1 Tesalonika 4 - Mukanda Wa Zambi 1970

Ndako yize azanga Zambi

¹ Hakusula akwetu, hinunalilongesa kuli yetu chize chanutamba kubemena ku meso ja Zambi. Chamwenemwene, hinwabema kulu. Alioze haliabwila tunaliumbu kuli yenu ni kunulembejeka mu jina lia Mwene Yesu ngwetu, hibemenu liakulu.

² Mumu nunanyingika Shimbi jize twanulongesele, ni chiyulo cha Mwene Yesu.

³ Uno we upale wa Zambi, hanga nubwe akwa kulinanga ni kulifunga ku utanji.

⁴ Mutu mweswe wa kuli yenu anyingike chize chamutamba kumbata pwo ni kulinanga ni ulemu weswe,

⁵ hi ni kulihana ko ku usolo Ubi, ngwe atu waze kaanyingikine Zambi.

⁶ Ha chikuma chino, niumwe kanda akalingila mukwo yibi, hanji kumulimuna. Hitwanwambulwila cho kulu, ni hitunatoweza nawa chikolo ngwetu, Mwene kumeza ni kumwesa lamba waze akulinga yuma ngwe yize.

⁷ Zambi katutambikile ko kulinga utanji, alioze hanga tubwe akwa kulinanga.

⁸ Kashika yoze malituna longeso lino, keshi kulituna mutu alioze Zambi, yoze wakumwaha Mwiku wenyi wa Linanga.

⁹ Kuchalitele kunusonekena hanga nuzange akwenu akwa kufuliela. Mumu Zambi hananulongesa chize chanutamba kulizanga ni akwenu.

¹⁰ Ni mwene, nwakuzanga akwenu eswe waze atwama mu chifuchi cheswe cha Masedonia. Alioze tunanulembe akwetu, nulizangenu kuhiana.

¹¹ Nweseke kubwa mu uhwimino, ni kutala yuma ya yenwene, ni kukilikita ni moko ja yenwene, ngwe chize twanwambile kulu,

¹² hanga nubwe ni vumbi ku meso ja waze hi akwa Kristu ko, ni hanga kunuchi kuhona nichimwe.

Kwiza cha Mwene Yesu

¹³ Akwetu, tunazange nunyingike umwenemwene hakutwala kuli waze haanafu, hanga kunuchi kwivwa yinyengo, ngwe atu waze keeshi kusa mbunge kuli Zambi.

¹⁴ Tunafuliela ngwetu, Yesu hanafu ni hanahinduka ku kufwa. Tunafuliela nawa ngwetu, Zambi makaneha hamwe ni Yesu waze afwile kulu te akumufuliela.

¹⁵ Tunanulweze hakutwala ku longeso lia Mwene Yesu ngwetu, yetu, waze mutukabwa ni mwono muze makeza Mwene Yesu, kutuchi katetekelela waze haanafu kulu.

¹⁶ Mumu Mwene Yesu iye mwene makahulumuka ni kukololoka ni liji lia Shimbi, ni liji lia kanganda ka mwilu wa lutwe, ni liji lia chitavwi cha Zambi. Mba waze afwile kulu, te afuliela Yesu, maakalianga kuhinduka.

¹⁷ Mba kunyima yetu, waze mutukabwa ni mwono ha matangwa waze, makatuzundula hamwe no mu malelwa mu kutakana ni Mwene Yesu mu tetela. Chenacho mutukabwa hamwe ni Mwene Yesu matangwa eswe.

¹⁸ Lilembejekenu ni akwenu ni maliji wano.