1 Timoteu 3 - Mukanda Wa Zambi 1970

Ndako ya tulayi a mu Chikungulwila

¹ Lino liji liamwenemwene ngwo, nyi mutu manyonga kubwa kalayi wa Chikungulwila, kanazange milimo yibema.

² Kalayi wa Chikungulwila kuchatambile kubwa ni kapalia. Chamutamba kubwa lunga wa pwo umuwika, mukwa kukeyela, mukwa kuliyula, mukwa vumbi, mukwa kuzumbula ngeji, mukwa mana mu kulongesa,

³ hi mukwa kuzengewa ko, hi mukwa chimbangunya ko, chimbovu, mukwa sambukila, hi mukwa lwahu wa mbongo ko.

⁴ Chamutamba kunyingika kuyula zuwo lienyi kanawa, ni kuhombola ana jenyi ha kumwononokena ni vumbi lieswe.

⁵ Mumu, nyi mutu kanyingikine kuyula zuwo lienyi mwene kanawa, ngwe kuchi mahasa kufunga Chikungulwila cha Zambi?

⁶ Kuchatambile kubwa mutu mwaha mu ufulielo. Nyi ka, malisuta, ni Zambi mamuhisa ngwe chize ahishile Sakwonga.

⁷ Chamutamba kubwa ni shindakenyo yibema kuli waze hi akwa Kristu ko, hanga kechi kulimbuka mu milonga ya sonyi ni mu muheto wa Sakwonga.

Ndako ya tuvumbi a mu Chikungulwila

⁸ Tuvumbi a mu Chikungulwila, chizechene nawa, chaatamba kubwa akwa vumbi ni amwenemwene, hi akwa kuzengewa ko ni vinyu, hi akwa kufumbula mbongo ko ni mahuza.

⁹ Chaatamba kwononokena ni mbunge yibema umwenemwene uze asolwele Zambi hakutwala ku ufulielo.

¹⁰ Chatamba kweeseka hatangu, nyi kaanatela, mba maaha milimo.

¹¹ Mapwo jo nawa chizechene, chaatamba kubwa akwa vumbi, hi akwa mafwefwe ko, alioze akwa kukeyela, mapwo amwenemwene ha yuma yeswe.

¹² Tuvumbi chaatamba kubwa malunga a pwo umuwika umuwika. Chaatamba kunyingika kuyula ana jo ni mazuwo jo kanawa.

¹³ Tuvumbi waze akulinga milimo yibema, atu kaakwachichimieka. No kaanahase kuhanjika ni hamu hakutwala ku ufulielo uze tuli nawo mu kulinunga ni Kristu Yesu.

Chijimbikilo chinene hakutwala ku ufulielo wetu

¹⁴ Muze ngunakusonekena mukanda uno, ngunaseko mbunge ngwami, mungwiza ni kukutala ha shimbu likepe.

¹⁵ Alioze, nyi nalaluka, mukanda uno muukulweza chize Chakutamba kubwa mukachi ka akwa Kristu, che Chikungulwila cha Zambi ya mwono, lie nguji ni fundamentu yamwenemwene.

¹⁶ Niumwe kahashile kulituna unene wa chijimbikilo cha ufulielo wetu! Yasoloka mu mujimba wa uutu, Mwiku wa Linanga yiumusambisa, Tunganda a mwilu yaamumona. Yaamwambujola hakachi ka waze hi Ayuda ko, Yaamufuliela hano hashi, Yaamutambula mwilu mu uhenya.