1 Timoteu 6 - Mukanda Wa Zambi 1970

¹ Ndungo eswe chaatamba kusa miata jo vumbi. Hanga mutu niumwe kechi kushililika Zambi ni longeso lietu.

² Ndungo waze ali ni miata jo akwa Kristu, kuchaatambile kwalelesa mumu kaali akwa Kristu ni akwo. Alioze chaatamba kwaalingila kuhiana, mumu kaakukwasa akwetu akwa kufuliela. Chakutamba kulongesa ni kwambujola yuma yino.

Longeso lia mahuza ni ubite wamwenemwene

³ Nyi mutu malongesa longeso lieka, ni keshi kwononoka ku liji liamwenemwene lia Mwene wetu Yesu Kristu ni longeso lia ufulielo wetu,

⁴ nyingika ngwe, kanalengumuka, kanyingikine nichimwe. Usolo ubi unamushinjika ni kuhamika ni kuzwela hakutwala ku maliji. Kwenako kwakwiza lufwachinda, ni Vunda, ni kushililika, ni manyonga a ungulungulu,

⁵ ni kuhamika chize kuchishi songo hakachi ka atu waze keeshi manyonga, waze kaanyingikine umwenemwene. Kaakunyonga ngwo, ufulielo uli jila ya kubichila.

⁶ Chamwenemwene, ufulielo kuyuka ukwete nyi mutu mawahilila ni yuma yize ali nayo.

⁷ Kutwanehene Chuma nichimwe hano hashi, ni kutwahashile kuchiza ho nichimwe.

⁸ Kashika, nyi tuli ni yakulia ni mahina chatutamba kuyuka nayo.

⁹ Alioze waze akuzanga kulipwisa pichi kaakulimbuka mu cheseko, ni mu muheto wa manyonga anji a uhepuke ni usolo ubi uze wakulimbwisa atu ni kwashiha.

¹⁰ Mumu lwahu wa mbongo kali chishina cha yibi yeka ni yeka. Amwe waze abwile ni usolo ha kubwa najo haanapianguka ku ufulielo, haanalituwu ni yinyengo yinji.

Longeso hakutwala kuli Timoteu

¹¹ Alioze yena, mutu wa Zambi, ehuka yuma yino yeswe. Sako tachi ku yuma ya uzambi. Bwako ni ululi, ni ufulielo, ni zango, ni utunu, ni uhomboloji.

¹² Nyongonona mu kulitachika chibema cha ufulielo, utambule mwono wa miaka yeswe, mumu Zambi wakutambikile hanga ubwe ni mwono uze, muze yena watayijile ufulielo we ku meso ja yela anji.

¹³ Ku meso ja Zambi, yoze wakupwisa atu eswe ni yuma yeswe ni mwono, ni ku meso ja Kristu Yesu, yoze washindakenyene shindakenyo yibema ya ufulielo ku meso ja Ponteu Pilatu, ngunakwehe Shimbi yino. Ngwami,

¹⁴ Ononoka ku maliji a Shimbi waze akwambile ha kwalinga. Kanda ulibihisa, kanda ubwa ni kapalia ndoo tangwa lize Mwene wetu Yesu Kristu makasoloka.

¹⁵ Zambi wika, mukwa kuyula, mukwa kuwaha, Mwanangana wa mianangana, Mwene wa ene, mwenawo makamusolola.

¹⁶ Iye wika keshi kufwa. Katwama mu pangu lize mutu niumwe kahashile kukundama mo. Mutu niumwe kanda amumona kama nilimwe tangwa, niumwe mahasa kumumona. Iye chamutamba kubwa ni ulemu ni ndundo ku miaka yeswe! Chibwe kama Chenacho.

¹⁷ Hana Shimbi kuli waze ali ni ubite wa hano hashi ngwe, kanda alengumuka. Alweze ngwe, kanda asa mbunge jo ku ubite uze hi wamwenemwene ko. Shinoho ase mbunge jo kuli Zambi, yoze wakutwaha yuma yeswe yakulumbama, hanga tukawahilile nayo.

¹⁸ Alinge yibema, abwe ni yitanga yibema yakulumbama, abwe atangia yibema, akwa kulianyina.

¹⁹ Chenacho maalitulikila ubite Ubema ku mwaka uze muwiza ho. Mba maakatambula mwono uze wamwenemwene.

²⁰ Yena Timoteu, Ononoka ku chize akukunjikile. Ehuka kuhamika chamokomoko ni chize chakulimika ni ufulielo. Ehuka yuma yize akuvuluka ngwo: “Yinyingi,” alioze hi yinyingi yamwenemwene ko.

²¹ Mumu amwe atu kaakwamba ngwo: “Tuli ni yinyingi yize,” alioze haanapiasuka hakutwala ku ufulielo wo. Zambi akulweze utu wenyi.