1 Timoteu 4 - Mukanda Wa Zambi 1970

Alongeshi a mahuza

¹ Mwiku wa Linanga unahanjika pundu ngwenyi, ha miaka yakusula atu anji maakehuka ufulielo wo. Maakononokena mwiku wa mahuza, maakafunga longeso lia mwiku ubi.

² Longeso lino lineza kuli yilembekese, akwa mahuza. Manyonga jo a mu mbunge haanabu ngwe akwocha ni utale wa kahia.

³ Atu waze kaakukanjisa umbachiso ni kujilika kulia yuma yikwo. Alioze Zambi hanayilingi hanga atu akayilie. Akwa Kristu waze anyingika umwenemwene, maasakwila mba maayilia.

⁴ Yeswe yize atangile Zambi yinabeme, kuchatambile kulituna nichimwe, alioze kuchitambula ni kusakwila.

⁵ Kaanachipwisa cha kulinanga ni maliji a Zambi ni kulemba.

Kavumbi mubema wa Yesu Kristu

⁶ Nyi muulongesa longeso lino kuli akwenu akwo, muulingila Yesu Kristu kanawa, muutambula tachi mu mbunge ye ku umwenemwene wa ufulielo wetu ni ku longeso libema lize hiunakaula.

⁷ Alioze Chakutamba kwehuka yishima yamokomoko ni yize kuyishi kulita ni ufulielo. Shinaho likoleze ha kubwa mukwa Kristu wa tachi.

⁸ Ku kolesa cha mujimba chakukwasa ha yuma yikepe. Alioze kulikolesa ha yuma ya uzambi chinahiana yuma yeswe. Mumu kuyakutwaha chilakenyo cha mwono wa haliabwila ni cha uze muwiza ho.

⁹ Lino liji liamwenewene, lize chatamba kulitayiza ni kulifuliela

¹⁰ Kashika twakuhondangana ni kulitachika, mumu twakusa mbunge kuli Zambi ya mwono, Chilamwina cha atu eswe, alioze kuhiana chikolo cha waze akufuliela.

¹¹ Hana Shimbi hakutwala ku yuma yino ni kuyilongesa.

¹² Kanda ubwa ni kapalia; nyi ka, atu maalelesa ukweze we. Alioze bwako chilweza kuli akwa kufuliela ku liji, ni ku zango, ni ku ufulielo, ni ku kulinanga.

¹³ Ndoo muze mungukeza, ngunazange ulisele ku kutanga cha Mukanda wa Zambi kuli atu, ni kwashinjila ni kwalongesa.

¹⁴ Kanda ulelesa chawana cha mana chize uli nacho, chize watambwile muze akwa munanyi a Zambi ahanjikile ni muze makulwana akusele moko.

¹⁵ Chatamba kulinga yuma yino kanawa ni kulihana ku yiyo, mba atu eswe maakamona ngwo, milimo yinayi kanawa kulutwe.

¹⁶ Kanyama yena mwene ni longeso lie. Nyongonona mu yuma yize yeswe, mumu nyi walinga chocho muukalilamwina yena mwene ni eswe waze akukwivwa.