1 Sango Ja Mianangana 13 - Mukanda Wa Zambi 1970

David yaya ni kwanda mushete wa Usendo

¹ Mwanangana David yalikungulula ni miata ja mbunga ja 1,000 ni ja 100.

² Mba yalweza Aisraele eswe ngwenyi: “Nyi chinanubemena, nawa nyi chinalite ni upale wa Mwene Zambi, Zambi yetu, tutumenu tunganda kuli usoko wetu waze asala mu chifuchi ni kuli mahako ni Alevi mu membo jo, hanga eze alikungulule hamwe ni yetu.

³ Mba tunehe mushete wa Usendo wa Zambi ni atu, uze twalelesele ha matangwa ja mwanangana Saulu.”

⁴ Chikungulwila cheswe yaatayiza, yichaabemena.

⁵ Kashika mwanangana David yakungulula Aisraele a ku chifuchi cheswe, chize ku njiza ya Egiptu ku sude ndoo ku jila Hamate mukachi ka milundu ku norde, aakande mushete wa Usendo ku Kiriate Jearim ni kuuneha ku Yerusaleme.

⁶ Mwanangana ni atu yaaya ku limbo lia Bala, jina likwo Kiriate Jearime, mu chifuchi cha Yuda, akunehe mushete wa Usendo uze ukwete jina lia Mwene Zambi yoze watwama mukachi ka akwa mwono a mwilu.

⁷ Yaachiza mushete wa Usendo ku zuwo lia Abinadabe yaausa ha temba haha. Uza ni Ahio yeendesa lie temba,

⁸ mwanangana ni atu eswe yaahangana chikolo ni kufumanyisa Zambi. Yeemba miaso ni tulialia, ni mikupiela, ni yifwolo, ni yitavwi.

⁹ Muze haaheta ku chizungwilo cha Kidone, ngombe yaatalinga. Mba Uza yakwata ku mushete wa Usendo.

¹⁰ Hazehene Mwene Zambi yatenukina Uza, yamushiha mumu hakwata ku mushete. Yafwa lume hazehene ku meso ja Mwene Zambi.

¹¹ Kashika mwanangana David yaluka ho jina ngwenyi: Ubatwilo wa Uza, yevwa wuli mumu Mwene Zambi hashiha Uza.

¹² Mwanangana yevwila Zambi woma, yamba ngwenyi: “Lwangu mama! Ngwe kuchi munguhasa kuya ni we mushete wa Usendo haliabwila?”

¹³ Kashika hikatwalile ko nawa mushete ku Yerusaleme. Alioze yauhichika ku zuwo lia umwe mutu Obede Edome, wa ku limbo lia Gate.

¹⁴ Mushete yiutwama ko tukweji atatu, mba Mwene Zambi yawahisa akwa jiko lia Obede Edome ni yuma yenyi yeswe.