1 Sango Ja Mianangana 4 - Mukanda Wa Zambi 1970

Vungu lia Yuda

¹ Lino lie vungu lia Yuda: Pereze, ni Hezrone, ni Karmi, ni Hure, ni Shobale.

² Shobale yasema Reaya, Reaya yasema Jahate, Jahate yasema Ahumai ni Lahade, e tushakulu twa atu waze te atwama mu limbo lia Zora.

^3-4 Hure te mwana mutangu wa Efrata, pwo lia Kaleba. Vungu lienyi yaatunga limbo lia Betleheme. Ana ja Hure a malunga wano: Etame, ni Penuele, ni Ezere. Ana ja Etame a malunga wano: Jezrele, ni Ishma, ni Idbashe, ni wa pwo Hazeleponi. Penuele yatunga limbo lia Gedore, Ezere yatunga limbo lia Hushai.

⁵ Ashure, yoze watungile limbo lia Tekoa, yambata mapwo aali: Hela ni Nara.

⁶ Ashure yasema ni Nara ana a malunga wano: Ahuzame, ni Hefere, ni Temeni, ni Ahashtari.

⁷ Ashure yasema ni Hela ana a malunga wano: Zerete, ni Izare, ni Etnane.

⁸ Koze yasema Anube ni Zobeba, ni kashakulu ka majimo ja Chisemuko cha Aharhele, mwana wa Harume.

⁹ Kwabwile umwe lunga jina lienyi Jabeze, te mulemu hakachi ka akwa jiko leinyi. Naye yamuluka jina lino mumu kusemuka chenyi chabwile cha lamba.

¹⁰ Alioze Jabeze yalemba kuli Zambi ya Aisraele ngwenyi: “Zambi, nguwahise kama, ngwehe chifuchi chinene. Bwako hamwe ni yami, ngufunge ku Chuma cheswe chibi chize muchingukokela lamba.” Mba Zambi yamwaha chize echile.

Kwalula cha majiko akwo

¹¹ Kaleba, yayo ya Shuha, yabwa ni mwana wa lunga umuwika, jina lienyi Mehire. Mehire yasema Eshtone,

¹² Eshtone yasema ana a malunga wano: Betrafa, ni Pasea, ni Tehina. Tehina mwe watungile limbo lia Nahashe. Vungu lio te kaatwama mu Reka.

¹³ Ana ja Kenaze a malunga wano: Otniele ni Seraya. Ana ja Otniele a malunga wano: Hatate ni Meonatai.

¹⁴ Meonatai yasema Ofra. Seraya yasema Joabe. Mwenawo wabutwile homa haze akuvuluka ngwo: Chikulo cha Akwa Utotombo.

¹⁵ Kaleba mwana wa Jefune yasema ana a malunga wano: Iru, ni Ela, ni Name, Ela yasema Kenaze.

¹⁶ Ana ja Jehalelele a malunga wano: Zife, ni Zifa, ni Tiria, ni Asarele.

^17-18 Ana ja Ezra a malunga wano: Jetere, ni Merede, ni Efere, ni Jalone. Merede yambata Bitia, mwana wa mwanangana wa chifuchi cha Egiptu. No yaasema mwana wa pwo Miriame, ni ana aali a malunga: Shamai ni Ishba. Ishba mwe watungile limbo lia Eshtemoa. Merede yambata umwe pwo wa ku vungu lia Yuda. No yaasema ana a malunga wano: Jerede, mwe watungile limbo lia Gedore; ni Hebere, mwe watungile limbo lia Soko; ni Jekutiele, mwe watungile limbo lia Zanoa.

¹⁹ Hodia yambata ndumbu ya Nahame. Vungu lio limuwika lia Garmi, te kaatwama mu limbo lia Keila. Vungu likwo lia Makate, te kaatwama mu limbo lia Eshtemoa.

²⁰ Ana ja Shimone a malunga wano: Amone, ni Rina, ni Benhanane, ni Tilone. Ishi yasema ana a malunga wano: Zohete ni Benzohete.

Vungu lia Shela

²¹ Shela umwe wa kuli ana a malunga ja Yuda. Lunga umuwika wa ku vungu lienyi Ere, mwenawo watungile limbo lia Leka. Mukwo Lada, mwe watungile limbo lia Maresha. Akwa jimo likwo, te kaatwama mu limbo lia Bete Ashbea; milimo yo kutunga mahina alefuna.

²² Mukwo Jokime ni atu waze te atwama mu limbo lia Kozeba. Akwa Joashe ni Sarafe, yoze wambachile pwo wa ku Moabe, mba yaatwama mu limbo lia Betleheme. (Chisoneko chino chili chikulu.)

²³ Atu wano yaabwa tengi mu milimo ya mwanangana, te kaatwama mu membo ja Netaime ni Gedera.

Vungu lia Simeone

²⁴ Ana ja Simeone a malunga wano: Nemuele, ni Jamine, ni Jaribe, ni Zera, ni Shaule.

²⁵ Shaule yasema Shalume, Shalume yasema Mibsame, Mibsame yasema Mishma.

²⁶ Mba chize kuli Mishma ndoo kuli Hamuele, ni Zakure, ni Shimei.

²⁷ Shimei yasema ana a malunga kumi ni asambano ni a mapwo asambano, alioze usoko wenyi kaasemene ko ana anji, ni lie vungu lia Simeone kuliabwile ko ni ana anji ngwe vungu lia Yuda.

²⁸ Ndoo ku matangwa ja mwanangana David vungu lia Simeone te kaatwama mu membo wano: Bersheba, ni Molada, ni Hazarshuale,

²⁹ ni Bilha, ni Ezeme, ni Tolade,

³⁰ ni Betuele, ni Horma, ni Ziklage,

³¹ ni Bete Markabote, ni Hazarsusime, ni Bete Biri, ni Sharaime.

³² Te kaatwama nawa mu membo wano: Etame, ni Ayine, ni Rimone, ni Tochene, ni Ashane,

³³ ni yihunda ya kujingilika, ku sali lia sude ku chitokelo ndoo ku limbo lia Balate. Yino ye yisoneko ya majiko jo ni membo muze te atwama.

^34-39 Akwa lutwe a mu majimo jo wano: Meshobabe, ni Jamleke, ni Josha mwana wa Amazia, ni Joele, ni Jehu, (mwana wa Joshibia, mwana wa Seraya, mwana wa Asiele), ni Elionai, ni Yakoba, ni Jeshohaya, ni Asaya, ni Adiele, ni Jesimiele, ni Benaya, ni Ziza, (mwana wa Shifi, mwana wa Alone vungu lia Jedaya, ni Shimri, ni Shemaya). Yaalitanda kuhiana ndoo hehi ni limbo lia Gerare, mumu vungu lio yooka lume kuhiana, yaalishila yimuna yo ku sali lia chivumbuko lia chikulo cha limbo lize.

⁴⁰ Yaawana kelo jinji jibema mu chifuchi chize a kulishila yimuna, ni mu chifuchi yimubwa uhwimino. Atu waze abwile ko hatangu Ahame.

⁴¹ Ha matangwa ja mwanangana wa Yuda Hezekia, Asimeone yaaya ku Gerare, yoonona mazuwo akutunga ni makubu ni tufumbafumba twa atu waze atwama ko. Yaahanga mo e atu, yaatwama mo mumu kwabwile kelo jinji ja kulishila yimuna yo.

⁴² Asimeone akwo 500 yaaya ku chivumbuko ku chifuchi cha Edome. Miata jo te ana ja Ishi a malunga: Pelatia, ni Nearia, ni Refaya, ni Uziele.

⁴³ Yaashiha ko Aamaleke waze asalile ko, yaatwama ko ndoo ni musono.