1 Timoteu 1 - Mukanda Wa Zambi 1970

Kumeneka

^1-2 Yami Paulu, ngunakusonekena yena Timoteu, mwanami wamwenemwene mu ufulielo. Zambi Chilamwina chetu ni Kristu Yesu, yoze twakusa mbunge, hanangwehe Shimbi ha kubwa kanganda. Tata Zambi ni Mwene wetu Kristu Yesu, akulweze utu ni keke, ni akwehe uhwimino.

Kutoweza hakutwala ku longeso lia mahuza

³ Ngunazange usale mu limbo lia Efesu ngwe chize nakwambile nawa hatangu muze nayile ku chifuchi cha Masedonia. Atu akwo kuze kaakulongesa longeso lia mahuza. Chakutamba kwakanjisa.

⁴ Alweze ngwe, alitwamine kulongesa atu yishima yo ya mahuza ni kuvulwoka majina anji a tushakulu two. Mumu yuma ngwe yino yakuneha pami jamokomoko. Yuma yino kuyishi kutunyingikisa manyonga a Zambi, waze tunanyingika ku ufulielo.

⁵ Ngunazange atu alinge chino ngwami abwe ni zango lize liakutuhuka mu mbunge yitoma, ni ku manyonga abema, ni ku ufulielo wamwenemwene.

⁶ Atu akwo keeshi kukaula yuma yino, haanatokesa jila mu kuhanjika yuma yamokomoko.

⁷ Kaakuzanga kubwa alongeshi a Shimbi ja Zambi, alioze keeshi kunyingika yize akwamba, chibwe yize akushindakenya ni tachi.

⁸ Tunanyingika ngwetu, Shimbi jili jibema nyi atu kaakulinga najo ngwe chinalite.

⁹ Chatutamba kunyingika ngwetu, Zambi kahanyine ko Shimbi mumu hali akwa ululi, alioze mumu hali atu wano: akwa kukolema Shimbi, ni yihulia, ni waze kaanyingikine Zambi, ni yivulumunyi, ni waze keeshi kufuliela ni keeshi kulemesa yuma ya Zambi, ni waze akushiha atato ni anaye, ni waze akushiha atu akwo,

¹⁰ ni yitanji, ni akwa utumwa, ni akwa kukwata atu ha kuya ni kwalanjisa, ni akwa mahuza, ni akwa kulishinga ni mahuza, ni waze akulituna longeso liamwenemwene.

¹¹ Longeso lino linamoneka mu Sango Jibema jize angukunjikile, Sango Jibema jakutwala kuli Zambi ya uhenya ni ya kuwaha.

Kusakwila mumu ha keke ya Zambi

¹² Ngunasakwila Kristu Yesu Mwene wetu, yoze wangutakamishine ku milimo yino nakulinga. Ngunamusakwila mumu wangusele ha kumulingila, mumu wangumwene ngwenyi, ngunalite kuchilinga,

¹³ chibwe hatangu nabwile mukwa kushililika Zambi, mukwa kuhungumiona, ni mukwa kaleleso. Alioze Zambi yanguvwila keke, mumu te kanda nguchifuliela, ni te Chanyingikine chize nakulinga.

¹⁴ Mwene wetu hanangulweze utu wenyi wakulumbama, ni hanagwehe ufulielo ni zango lize tuli nalio mu kulinunga ni Kristu Yesu.

¹⁵ Liji lino liamwenemwene linatela kulitayiza Heswe ni kulifuliela ngwetu, Kristu Yesu haneza hano hashi ni kulamwina yivulumunyi. Hakachi ko yami nguli mubi Wahiana.

¹⁶ Alioze Zambi hananguvwila keke, hanga Kristu Yesu alweze uhumikizo wenyi muli yami, yami Chivulumunyi kuhiana eswe. Hingunabu chilweza kuli atu waze maakamufuliela hanga abwe ni mwono wa miaka yeswe.

¹⁷ Atu alemese ni kufumanyisa Zambi matangwa eswe. Kali mwanangana wa miaka yeswe, keshi kufwa, keshi kumoneka. Iye mwe Zambi wika. Chibwe kama Chenacho.

¹⁸ Mwanami Timoteu, ngunakwehe Shimbi yino. Yinalifu ni maliji waze ahanjikile akwa munanyi a Zambi hakutwala kuli yena. Maliji waze abwe ngwe uta wa kwasa nawo jita yibema.

¹⁹ Funga ufulielo ni manyonga abema. Atu akwo haanehuka manyonga abema. Kashika haanatokesa ufulielo wo.

²⁰ Mukachi ko kumuli Himine ni Alexandre, waze nakunjikile kuli Sakwonga, hanga alilongese kulitwamina kushililika Zambi.