1 Tesalonika 1 - Mukanda Wa Zambi 1970

Kumeneka

¹ Yami Paulu, ni Sila, ni Timoteu, tunanusonekena yenu akwa Chikungulwila cha mu limbo lia Tesalonika, atu ja Zambi ni ja Mwene Yesu Kristu. Ngwetu, Zambi anulweze utu, ni anwehe uhwimino.

Ndako ni ufulielo ya akwa Tesalonika

² Twakusakwila Zambi matangwa eswe mumu hali yenu eswe, nikunuvulwoka mu yilemba yetu.

³ Twakunwiwuluka ku meso ja Zambi Tata yetu chize nwakulinga nikulita ni ufulielo wenu, ni chize nwakuhondangana mumu ha zango lienu, ni chize nwakulihumikiza nikusa mbunge kuli Mwene wetu Yesu Kristu.

⁴ Akwetu, tunanyingika ngwetu, Zambi kakunuzanga, ni hananutongola kubwa nienyi.

⁵ Mumu twanwambujolele Sango Jibema, hi ni maliji wika ko, alioze ni tachi, ni chiyulo cha Mwiku wa Linanga, nikunyingika pundu ngwetu, kaali maliji amwenemwene. Nunanyingika chize twabwile hakachi kenu ha kunuwahisa.

⁶ Hinunembulula chilweza chetu ni chize cha Mwene Yesu. Chibwe nwamwene lamba linji, hindu nwatambwile maliji a Zambi ni uwahililo uze Mwiku wa Linanga akuhana.

⁷ Kashika hinunalumuka chilweza cha akwa kufuliela eswe a mu yifuchi ya Masedonia ni Gresia.

⁸ Mumu liji hakutwala kuli Mwene Yesu hinunalinyingikisa lio, hi ku Masedonia ni Gresia wika ko, alioze sango ja ufulielo wenu hakutwala kuli Zambi hijinamwangana; atu keechi kufupa nawa ha kujivwa.

⁹ Eswe kaakwambulula chize nwatutambwile muze twanuhetele. Kaakwambulula nawa chize hinunehuka mahamba ni kutewuluka kuli Zambi, mu kulingila Zambi ya mwono ni yamwenemwene,

¹⁰ ni ha kushimbwila kuhulumuka cha Mwanenyi Yesu mwilu—Zambi wamuhindwishile ku kufwa. Mwe Yesu mwe unatupulula ku utenu wa Zambi uze muwiza ho.