1 Timoteu 5 - Mukanda Wa Zambi 1970

Shimbi jeka ni jeka ha kuliendela mu Chikungulwila

¹ Kanda ukanjisa mukulwana ni maliji akalu, alioze liumbe kuli iye ngwe chize wakuliumba kuli tatenu. Liendele ni ana malunga ngwe anakwenu.

² Liendele ni makulwana a mapwo ngwe anoko, ni mapwo akwo ngwe mandumbu je.

³ Lweza vumbi kuli twamishi amwenemwene, waze haanafwisa malunga.

⁴ Alioze nyi umwe twamishi kali ni ana hanji ajikulu, e ana hanji ajikulu chaatamba kulilongesa kukwasa jiko lio. Ngwe chino akwase yisemi jo ni akako ngwe chinalite, mumu chino chakubema kuli Zambi.

⁵ Twamishi wamwenemwene, yoze hanafwisa lunga, nyi keshi chikwashi, kakusa mbunge yenyi kuli Zambi, keshi kulitwamina kulemba ni kuliumba kuli Zambi ufuku ni mwalwa ha kumukwasa.

⁶ Alioze twamishi yoze hanafwisa lunga, nyi malihana ku kuwaha cha yuma ya hano hashi, mabwa ngwe mufu, chibwe uchili ni mwono.

⁷ Yino ye Shimbi chatamba kwaha, hanga keechi kubwa ni kapalia.

⁸ Nyi umwe keshi kukwasa atu jenyi mwene, chibichibi waze a ku jiko lienyi, mutu yoze hanatokesa ufulielo wenyi, kali mubi kuhiana yoze keshi kufuliela.

⁹ Kanda usoneka twamishi yoze hanafwisa lunga, shina abwe kuhiana miaka makumi asambano. Chikwo nawa, yoze ambachile kuli lunga umuwika lume,

¹⁰ mukwa lufuma mubema. Chatamba kubwa yoze hanalongesa ana jenyi kanawa, ni hanazumbula ngeji, ni hanasanyisa molu ja akwa Kristu, ni hanakwasa akwa lamba, ni hanalingi yuma yeka ni yeka yibema.

¹¹ Alioze kanda usoneka ana mapwo waze haanafwisa malunga, mumu muze maazanga kuya nawa ku malo, maasulumioka kuli Kristu.

¹² Mba maakabwa ni uhiso ha kwehuka chilakenyo cho chitangu.

¹³ Maakalilongesa nawa kulelumioka ni kujingajinga ku zuwo ni zuwo. Hi kulelumioka wika ko, alioze maakabwa akwa kalundanganyishi ni akwa moko a njiji, nikuhanjika yuma yize kuyalitele.

¹⁴ Kashika ngunazange ngwami, ana mapwo waze haanafwisa malunga, aye nawa ku malo, aseme ana, ayule mazuwo jo, hanga akwa kole jetu kaahashile kuhanjika yibi hali yetu.

¹⁵ Mumu mapwo akwo haanehuka jila yibema, haanakaula Sakwonga.

¹⁶ Alioze, nyi umwe pwo mukwa Kristu, kali ni twamishi a ku jiko lienyi waze haanafwisa malunga, chamutamba kwakwasa. Kanda aakunjika ku Chikungulwila, hanga Chikungulwila ahase kukwasa twamishi waze ali ukawo.

¹⁷ Makulwana waze akuyula Chikungulwila kanawa, chibichibi waze akuhondangana mu kwambujola ni kulongesa, chaatamba kwafweta kaali.

¹⁸ Mumu Mukanda wa Zambi unambe ngwo: “Kanda usa kata ku kanwa lia ngombe muze anazungula mbuto,” nawa ngwo: “Mukwa milimo kanatela fweto yenyi.”

¹⁹ Kanda ubanjika kusuma chimwe hali mukulwana wa Chikungulwila shina ku kanwa lia yela aali hanji atatu.

²⁰ Waze akuvulumuna, akumike ku meso ja atu eswe, hanga akwo nawa akevwe woma.

²¹ Ku meso ja Zambi, ni ku meso ja Kristu Yesu, ni ku meso ja tunganda a mwilu a kulinanga, ngunakwambe ngwami, Ononokena maliji wano, hi ni katonde ko, alioze lingila atu eswe chimuwika.

²² Kanda ulipupwisa kusa moko hali umwe mutu mu milimo ya Chikungulwila. Kanda ulichinga mu milonga ya mbala. Ulinange.

²³ Kanda unwa meya wika, alioze tambula kavinyu ha lufu we, mumu wakuyiza kanji.

²⁴ Atu akwo, milonga yo yakusoloka zwalala nikawashi, chibwe muze Zambi kanda achasopesa. Alioze atu akwo, milonga yo yakusoloka shina kunyima.

²⁵ Yitanga yibema, neyo nawa, yakusoloka zwalala, chibwe yize kuyishi kusoloka nikawashi kuyishi kuhasa kuswamana.