1 Yoano 1 - Mukanda Wa Zambi 1970

Maliji a mwono

¹ Tunanusonekena hakutwala ku liji lia mwono, lize liabwile chize ku Ubutukilo wa yuma yeswe. Yitulivwa, yitulimona ni meso jetu, yitulitala, yitulivwavwata.

² Muze mwono uno wasolokele, yituumona. Kashika tuli yela jawo, ni tunanwambulwila mwono wa miaka yeswe uze wabwile hamwe ni Tata, ni hanatusolwela wo.

³ Yize twamwene ni twevwile, tunanwambulwila yo yenu nawa, hanga nulinunge ni yetu mu kuliendela chize tuli nacho hamwe ni Tata ni Mwanenyi Yesu Kristu.

⁴ Tunanusonekena chino hanga tuwahilile kuhiana.

Zambi kali pangu

⁵ Lino lie liji lize twevwile kuli Yesu Kristu ni tunanwambulwila lio. Zambi kali pangu, muli iye kumushi milima niyimwe.

⁶ Nyi twakwamba ngwetu, twakuliendela nenyi, hindu tuli mu milima, twakuhanjika lume mahuza ni kutushi kulinga yuma yamwenemwene.

⁷ Alioze, nyi tuli mu pangu ngwe chize Zambi iye mwene kali mu pangu, Chenacho twakuliendela amwe ni akwetu, ni manyinga a Yesu Mwanenyi, kaakutubemesa ku shili yeswe.

⁸ Nyi twakwamba ngwetu, kutushi shili, twakulionga yetwene, ni umwenemwene kuushimo muli yetu.

⁹ Alioze, nyi twakushikisa milonga yetu, iye kali mukwa kushishika ni mukwa ululi ha kutukonekena milonga yetu, ni kutubemesa ku uhenge weswe.

¹⁰ Nyi twakwamba ngwetu, kutwavulumwine, twakupwisa Zambi ngwe mukwa mahuza, ni liji lienyi kulishimo muli yetu.