1 Timoteu 2 - Mukanda Wa Zambi 1970

Longeso hakutwala ku kulemba

¹ Liji litangu, ngunaliumbu kuli akwa Kristu eswe ngwami, alembe Zambi ni kuliumba ni kusakwila hali atu eswe.

² Alembele mianangana ni akwa kuyula eswe, hanga tukatwame ni uhwimino ni sambukila, ni kuliendela chibema ni Zambi ni vumbi lieswe.

³ Chino che chinalite ni chakuwahisa Zambi, Chilamwina chetu,

⁴ yoze wakuzanga ngwenyi, atu eswe alilamwine ni anyingike umwenemwene.

⁵ Mumu kwali Zambi umuwika lume, ni Chitakanyishi umuwika lume mukachi ka Zambi ni atu, mwe mutu Yesu Kristu.

⁶ Yalihana iye mwene ha kukula atu eswe mu ubinji wa shili. Zambi hanachilingi ha mwaka uze unalite ha kulweza ngwenyi, kakuzanga atu eswe alilamwine.

⁷ Kashika Zambi hanangutumu kubwa kanganda ni longeshi ya waze hi Ayuda ko, ha kwambujolela liji lia ufulielo ni liamwenemwene. Chahanjikile mahuza, ngunahanjika umwenemwene!

⁸ Ngunazange ngwami, malunga kweswe abwe ni kulemba, nikuzundwola moko ni kulemba ni mbunge ya kulinanga, hi ni utenu ko hanji hi ni mbunge ya kuyambashana ko.

⁹ Ngunazange nawa ngwami, mapwo azale chize chinalite nikuhomboka ku meso ni mana, hi ni kambu ja utotombo ko, hanji oru, chibwe kaliki, hanji mahina a ndando yinji.

¹⁰ Alioze alinge yitanga yibema, ngwe chize chaatamba kulinga mapwo waze akuwayila Zambi.

¹¹ Muze mapwo analilongesa chaatamba kuhola ni kuzeyela.

¹² Chatayijile pwo kulongesa chibwe kuyula lunga, alioze ahole.

¹³ Mumu Zambi yahanga kutanga Samutu, mba yatanga Namutu.

¹⁴ Mumu kapela kongele ko lunga alioze yonga pwo, mba mwe pwo yashiha Shimbi ya Zambi.

¹⁵ Alioze pwo, Zambi makamulamwina mu kusema ana, nyi manyongonona mu ufulielo, ni zango, ni kulinanga, ni uhomboloji.