1 Tesalonika 2 - Mukanda Wa Zambi 1970

Milimo ya Paulu mu Tesalonika

¹ Akwetu, nunanyingika kanawa yenwene ngwenu, hi chamokomoko ko twanuhetele.

² Nunanyingika chize atuhungumionene kulu ku Filipu muze te kanda tuchinuheta. Alioze Zambi yatutakamisa ha kunwambujolela Sango jenyi Jibema, chibwe kuhamika chabwile chinji.

³ Mumu kutambika chize twakutambika atu, hi cha mahuza ko, chibwe cha manyonga abi, hanji cha kwonga.

⁴ Alioze twakuhanjika matangwa eswe ngwe chize akuzanga Zambi, mumu hanatutayiza ni hanatukunjika Sango jenyi Jibema. Kutushi kuzanga kubemena kuli atu, alioze kuli Zambi, yoze wakuhengula manyonga jetu.

⁵ Nunanyingika kanawa ngwenu, kutwahanjikile nilimwe tangwa ni maliji a ulembekese, chibwe maliji a lwahu wa mbongo. Zambi kali chela chetu.

⁶ Kutwafupile kuchichimieka cha mutu niumwe, chibwe cha yenu, hanji cha atu akwo,

⁷ muze te hitwahasa kubwa ni ulemu ngwe tunganda twa Kristu. Alioze muze twabwile ku mahienu, yitulinga ni mbunge ya uhomboloji ngwe mama yoze unalele ana jenyi kanawa.

⁸ Mumu ha zango lietu kuli yenu, yitunulongesa Sango Jibema ja kuli Zambi, yitulihana nawa yetwene. Twanuzangile chikolo.

⁹ Akwetu, nunewuluka kukilikita ni kuhondangana chetu. Yitulinga mwalwa ni ufuku hanga kutuchi kuhana yilemu kuli niumwe hakachi kenu muze twambujolele Sango Jibema.

¹⁰ Yenu nuli yela jetu, ni Zambi nawa, hakutwala ku ndako yetu hakachi kenu, akwa kufuliela. Ndako yetu yabwile yibema, ni ya ululi, ni kuyishi chibeka.

¹¹ Nunanyingika ngwe chize twanulingile mutu mweswe hakachi kenu, ngwe tata ni ana jenyi.

¹² Twanutakamishine, twanulembejekele, twaliumbile kuli yenu hanga nubwe ni ndako yibema ngwe chize azangile Zambi. Mwenawo wanutambikile ha kubwa ni Chihanda mu Wanangana wenyi ni kamwe ka uhenya wenyi.

¹³ Kutushi kulitwamina kusakwilila Zambi ha chikuma chino nawa, ngwetu, muze twanwambujolele liji lia Zambi, nwalivwile ni nwalitambwile, hi ngwe liji lia mutu ko, alioze ngwe chize liabwa, lie liji lia Zambi. Lienalio liakulinga muli yenu akwa kufuliela.

¹⁴ Akwetu, hinunamono lamba lizeliene amwene nawa Yikungulwila ya Zambi mu chifuchi cha Yudea, waze akulinunga ni Kristu Yesu. Akwa chifuchi chenu yaanuhungumiona ngwe chize Ayuda ahungumionene akwa Kristu a mu Yikungulwila ya mu Yudea.

¹⁵ Enoo ashihile Mwene Yesu ni akwa munanyi a Zambi, yaatuhungumiona nawa yetu. Keeshi kubemena kuli Zambi. Kaakulimika ni atu eswe.

¹⁶ Yaasa tachi kutukanjisa kulongesa liji lia ulamwino kuli waze hi Ayuda ko. Ngwe chino akuzalisa njongo ya milonga yo yize te akulinga matangwa eswe. Zambi kakwatenukina.

Usona wa Paulu wa kumona akwa Tesalonika

¹⁷ Alioze hakutwala kuli yetu, akwetu, chize kuze twalihandunwine ni yenu ha limwe shimbu, usona twanwivwilile, yitweseka kunumona. Kulihandununa chino hi cha mu mbunge ko, alioze cha mujimba wika.

¹⁸ Yituzanga kuhiluka ku mahienu. Yami Paulu, nesekele kuchilinga, hi chisuho chimuwika wika ko, alioze Sakwonga yatukwika.

¹⁹ Mumu yenu, hi atu akwo ko, yenu e twakusa mbunge. Nuli uwahililo wetu, nuli chawana cha kukumba chetu. Mutukalisamba hali yenu ku meso ja Mwene wetu Yesu muze makeza.

²⁰ Chamwenemwene nuli uhenya wetu ni uwahililo wetu.