1 Sango Ja Mianangana 9 - Mukanda Wa Zambi 1970

Atu waze akatukile mu undungo

¹ Aisraele eswe Yaalula nikulita ni majiko jo, yaasoneka mu Mukanda wa Mianangana ja Israele. Ayuda te haanatwala mu undungo ku Babilone ha kwamwesa lamba mumu ha milonga yo.

² Atangu kuhiluka ku membo jo mu Israele mahako, ni Alevi, ni waze akulingila ku zuwo lia Zambi, ni atu akwo.

³ Atu a ku mavungu ja Yuda, ni Benjamine, ni Efraime, ni Manase yaaya ni kutwama mu limbo lia Yerusaleme.

^4-6 Majiko ja vungu lia Yuda waze te atwama mu Yerusaleme kwoka cho 690. Mwata wa vungu lia Pereze, mwana wa Yuda, te Utai, mwana wa Amihude mujikulu wa Omri. Tushakulu twenyi akwo te Imri ni Bani. Mwata wa vungu lia Shela, mwana wa Yuda, te Asaya. Mwe wabwile mukwa lutwe wa jiko lienyi. Mwata wa vungu lia Zera, mwana wa Yuda, te Jewele.

^7-8 Atu wano a ku vungu lia Benjamine te atwama mu limbo lia Yerusaleme: Salu mwana wa Meshulame, mwana wa Hodavia, mwana wa Hasenua, ni Ibneya mwana wa Jerohame ni Ela, mwana wa Uzi mujikulu Mikri ni Meshulame mwana wa Shefatia, mwana wa Rewele, mwana wa Ibnija.

⁹ Majiko a vungu lize eswe waze te atwama ko 956. Malunga wano eswe abwile akwa lutwe ja majiko jo.

Mahako waze atwama mu Yerusaleme

^10-12 Wano e mahako te atwama mu limbo lia Yerusaleme: Jedaya, ni Jehoyaribe, ni Jakine, ni Azaria mwana wa Hilkia (te mwe mukwa lutwe wa mu zuwo lia Zambi), tushakulu twenyi te Meshulame, ni Zadoke, ni Merayote, ni Ahitube, ni Adaya mwana wa Jerohame, tushakulu twenyi te Pashure ni Malkija, Masai mwana wa Adiele, tushakulu two te Jazera, ni Meshulame, Meshilemite, ni Imere.

¹³ Mahako waze te abwile akwa lutwe ja majiko kwoka cho te 1,760. Wano eswe te akwa mana ha kulinga milimo yeswe ya mu zuwo lia Zambi.

Alevi waze atwama mu Yerusaleme

^14-16 Alevi wano te atwama mu limbo lia Yerusaleme: Shemaya mwana wa Hashube, tushakulu twenyi te Azrikame ni Hashabia, a ku jimo lia Merari, ni Bakbakare, ni Hereshe, ni Galale, ni Matania mwana wa Mika, tushakulu twenyi Zikri ni Asafe ni Obadia mwana wa Shemaya, tushakulu twenyi te Galale ni Jedutune ni Berekia mwana wa Asa, mujikulu wa Elkana, yoze te watwama mu chifuchi chize mwatwama limbo lia Netofa.

Tufunga twa zuwo lia Zambi a mu Yerusaleme

¹⁷ Tufunga twa zuwo lia Zambi waze te atwama mu limbo lia Yerusaleme wano: Shalume, ni Akube, ni Talmone, ni Ahimane. Mwata wa Shalume.

¹⁸ Ndoo ku matangwa waze akwa majimo jo yaafunga chikolo cha Mwanangana cha ku chivumbuko. Hatangu te kaakufunga yikolo ya musumba wa Alevi.

¹⁹ Shalume, mwana wa Kore, mujikulu wa Ebiasafe, hamwe ni usoko wenyi a ku jimo lia Kora, yaafunga chikolo cha zuwo lia Zambi lia makubu, ngwe chize te akulinga tushakulu two waze abwile tufunga twa musumba wa Mwene Zambi.

²⁰ Finehase mwana wa Eleazare, Mwene Zambi abwe hamwe nenyi, mwenawo te mwata wo ha matangwa waze.

²¹ Zakaria mwana wa Meshelemia neye te kafunga wa ku chikolo cha zuwo lia Zambi.

²² Tufunga twa yikolo eswe kwoka atu waze atongwele kubwa tufunga ku unjililo ni ku yikolo. Yaasoneka nikulita ni yihunda yize te atwama. Mwanangana David ni mukwa munanyi wa Zambi Samuel eno asele tushakulu two mu milimo yize.

²³ Ayo ni lie vungu lio te kaakufunga yikolo ya zuwo lia Zambi.

²⁴ Kwabwile chikolo sali ni sali, ku norde, ni ku sude, ni ku chivumbuko, ni ku chitokelo. Ku chikolo ni chikolo yikubwa mwata wa tufunga.

²⁵ Tufunga wano te kaakwakwasa kuli usoko wo, waze atwama mu yihunda, kaakwiza ni kwakwasa ha matangwa shimbiali.

²⁶ Miata awana a tufunga te Alevi, eno akwayula. Ayo nawa te akufunga yibatulo ya mu zuwo lia Zambi.

²⁷ Te kaatwama hehi ni zuwo lia Zambi, mumu milimo yo yakulifunga ni kwazujola yikolo ha chichamene cheswe.

Alevi akwo

²⁸ Alevi akwo yaafunga yikashi ya uwayilo ya mu zuwo lia Zambi. Te kaakuyituhwisa ni ku yinjisa nawa muze haalinga nayo.

²⁹ Akwo te kaakufunga yikashi yikwo ya uwayilo, ni wunga, ni vinyu, ni maji ja olive, ni yuma ya vumba libema, ni mbuto.

³⁰ Alioze milimo ya kuchinga chinga mbuto te ya mbala ya mahako.

³¹ Umwe Kalevi jina lienyi Matitia, mwana mutangu wa Shalume, wa ku jimo lia Kora, mwenawo te wakwocha mbolo ya milambu.

³² Akwa jimo lia Kohate eno te akwocha mbolo ya kutumbieka mu zuwo lia Zambi ha tangwa heswe lia kuhwima.

³³ Amwe Alevi akwo te e njimba. Akwa lutwe ja majiko waze te kaatwama mu amwe mazuwo a mu zuwo lia Zambi. Kaalingile ko milimo yikwo, mumu te kaakwatambika mwalwa ni ufuku.

³⁴ Malunga waze te akwa lutwe ja majiko ja Alevi nikulita ni yisemuko yo. Eno abwile miata waze te atwama mu Yerusaleme.

Tushakulu ni mavungu ja mwanangana Saulu

³⁵ Jehiele mwe watungile limbo lia Gibeone, yatwama mo. Pwo lienyi Maka.

³⁶ Mwanenyi mutangu Abdone. Ana jenyi akwo a malunga wano: Zure, ni Kishi, ni Bale, ni Nere, ni Nadabe,

³⁷ ni Gedore, ni Ahio, ni Zakaria, ni Miklote,

³⁸ mwe tato ya Shimea. Vungu lio te kaatwama mu Yerusaleme hehi ni majiko a jimo lio.

³⁹ Nere mwe wasemene Kishi, Kishi yasema Saulu. Saulu yasema ana a malunga wano: Jonatane, ni Malkishua, ni Abinadabe, ni Eshbale.

⁴⁰ Jonatane yasema Meribale, te mwe tato ya Mika.

⁴¹ Ana ja Mika a malunga wano: Pitone, ni Meleke, ni Tarea, ni Ahaze.

⁴² Ahaze yasema Jara, ana ja Jara a malunga wano: Alemete, ni Azmave, ni Zimri. Zimri yasema Moza,

⁴³ Moza yasema Binea, Binea yasema Rafaya, Rafaya yasema Eleasa, Eleasa yasema Azele.

⁴⁴ Ana ja Azele a malunga wano: Azrikame, ni Bokeru, ni Ishmaele, ni Shearia, ni Obadia, ni Hanane.