwa hashi.

¹⁵ Mweswawo wakutayiza ngwenyi, Yesu kali Mwana Zambi, Zambi kakulinunga nenyi, neye kakulinunga ni Zambi.

¹⁶ Yetu tunanyingika ni twakujikijila ha Chuma chino ngwetu, Zambi kakutuzanga. Zambi kali mukwa zango. Mweswawo ukwete zango, kakuliendela ni Zambi, ni Zambi kakuliendela nenyi.

¹⁷ Zango lia Zambi liakunyongonoka muli yetu, hanga tukabwe ni hamu ha Tangwa lia Ubatwilo, mumu mwono wetu hano hashi uli ngwe uze wa Kristu.

¹⁸ Nyi zango kulili, woma kuushiko. Zango liamwenemwene kuliakuchiza woma. Nyi mutu kakwivwa woma, chinalumbunuka ngwo, kakushimbwila ubatwilo, zango lienyi hi liakunyongonoka ko.

¹⁹ Yetu twakuzanga akwetu, mumu Zambi watuzangile hatangu.

²⁰ Nyi mutu kanambe ngwenyi: “Nakuzanga Zambi,” hindu kakuvutwokela mukwo, kali mukwa mahuza. Mumu yoze keshi kuzanga mukwo yoze akumona, kahashile kwenyi kuzanga Zambi yoze kanda achimona kama.

²¹ Yino ye Shimbi yize Kristu atuhele ngwenyi, yoze wakuzanga Zambi chamutamba nawa kuzanga mukwo.