1 Sango Ja Mianangana 16 - Mukanda Wa Zambi 1970

¹ No yaaneha we mushete wa Usendo mu zuwo lia makubu lize mwanangana David autungilile, yaausa mo. Mba yaalambula Zambi milambu ya kwocha ni milambu ya kulivwa nenyi.

² Muze mwanangana hamanununa kulambula ye milambu, yawahisa atu mu jina lia Mwene Zambi,

³ mba yaatetela eswe yakulia. Mutu mweswe lunga ni pwo mu Israele yamwaha mbolo yimuwika yimuwika, ni tumba ya yifwo ya kwo cha, ni chindanda cha vinyu yumu.

⁴ Mwanangana yatongola amwe Alevi kubwa akwa lutwe muze maawayila Mwene Zambi, Zambi ya Aisraele, kulutwe lia mushete wa Usendo, ni kwimba ni kumuchichimieka.

⁵ Asafe mwe mukwa lutwe, chikwashi chenyi te Zakaria. Akwa kwimba tulialia wano: Jehiele, ni Shemiramote, ni Jehiele, ni Matitia, ni Eliabe, ni Benaya, ni Obede Edome, ni Jehiele. Asafe te mukwa kwimba yifwolo.

⁶ Mahako Benaya ni Jahaziele, te akwa kwimba yitavwi kulutwe lia mushete wa Usendo.

⁷ Mba ha tangwa lize mwanangana yaaha Asafe ni usoko wenyi Alevi milimo ya kwimba miaso ya kuchichimieka nayo Mwene Zambi.

Mwaso wa kuchichimieka nawo Mwene Zambi

⁸ Sakwililenu Mwene Zambi, mufumanyisenu, lwezenu mavungu yitanga yenyi.

⁹ Mwimbilenu Mwene Zambi ni kumuchichimieka, ambululenu yuma ya kukomwesa yize hanalingi,

¹⁰ Tuwahililenu mumu tuli nienyi; Eswe waze akumuwayila awahilile!

¹¹ Kundamenu kuli Mwene Zambi hanga atukwase, tumuwayilenu matangwa eswe.

^12-13 Yenu vungu lia Yakoba, kavumbi ka Mwene Zambi, yenu vungu lia Israele, waze atongwele Zambi, iwulukenu yilayi yize Zambi hanalingi ni chize abatwilile atu.

¹⁴ Mwene Zambi kali Zambi yetu Shimbi jenyi jili ja akwa hashi eswe.

¹⁵ Kanda nuvulama nichimwe Usendo wa Zambi, uze akolesele ndoo ku miaka yeswe,

¹⁶ Usendo uze akolesele ni Abrahama, chilakenyo chize alakenyene kuli Isake.

¹⁷ Mwene Zambi yakolesa Usendo ni Yakoba, uze muulinduluka ku miaka yeswe.

¹⁸ Ngwenyi: “Mungukakwaha chifuchi cha Kanana, muchikabwa chihinga che.”

¹⁹ Atu ja Zambi te achili akepe, te njize mu chifuchi cha Kanana.

²⁰ Yaatutujoka ku chifuchi ni chifuchi, chize ku chifuchi chimwe ndoo ku chifuchi chikwo.

²¹ Alioze Zambi katayijile ko niumwe kwahungumiona, yakanyamisa mianangana ngwenyi:

²² “Kanda nulinga chibi tuvumbi twami waze natongwele, kanda numwesa akwa munanyi jami lamba!”

²³ Mwimbilenu Mwene Zambi, akwa hashi eswe! Matangwa eswe ambujolenu sango jibema ngwenu, hatulamwina!

²⁴ Lumbununenu uhenya wenyi kuli mavungu, ni yitanga yenyi ya kukomwesa.

²⁵ Mwene Zambi kali munene, atu chaatamba kumuchichimieka kuhiana, chaatamba kumulemesa kuhiana mazambi akwo eswe.

²⁶ Mazambi ja mavungu akwo kaali lume mahamba, alioze Mwene Zambi mwe watangile lilu.

²⁷ Mwene Zambi kali ni uhenya ni ulamba, ndundo ni uwahililo yili mu zuwo lienyi.

²⁸ Yenu akwa hashi eswe fumanyisenu Mwene Zambi, fumanyisenu uhenya wenyi ni ndundo jenyi.

²⁹ Fumanyisenu jina lia Mwene Zambi; nehenu milambu yenu mu zuwo lienyi. Wayilenu Zambi Munangi muze masoloka;

³⁰ Chikimenu ku meso jenyi, akwa hashi eswe! Hanakolesa hashi, kuhahashile kunyika.

³¹ Lilu ni hashi wahililenu! Ambulwilenu mavungu ngwenu: “Mwene Zambi mwe mwanangana!”

³² Kalunga lwiji ni yeswe yize yilimo kololokenu; minda ni yeswe yize yilimo wahililenu!

³³ Mitondo yeswe ya mu mushitu kololokenu ni uwahililo ku meso ja Mwene Zambi, muze meza ni kuyula hashi.

³⁴ Sakwililenu Mwene Zambi, mumu kali mubema; zango lienyi kulishi kuhwa nichimwe.

³⁵ Ambenu ngwenu: “Aa, Zambi, Chilamwina chetu, tulamwine; tukungulule hamuwika; tupulule kuli akwa mavungu, hanga tukusakwilile ni kufumanyisa jina lie lia linanga.”

³⁶ Chichimiekenu Mwene Zambi, Zambi ya Aisraele! Muchichimiekenu chize musono ndoo ku miaka yeswe! Mba atu eswe yaamba ngwo: “Chibwe kama Chenacho.” Yaahalisa Mwene Zambi.

Kuwayila ku Yerusaleme ni ku Gibeone

³⁷ Mwanangana David yasa Asafe ni usoko wenyi Alevi ku milimo ya kuwayila kulutwe lia mushete wa Usendo wa Zambi ni atu. Yaalingalinga ko milimo yo tangwa ha tangwa.

³⁸ Obede Edome, mwana wa Jedutune, ni malunga makumi asambano a ku jimo lienyi enoo te akwakwasa. Hosa ni Obede Edome enoo te akufunga yikolo.

³⁹ Alioze hako Zadoke ni usoko wenyi mahako akwo, yaabwa ni milimo ya kuwayila Mwene Zambi mu limbo lia Gibeone.

⁴⁰ Chichamene ni chingoloshi cheswe te kaakwocha milambu liakulu ha chilumbilo nikulita ni chize chasonewene mu Shimbi jize Mwene Zambi ahanyine kuli Aisraele.

⁴¹ Yikubwa nawa Hemane ni Jedutune ni amwe akwo waze atongwele ku milimo ya kwimba ni kuchichimieka Mwene Zambi mumu ha zango lienyi lize kulishi kuhwa nichimwe.

⁴² Hemane ni Jedutune yaaha nawa milimo ya kwimba yitavwi ni yifwolo ni yisaji yikwo yize te akulinga nayo muze anembi miaso ya kuchichimieka nayo Zambi. Mbunga a ku jimo lia Jedutune yaaha milimo ya kufunga yikolo.

⁴³ Mba mutu ni mutu yaya ku mahienyi; mwanangana neye yaya ku mahienyi hanga ate pande ni akwa jiko lienyi.