1 Sango Ja Mianangana 12 - Mukanda Wa Zambi 1970

Abenjamine waze aliangile kukaula mwanangana David

^1-2 Muze te David ali mu limbo lia Ziklage, kuze achinyinyine mwanangana Saulu, tujita a hamu anji a ku vungu lia Benjamine, usoko wa Saulu, akungulukile kuli iye. Te kaakwasa mivwi ni mawe chibwe ni kwoko lia chindume chibwe ni lia chimeso.

^3-7 Miata jo Abiezere ni Joashe, ana ja Shema, a ku limbo lia Gibea. Tujita te wano: Jeziele ni Pelete, ana ja Azmavete; Beraka ni Jehu a ku Anatote; Ishmaya wa ku Gibeone, te kajita wa lufuma, umwe mwata wa mukachi ka “Tujita Makumi Atatu;” Jeremia, ni Jaziele, ni Johanane, ni Jozabade a ku Gedera; Eluzai, ni Jerimote, ni Bealia, ni Shemaria, ni Shefatia a ku Harife; Joela, ni Zebadia, ana ja Jerohame, a ku Gedore.

Agade waze akawile David

⁸ Wano e majina ja tujita a hamu a lufuma a ku vungu lia Gade, waze alichingile ni mbunga ya tujita twa David homa lienyi haze te akuswama mu puya. Te akwa mana ha kwasa jita ni kebwe ni makunga, kumoneka cho ngwe tambwe, tambu lio ngwe kai ha milundu.

^9-13 Yaalilonga ngwe chino: Ezere, ni Obadia, ni Eliabe, ni Mishmana, ni Jeremia, ni Atai, ni Eliele, ni Johanane, ni Elzabade, ni Jeremia, ni Makbanai.

¹⁴ Amwe a kuli malunga wano a ku vungu lia Gade te miata ja mbunga ya tujita 1,000, akwo miata ja mbunga ya 100.

¹⁵ Ha kakweji mutangu wa mwaka, ha matangwa waze Yordau akuzala meya ni kusupwoka, yaazauka, yaahuma atu waze te atwama mu chikulo ku chivumbuko ni ku chitokelo cha lwiji.

Abenjamine ni Ayuda waze akawile David

¹⁶ Limwe tangwa mbunga ya Abenjamine ni Ayuda yaaya kuli David kuma kuze kwakukoleka mu puya.

¹⁷ David yaya ni kwabatwiza, yaamba ngwenyi: “Nyi nuneza kuli yetu ngwe masepa ni kutukwasa, tweyenu kanawa hanga tulichinge! Alioze nyi nuneza hanga nungukunjike kuli akwa kole jami, chibwe chanulingile chibi nichimwe, Zambi ya tushakulu twetu machinyingika, ni maanumwesa lamba.”

¹⁸ Mwiku wa Zambi yiuhulumukina muli umwe wa kuli ayo, Amasai, yoze meza kubwa mwata wa “Tujita Makumi Atatu,” yamba ngwenyi: “David mwana wa Jese, tuli atu jenu! Uhwimino kuli yenu ni kuli waze akunukwasa! Zambi kali hamwe ni yenu.” David yaasambilila, yaapwisa akwa lutwe a tujita twenyi.

Amanase waze akawile David

¹⁹ Amwe tujita a ku vungu lia Manase yaalichinga ni David muze Afilistia ayile ni kwasa jita ni mwanangana Saulu. Alioze David kakwashile ko Afilistia, mumu mianangana jo evwile woma ngwo, maakunjika kuli mwata wenyi Saulu, kashika yaamuhilwisa ku limbo lia Ziklage.

²⁰ Wano e tujita a ku vungu lia Manase waze alichingile ni David muze ahilukile: Adna, ni Jozabade, ni Jediaele, ni Mikele, ni Jozabade, ni Elihu, ni Ziletai. Eno e abwile miata ja mbunga ya tujita 1,000 mu chifuchi cha Manase.

²¹ Yaabwa miata ja tujita twa David, mumu eswe te tujita a lufuma. Hakusula yaabwa miata ja tujita twa Israele.

²² Tangwa ha tangwa malunga akwo yaalichinga ni mbunga ya tujita twa David. Kashika yikubwa mbunga yinene ya tujita a tachi.

Kwoka cha tujita twa David

^23-37 Muze te David achili ku limbo lia Hebrone, yikwiza tujita anji ni yitwa yo, yaalichinga ni tujita twenyi ni kumukwasa, amupwise mwanangana hanga ahinge Saulu, ngwe chize Mwene Zambi alakenyene. Kwoka cho chino: Ayuda: tujita 6,800 ni yitwa yo mu moko, kebwe ni makunga; Asimeone: tujita 7,100 waze heejilila kwasa jita; Alevi: 4,600; Akwa kukaula Johoyada, a ku vungu lia Arone, 3,700; Usoko wa Zadoke, mukweze yoze te wanyingika kwasa jita, akwa lutwe 22; Abenjamine: (vungu lia Saulu iye mwene) tujita 3,000: (mumu anji asalile ni Saulu); Aefraime: tujita 20,800, akwa lufuma a ku majimo jo; Amanase a ku chitokelo cha Yordau: tujita 18,000 waze atongwele kuya ni kuhingisa David mu wanangana; Aisakare: miata 200, kuchinga ni atu a mu chiyulo cho. (Miata wano te kaananyingika chize Aisraele chaatamba kulinga ni lie tangwa libema ha kuchilinga); Azabulone: tujita 50,000 akwa kushishika waze te anyingika kwasa jita ni yitwa yeka ni yeka; Anaftali: miata 1,000 kuchinga ni tujita 37,000 anambata kebwe ni makunga; Adane: tujita 28,600 waze heejilila kwasa jita; Ashere: tujita 40,000 waze te analulika kwasa jita; Rubene, ni Gade, ni Manase a ku chivumbuko cha Yordau: tujita 120,000 waze te anyingika kwasa jita ni yitwa yeka ni yeka.

³⁸ Tujita wano eswe, te analulika kwasa jita, yaaya ku Hebrone hanga ahingise David mu wanangana wa Aisraele eswe. Aisraele eswe waze asalile ho no yaatayiza manyonga waze.

³⁹ Yaanama ko matangwa atatu hamwe ni David, yaalia, yaanwa yuma yize usoko wo haanalulika.

⁴⁰ Chize ku sali lia ku norde ku mavungu ja Isakare ni Zabulone, ni Naftali, atu yeeza yaaneha yimbulu, ni tumelu, ni mula, ni ngombe waze te anambata yakulia, wunga, ni yindanda, ni makuyu, ni yichakata ya vinyu, ni vinyu, ni maji a olive. Yaaneha nawa ngombe ni mapanga aashiha hanga alie. Yaachilinga mumu te chifuchi cheswe atu kaanawahilila.