1 Tesalonika 5 - Mukanda Wa Zambi 1970

¹ Akwetu, kuchalitele kunusonekena hakutwala ku miaka ni mashimbu muze yuma yize muyibwa ko.

² Mumu yenwene nunanyingika kanawa ngwenu, Tangwa lia Mwene Yesu mulikeza ngwe mwiji ha ufuku.

³ Muze atu maakamba ngwo: “Tuli ni uhwimino, yuma yeswe yinawaha,” mba susumuku kwonona muchiza. Keechi kuhichika nichimwe. Muchibwa ngwe yikola ya kusema yize hiyakwata kafumbakaji.

⁴ Alioze yenu, akwetu, kunushi mu milima, ni Tangwa lize kuliahashile kunuheta ngwe mwiji.

⁵ Mumu yenu eswe nuli akwa pangu, nuli akwa mwalwa. Kutushi akwa ufuku chibwe akwa milima ka.

⁶ Kashika, kutwahashile kuya tulo ngwe atu akwo, alioze chatutamba kunongama ni kulimuka.

⁷ Atu kaakuya tulo ha ufuku, ni kaakuzengewa ha ufuku.

⁸ Alioze yetu tuli akwa mwalwa, chatutamba kulimuka. Bwenu ni ufulielo ni zango ngwe chize nwakubwa ni chikuto cha jita; ni Senu mbunge ku ulamwino ngwe chize nwakusa chifulu cha jita ku mutwe.

⁹ Mumu Zambi katuselele ko ku utenu, alioze hanga tuzuke ulamwino kuli Mwene wetu Yesu Kristu.

¹⁰ Mwenawo watufwilile hanga tubwe ni mwono hamwe nenyi, chibwe tuli ni mwono, chibwe hitwafwa, muze meza.

¹¹ Kashika litakamisenu, likolesenu ni akwenu, ngwe chize nwakulinga kulu.

Kushika

¹² Akwetu, tunaliumbu kuli yenu, nuse vumbi waze akuhondangana hakachi kenu, waze Mwene Yesu ahele yilemu ya kunusongwela ni kunukanyamisa.

¹³ Alemesenu kuhiana, azangenu, mumu ha milimo yo. Bwenu ni uhwimino hakachi kenu.

¹⁴ Akwetu, tunaliumbu kuli yenu ngwetu, towezenu yilumbuke, takamisenu alelu mu mbunge, kwasenu akwa ngwaza, lihumikizenu ni eswe.

¹⁵ Kanyamenu, mutu niumwe kanda ahilwisa yibi ku yibi, alioze matangwa eswe esekenu kulilinga yibema ni akwenu, ni kulingila atu eswe yibema.

¹⁶ Wahililenu matangwa eswe,

¹⁷ lembenu ni kulitwamina nichimwe,

¹⁸ sakwilenu ha yuma yeswe, mumu Chenacho Zambi akuzanga mu kulinunga chenu ni Kristu Yesu.

¹⁹ Kanda nukinda Mwiku wa Linanga.

²⁰ Kanda nulelesa longeso lia akwa munanyi a Zambi.

²¹ Esekenu yuma yeswe, kakaminyenu yize yibema.

²² Ehukenu yibi yeswe.

²³ Zambi, yoze wakuhana uhwimino, anupwise akwa kulinanga liakulu. Afunge mutu wenu mweswe, ni mbunge, ni mwono, ni mujimba uze kuushi chibeka, ha kwiza cha Mwene Yesu Kristu.

²⁴ Yoze wakunutambika makachimanununa, mumu kali mukwa kushishika.

²⁵ Akwetu, tulembelenu.

²⁶ Menekenu akwetu eswe ni mbeju ya kulinanga.

²⁷ Ngunanulembe, mu jina lia Mwene Yesu ngwami, tangenu mukanda uno kuli akwetu eswe.

²⁸ Mwene wetu Yesu Kristu anulweze utu wenyi.