1 Tesalonika 3 - Mukanda Wa Zambi 1970

¹ Mba muze kutwahashile kulihumikiza nawa, yitubatula kusala ukawetu mu limbo lia Atene,

² nikunutumina Timoteu, mukwetu yoze wakulinga milimo ya Zambi hamwe ni yetu—milimo ya kwambujola Sango Jibema hakutwala kuli Kristu. Yitunutumina ye mu kunutakamisa ni kunukolesa mu ufulielo wenu,

³ hanga niumwe wa kuli yenu kechi kukokoloka mu yihungumiona yino. Nunanyingika yenwene ngwenu, yihungumiona yino yili upale wa Zambi hali yetu.

⁴ Mumu, muze twabwile hamwe ni yenu, twaliangile kunulweza ngwetu, maakatuhungumiona. Yenayo hiyamoneka. Nunachinyingika kanawa.

⁵ Kashika, muze te chahashile kulihumikiza, yingutuma Timoteu hanga akanyingike hakutwala ku ufulielo wenu. Yingwivwa woma ngwami, hanji Sakwonga hanweseka, mba milimo yetu muyibwa yamokomoko.

⁶ Alioze Timoteu muze anakakatuka kuli yenu, hahiluka kuli yetu. Hatwambulwila sango jibema ja ufulielo wenu ni zango lienu. Hatwambulwila nawa ngwenyi, nwakutwiwuluka ni manyonga abema matangwa eswe, ni nwakutuvwila usona wa kutumona ngwe chize yetu nawa twakunuvwila usona.

⁷ Ha chino mukachi ka lamba lietu heswe ni luyinda wetu mweswe, hanatulembejeka hakutwala kuli yenu akwetu. Ufulielo wenu hiunatulembejeka.

⁸ Haliabwila tuli ni mwono wamwenemwene, mumu nunamana nguu mu kulinunga ni Mwene Yesu.

⁹ Haliabwila twakusakwilila Zambi mumu hali yenu. Twakumusakwilila mumu ha uwahililo uze tuli nawo ku meso jenyi mumu hali yenu.

¹⁰ Ufuku ni mwala twakuliumba ni mbunge yeswe kuli iye, hanga atutayize kunumona nawa, ni kumanununa yize yinahono mu ufulielo wenu.

¹¹ Zambi kanda Tata yetu, ni Mwene wetu Yesu, alulike jila hanga tuhase kwiza kuli yenu.

¹² Mwene anukolesa kuzanga akwenu ni atu eswe kuhiana, ngwe chize twakunuzanga yetu.

¹³ Atakamise mbunge jenu hanga nubwe akwa kulinanga ni angunu ku meso ja Zambi kanda Tata yetu, muze Mwene wetu Yesu makeza hamwe ni atu jenyi eswe.