1 Sango Ja Mianangana 21 - Mukanda Wa Zambi 1970

Mwanangana David yalula atu eswe

¹ Sakwonga yazanga kubinjisa Aisraele, kashika yashinjika mwanangana David hanga alule atu eswe.

² Mwanangana yambila mwata Joabe ni miata akwo ngwenyi: “Yeenu mu Israele, chize ku limbo lia Dane ku norde ndoo ku limbo lia Bersheba ku sude, nwalule atu. Ngunazange kunyingika kwoka cho.”

³ Alioze mwata Joabe yakumbulula ngwenyi: “Vulie mwanangana! Mwene Zambi awezele kama hali Aisraele kwoka cha atu yisuho kulakaji! Vulie mwanangana! Eswe kaali tuvumbi twenu. Alioze kuchi mba nunazange kulinga chino ni kukokela vungu lieswe uhiso?”

⁴ Hindu mwanangana yashinjika Joabe kuchilinga. Kashika Joabe yatuhuka, yendangena mu chifuchi cheswe cha Israele, mba yahiluka ku Yerusaleme.

⁵ Yalweza mwanangana David kwoka cha malunga waze maahasa kwasa jita: mu Israele 1,100,000, mu Yuda 470,000.

⁶ Joabe kalwile ko mavungu ja Levi ni Benjamine, mumu iye katayijile Shimbi ja mwanangana.

⁷ Zambi yevwa kubiha mumu ha kwalula chize, kashika yamwesa Aisraele lamba.

⁸ Mba mwanangana yaliondela kuli Zambi ngwenyi: “Navulumuna mulonga unene Wahiana muze nalinga Chuma chino! Nalemba ngukonekene kama, nalinga uhepuke.”

⁹ Mba Mwene Zambi yambila Gade, mukwa munanyi wa Zambi kanda wa David ngwenyi:

¹⁰ “Yako ulweze David ngwe, namwaha yuma yitatu, atongole cheswe chize mazanga. Mungulinga cheswacho matongola.”

¹¹ Mwe Gade yaya maha mwanangana, yamulweza chize Mwene Zambi ambile, mba yamuhula ngwenyi: “Chika unazange?

¹² Miaka yitatu ya zala? Hanji kuchina tujita twa akwa kole jenu, tukweji atatu? Hanji Mwene Zambi anubinjise matangwa atatu ni mukwale wenyi ni kunutumina chipuho chikalu mu chifuchi che kuli kanganda kenyi wa mwilu, ashihe atu mu chifuchi cheswe cha Israele? Ngulweze chize mungukumbulula kuli Mwene Zambi.”

¹³ Mwanangana ngwenyi: “Nguli ngwe, wakukasa! Alioze Chazangile angumwese lamba kuli atu. Chinalite angumwese lamba kuli Mwene Zambi iye mwene, mumu kali mukwa keke.”

¹⁴ Kashika Mwene Zambi yatuma chipuho chikalu hali Aisraele, yikufwa atu 70,000.

¹⁵ Hohene yatuma kanganda ka mwilu ashihe akwa Yerusaleme, alioze yalumuna mbunge yenyi, yambila mwe kanganda ngwenyi: “Litwamine! Hikwahwa!” Mwe kanganda te kanamana ku chizungwilo cha Arauna, mukwa Jebuse.

¹⁶ Mwanangana David yamona kanganda kanamana mu tetela, kanakwata mukwale, himashiha akwa Yerusaleme. Mwanangana ni miata ja Aisraele te haazala kulu mianji. No yaafulamana.

¹⁷ Mwanangana yalemba ngwenyi: “Aa Zambi, yami nalingile chibi. Yami nambile ngwami, alulenu atu. Mba wano atu ja mbala chika alinga kama? Mwene Zambi, Zambi yami, chinalite ungumwese yami lamba hamwe ni akwa jiko liami, lamwina kama atu je.”

¹⁸ Mwe kanganda ka mwilu yambila Gade alweze David hanga aye atungile Mwene Zambi chilumbilo ha chizungwilo cha Arauna.

¹⁹ Mwanangana yononoka ku liji lia Mwene Zambi, yaya ngwe chize amulwezele kuli Gade.

²⁰ Arauna ni ana jenyi awana a malunga te kaanazungula mbuto ku chizungwilo. Muze ana jenyi haamona mwe kanganda ka mwilu, yaachina, yaaswama.

²¹ Muze Arauna hamona mwanangana kaneza, yahichika chizungwilo, yafulamana.

²² Mwanangana yamwamba ngwenyi: “Ngulanjise chizungwilo che, ngutunge ho chilumbilo cha Mwene Zambi, mba hanga chipuho chino chihwe kama. Mungukwaha ndando yize yinalite.”

²³ Araune yakumbulula ngwenyi: “Vulie mwanangana! Chitambulenu, lingenu cheswacho nunazange. Ngombe a mulambu wa kwocha ha chilumbilo wano. Mabaya a chizungwilo wano je kunyi. Tiriku yino we mulambu. Yeswe nanwaha yo yamokomoko.”

²⁴ Alioze mwanangana yamukumbulula ngwenyi: “Hi chocho ko, munguyilanda. Chichi kulambula nichimwe kuli Mwene Zambi chize niche, chize kuchafwikile ndando.”

²⁵ Mba yafweta Araune mbongo ja oru 600 mumu ha chizungwilo.

²⁶ Yatunga ko chilumbilo cha Mwene Zambi, yalambula ho milambu ya kwocha ni ya kulivwa ni Zambi. Yalemba, mba Mwene Zambi yakumbulula ni kumutumina kahia ka mwilu ni kwocha ye milambu ha chilumbilo.

²⁷ Mwene Zambi yambila kanganda ka mwilu ngwenyi: “Tomeka mukwale we.” Kanganda yachilinga.

²⁸ Mwanangana David yamona ngwenyi, Mwene Zambi hakumbulula kulemba chenyi, mba yalambula milambu ha chilumbilo cha ha chizungwilo cha Araune.

²⁹ Ha matangwa waze zuwo lia Zambi lia makubu lize Mose atungile mu puya, ni chilumbilo haze te akulambwila milambu te yili ku limbo lia Gibeone, homa ha kuwayila.

³⁰ Alioze mwanangana David kazangile ko kuya ko ni kuwayila Mwene Zambi, mumu te woma anevu wa mukwale wa kanganda ka mwilu ka Mwene Zambi.