1 Yoano 2 - Mukanda Wa Zambi 1970

Kristu haku lietu

¹ Ana jami, ngunanusonekena yuma yino hanga kunuchi kuvulumuna. Alioze, nyi umwe mavulumuna, haku tuli nenyi ku meso ja Tata, mwe Yesu Kristu mukwa ululi.

² Iye mwe kuka wa milonga yetu. Hi wa milonga yetu wika ko, alioze nawa ha milonga ya atu eswe.

³ Nyi twakufunga Shimbi ja Zambi, kachi mutusa chinyingi ngwetu, tunanyingika Zambi.

⁴ Nyi umwe kakwamba ngwenyi: “Ngunanyingika Zambi,” hindu keshi kufunga Shimbi jenyi, mwenawo kali mukwa mahuza, umwenemwene kuushimo muli iye.

⁵ Alioze yoze wakwononokena liji lia Zambi, chamwenemwene kakuzanga Zambi kuhiana. Ha chino tunanyingika ngwetu, twakuliendela ni Zambi.

⁶ Yoze wakwamba ngwenyi: “Nakuliendela nenyi,” chamutamba kubwa ngwe chize abwile Yesu.

Shimbi yaha

⁷ Akwetu, Shimbi yino ngunanwehe hi yaha ko, alioze yili Shimbi yikulu yize nwatambwile chize ku Ubutukilo. Shimbi yize yikulu yili longeso lize nwevwile kulu.

⁸ Hindu Shimbi yino ngunanusonekena yili Shimbi yaha, mumu umwenemwene wayo unamoneka muli Kristu ni muli yenu nawa. Mumu milima hiyabutuka kuhwa, pangu liamwenemwene hiliabutuka kutemuka.

⁹ Yoze wakwamba ngwenyi: “Nguli mu pangu,” hindu kakuvutwokela mukwo, mutu yoze uchili mu milima ndoo haliabwila.

¹⁰ Yoze wakuzanga mukwo, kali mu pangu. Muli iye kumushi nichimwe chize muchihasa kulimbwisa mukwo.

¹¹ Alioze yoze wakuvutwokela mukwo kali mu milima. Kakwenda mu milima. Keshi kunyingika kuze anayi, mumu milima hiyinapupuchisa meso jenyi.

¹² Ana jami, ngunanusonekena, mumu Zambi hananukonekena milonga yenu mu jina lia Kristu.

¹³ Atata, ngunanusonekena, mumu nunanyingika yoze wabwile chize ku Ubutukilo. Akweze, ngunanusonekena, mumu hinunakumbu mwe Chingulungulu.

¹⁴ Ana, ngunanusonekena mumu nunanyingika Tata. Atata, ngunanusonekena mumu nunanyingika yoze wabwile chize ku ubutukilo. Akweze, ngunanusonekena mumu nunatakama; liji lia Zambi lili muli yenu, ni hinunakumbu mwe Chingulungulu.

¹⁵ Kanda nuzanga hano hashi chibwe yuma yize yiliho. Nyi umwe mazanga hano hashi, keshi kuzanga Tata.

¹⁶ Mumu yuma yeswe ya hano hashi—usolo Ubi wa mujimba, ni usolo wa meso, ni yize twakulengumuka nayo hano hashi—yize yeswe hi ya Tata Zambi ko, alioze ya hano hashi.

¹⁷ Hashi muhabalika ni usolo waho ubi, alioze yoze wakulinga upale wa Zambi makabwa ni mwono ndoo ku miaka yeswe.

Mukwa Kulimika ni Kristu

¹⁸ Ana jami, ola yakusula hiyakundama! Hinunevu ngwo, Mukwa Kulimika ni Kristu makeza. Kuma, haliabwila akwa kulimika ni Kristu anji haanasoloka kulu. Ha chino tunanyingika ngwetu, ola yakusula hiyakundama.

¹⁹ Atu wano, chamwenemwene, te hi a kuli yetu ko, kashika atwehukile. Mumu, nyi te a kuli yetu, kachi kaasalile hamwe ni yetu. Alioze yaatwehuka hanga chisoloke zwalala ngwo, niumwe wa kuli ayo wabwile ni wetu.

²⁰ Alioze yenu nunanyingika umwenemwene, mumu Kristu hananwehe Mwiku wa Zambi.

²¹ Chanusonekenene ngwe kunwanyingikine umwenemwene, alioze mumu nunaunyingika, ni hinunanyingika ngwenu, mahuza keeshi kukatuka ku umwenemwene.

²² Iya mukwa mahuza? Yoze wakwamba ngwenyi: “Yesu hi Kristu ko,” mwenawo mukwa kulimika ni Kristu. Kakulituna eswe aali, mwe Tata ni mwe Mwana.

²³ Mumu yoze wakulituna Mwana kakulituna nawa Tata. Yoze wakutayiza Mwana kakutayiza nawa Tata.

²⁴ Yuma yize nwevwile chize ku kabutu, yifungenu mu mbunge jenu. Nyi nwakufunga mu mbunge jenu yuma yize nwevwile chize ku kabutu ndoo musono uno, kachi munuliendela ni Mwana ni Tata.

²⁵ Chino che chilakenyo chize Kristu atulakenyene—mwono wa miaka yeswe.

²⁶ Ngunanusonekena chino hakutwala kuli waze akufupa kunupiangula.

²⁷ Alioze hakutwala kuli yenu, Kristu hananuhinjila Mwiku wenyi. Shimbu te Mwiku wenyi watwama muli yenu, kunushi kufupa umwe kunulongesa. Mumu we Mwiku wakunulongesa yuma yeswe, ni yize wakulongesa yili ya umwenemwene, hi ya mahuza ko. Kashika liendelenu ni Kristu ngwe chize Mwiku wa Linanga wakunulongesa.

²⁸ Ana jami, haliabwila nwakulinunga ni Kristu; twamenu chizechene hanga tukajikize, ni kutuchi kevwa sonyi ku meso jenyi ha tangwa lia kwiza chenyi.

²⁹ Nunanyingika ngwenu, Kristu kali mukwa ululi. Ha chino chanutamba kunyingika nawa ngwenu, mutu mweswe yoze wakulinga ululi kali mwana wa Zambi.