1 Yoano 3 - Mukanda Wa Zambi 1970

Ana ja Zambi ni ana ja Sakwonga

¹ Talenu chize Tata hanatuzange! Kakutuvuluka ngwenyi, ana jenyi. Chamwenemwene tuli ana ja Zambi. Akwa hashi kaatunyingikine ko, mumu kaanyingikine Zambi.

² Akwetu, haliabwila tuli ana ja Zambi. Kutwanyingikine kanawa chize mutukabwa kulutwe, alioze tunanyingika chino ngwetu, muze Kristu makasoloka, mutukalifwa nenyi, mumu mutukamumona chize abwa.

³ Mutu mweswe yoze wakusa mbunge kuli Kristu, kakulipwisa munangi ngwe Kristu kali munangi.

⁴ Yoze wakuvulumuna, kakutangula Shimbi ja Zambi, mumu uvulumwino uli kutangula cha Shimbi.

⁵ Nunanyingika ngwenu, Kristu haneza hano hashi ha kuchiza milonga ya atu. Nunanyingika nawa ngwenu, iye keshi shili.

⁶ Kashika, yoze wakulinunga ni Kristu keshi kunyongonona nikuvulumiona. Alioze yoze wakunyongonona ni kuvulumiona, kamumwene ni kamunyingikine nichimwe.

⁷ Ana jami, niumwe kanda anwonga! Yoze wakulinga ululi, neye mwene kali mukwa ululi, ngwe Kristu kali mukwa ululi.

⁸ Yoze wakunyongonona ni kuvulumiona kali wa Sakwonga, mumu Sakwonga hanavulumuna chize ku Ubutukilo. Mwana Zambi hanasoloka ha kwonona yitanga ya Sakwonga.

⁹ Mutu yoze kali mwana wa Zambi, keshi kunyongonona nikuvulumiona, mumu mwono uze amuhele Zambi uli muli iye. Kahashile kunyongonona nikuvulumiona, mumu kali mwana wa Zambi.

¹⁰ Kulituchika mukachi ka ana ja Zambi ni ana ja Sakwonga chakubwa ngwe chino, yoze keshi kulinga ululi, chibwe keshi kuzanga mukwo, hi mwana wa Zambi ko.

Tulizangenu ni akwetu

¹¹ Mumu lino lie liji lize nwevwile chize ku kabutu ngwo, tulizangenu ni akwetu.

¹² Kuchatambile kubwa ngwe Kene, mutu wa kuli mwe Chingulungulu, yoze washihile mwanakwo. Ha chikuma chika amushihilile? Mumu te kakulinga yibi, alioze mwanakwo te kakulinga yibema.

¹³ Akwetu, kanda nulishimwoka nyi akwa hashi maanuvutwokela.

¹⁴ Tunanyingika ngwetu, twabwile afu, alioze haliabwila tuli ni mwono. Tunachinyingika mumu twakuzanga akwetu akwa Kristu. Yoze keshi kuzanga mukwo kali mufu lume.

¹⁵ Mweswawo wakuvutwokela mukwo kali mukwa kushiha atu, ni nunanyingika ngwenu, mukwa kushiha atu keshi ni mwono wa miaka yeswe.

¹⁶ Ngwe chino tunanyingika chize liabwa zango, ngwetu, Kristu hanakunjika mwono wenyi hali yetu. Kashika, ni yetu nawa, chatutamba kukunjika mwono wetu hali akwetu.

¹⁷ Nyi umwe mutu, pichi, kanamono mukwo kanahono, alioze nyi makalisa mbunge yenyi, ngwe kuchi mahasa kwamba ngwenyi, kakuzanga Zambi?

¹⁸ Ana jami, kanda tulizanga ni kanwa wika, alioze chatutamba kulizanga ni umwenemwene uze wakumoneka mu yitanga yetu.

Hamu ku meso ja Zambi

¹⁹ Ha chino mutunyingika ngwetu, tuli amwenemwene, ni mutubwa ni hamu mu mbunge jetu ku meso ja Zambi.

²⁰ Nyi mbunge jetu mujituhisa, tunanyingika ngwetu, Zambi kanahiana mbunge jetu, ni kananyingika yuma yeswe.

²¹ Akwetu, nyi mbunge jetu kujatuhishile, tuli ni hamu ku meso ja Zambi.

²² Yize yeswe twakumwita kakutwaha yo, mumu twakufunga Shimbi jenyi ni twakulinga yize yakumuwahila.

²³ Shimbi jize atuhele jenaji aji: chatutamba kufuliela Yesu Kristu Mwanenyi ni kulizanga ni akwetu ngwe chize atulwezele.

²⁴ Yoze wakufunga Shimbi ja Zambi, kakulinunga ni Zambi, ni Zambi kakulinunga nenyi. Tunanyingika ngwetu, Zambi kakulinunga ni yetu, mumu watuhele Mwiku wenyi wa Linanga.