1 Sango Ja Mianangana 5 - Mukanda Wa Zambi 1970

Vungu lia Rubene

¹ Lino lie vungu lia Rubene, mwana mutangu wa lunga wa Yakoba. (Yatokesa chihinga chenyi mumu yalimona ni pwo lia tato, mba tato yahana chihinga chize kuli Josefe.

² Alioze vungu lia Yuda, yaabwa ni tachi kuhiana, ni mukwa kuyula mavungu akwo eswe yaakatuka kuli ayo.)

³ Rubene yasema ana a malunga wano: Hanoke, ni Palu, ni Hezrone, ni Karmi.

^4-6 Vungu lia Joele lino: Shemaya, ni Goge, ni Shimei, ni Mika, ni Reaya, ni Bale, ni Bera. Mwanangana wa, Asuria, Tiglate Pilesere, yakwata Bera, umwe mwata wa lie vungu, yamutwala mu undungo.

⁷ Nikulita ni mikanda ya majiko, miata ja majimo a vungu lia Rubene wano: Jeyele ni Zakaria,

⁸ ni Bela, mwana wa Azaze mwana wa Shema wa ku jimo lia Joele. Akwa jimo lino te kaatwama mu limbo lia Aroere ni mu chifuchi chize chinasulangana ni kuya ku norde ndoo ku Nebo ni Bale Meone.

⁹ Yaabwa ni yimuna anji mu chifuchi cha Gileade. Kashika yaatwama mu chifuchi chize chinayi ku chivumbuko ndoo ku puya yize yinahete ku lwiji Ufrateze.

¹⁰ Ha matangwa ja mwanangana Saulu, Arubene yaasa jita ni akwa Hagri, yaashiha, yaazuka chifuchi cho ku chivumbuko cha Gileade.

Vungu lia Gade

¹¹ Vungu lia Gade te kaatwama ku norde lia vungu lia Rubene mu chifuchi cha Bashane ku chivumbuko ndoo ku limbo lia Saleka.

¹² Joele mwe wabwile mukwa lutwe wa jimo litangu, ni Shafame wa jimo lia muchaali. Janai ni Shafate eno abwile akwa lutwe a majimo akwo mu chifuchi cha Bashane.

¹³ Majimo akwo a ku vungu lia Gade wano: Mikele, ni Meshulame, ni Sheba, ni Jorai, ni Jakane, ni Zia, ni Ebere.

¹⁴ Wano e abwile ana ja Abihaile a malunga mwana wa Huri, mwana wa Jaroa, mwana wa Gileade, mwana wa Mikele, mwana wa Jeshishai, mwana wa Jado, mwana wa Buze.

¹⁵ Mwana wa Ahi, mwana wa Abdiele, mwana wa Guni, mwe wabwile mukwa lutwe wa majimo

¹⁶ Te kaatwama mu chifuchi cha Bashane ni cha Gileade, ni mu membo jako ni ku ulishilo wa Sharone. (

¹⁷ Sango jino yaajilulika ha matangwa ja Jotame mwanangana wa Yuda ni Jeroboame mwanangana wa Israele.)

Tujita a ku mavungu a ku chivumbuko

¹⁸ Mu mavungu ja Rubene, ni Gade, ni Chipinji cha Manase a ku chivumbuko cha Yordau kwoka cha tujita two te 44,760, te kaakwasa jita kanawa ni kebwe, ni mikwale, ni mata a kwasa.

¹⁹ No yaasa jita ni mavungu ja Hagri: Jeture, ni Nafishe, ni Nodabe.

²⁰ Yaashachila hali Mwene Zambi, yaamulemba ha kwakwasa, ni Zambi yakumbulula ku yilemba yo, yaakwasa kukumba Ahagri ni eswe waze abwile hamwe no.

²¹ Yaabuba tumelu 50,000, ni mapanga 250,000, ni yimbulu 2,000. Yaakwata funge mu jita 100,000.

²² Yaashiha akwa kole jo anji, mumu Zambi yaashila jita. Yaaya ni kutwama mu chifuchi chize ndoo ku mwaka uze akwa kole atwalile mu undungo.

Chipinji cha Manase ku chivumbuko

²³ Chipinji cha Manase ku chivumbuko cha Yordau yaatwama mu chifuchi cha Bashane ku Bale Hermone, ni Senire, ni mulundu wa Hermone. Atu jo yooka kuhiana.

²⁴ E miata ja majimo jo: Efere, ni Ishi, ni Eliele, ni Azriele, ni Jeremia, ni Hodavia, ni Jadiele. Wano eswe te tujita a tachi, ni miata a lufuma mu majimo jo.

Mavungu a ku chivumbuko yaatwala mu undungo

²⁵ Alioze atu yaavulumuna Zambi ya tushakulu two, yaamwehuka, yaawayila mazambi ja mavungu waze Zambi ahumine mu chifuchi.

²⁶ Kashika Zambi washinjikile Pule mwanangana wa Asuria (jina lienyi likwo Tiglate Pilesere) anjile mu chifuchi cho. Yaatwala mavungu ja Rubene, ni Gade, ni Chipinji cha Manase ndoo ku membo ja Hala, ni Habore, ni Hara, ni ku lwiji wa Gozane.