1 Sango Ja Mianangana 11 - Mukanda Wa Zambi 1970

David yabwa mwanangana mu Israele ni mu Yuda

¹ Aisraele eswe yeeza kuli David ku limbo lia Hebrone, yaamwamba ngwo: “Vulie mwanangana! Yetu eswe tuli a mujingwa umuwika.

² Mwakawali, chibwe muze Saulu abwile mwanangana wetu, hindu te yenu nwakusongwela Aisraele mu jita, ni Mwene Zambi, Zambi yenu, yanulakenya ngwenyi, munukasongwela atu jenyi, munukabwa mukwa kwayula.”

³ Chenacho miata eswe a mu Israele ejile kuli mwanangana David ku Hebrone. Neye yakolesa no Usendo, no yaamuwayisa maji, mba yabwa mwanangana wa Israele, ngwe chize Mwene Zambi achilakenyene nikulita ni liji lia Samuel.

⁴ Mwanangana David ni Aisraele eswe yaaya, yaasa jita ni akwa Yerusaleme. Yerusaleme hatangu ngwo Jebuse, ni atu jamo te kaakwavuluka ngwo, akwa Jebuse.

⁵ Akwa Jebuse yaambila David ngwo: “Kuuchi kunjila mu limbo nihakepe.” Alioze David yatambula chipanga cho chakukoleka Zione, yichalumuka ngwo: “Limbo lia David.”

⁶ Mwanangana ngwenyi: “Mutu yoze malianga kushiha umwe Kajebuse mabwa mwata wa tujita.” Joabe, naye te Zeruya, yaasongwela, yabwa mwata wa tujita.

⁷ Mba David yaya ni kutwana mu chipanga chize chakukoleka, kashika yaachiluka ngwo: “Limbo lia David.”

⁸ David yatungulula lie limbo, yaabutuka kuma kuze alumbikile mavu ku sesa lia mulundu ku sali lia chivumbuko. Joabe yatungulula Chihanda chikwo cha lie limbo.

⁹ David yatakama kuhiana, mumu Mwene Zambi Mukwa Ndundo Jeswe yabwa hamwe nenyi.

Tujita a mwanangana David a lufuma

¹⁰ Wano e majina a tujita twa mwanangana David a lufuma. Hamwe ni Aisraele akwo, amukwashile kubwa mwanangana, ngwe chize alakenyene Mwene Zambi. Yaafunga wanangana wenyi.

¹¹ Mutangu yabwa Jashobeame wa ku jimo lia Hakmone, mwata mukachi ka “Miata Atatu a Tujita.” Yasa jita ni tujita 300, yaashiha eswe ni kunga lienyi ha chisuho chimuwika.

¹² Wa muchaali wa mukachi ka e “Miata Atatu a Tujita” a lufuma Eleazare mwana wa Dodo, wa ku jimo lia Ahohi.

¹³ Iye yabwa ni mwanangana David mu jita ni Afilistia ku Pase Damime. Te kali ku munda wa masa muze Aisraele abutukile kuchina.

¹⁴ Mba iye yamana mukachi ka munda nikwasa jita ni Afilistia. Mwene Zambi yamukwasa, yaakumba kuhiana.

¹⁵ Limwe tangwa tujita atatu a ku mbunga ya “Tujita Makumi Atatu” yaaya ku liwe kuze te anashimbwila mwanangana hehi ni chivwenge cha Adulame, muze mbunga ya Afilistia te haasa musumba mu chikulo cha Refaime.

¹⁶ Ha matangwa waze mwanangana David te kali kumwe kuma kwa kukoleka ha mulundu ni mbunga ya tujita twa Afilistia te haakumba limbo lia Betleheme.

¹⁷ Mwanangana yevwa usona wa kuya ku mahio, kashika yamba ngwenyi: “Iya mangunehena kama amwe meya a ku shima lia ku chikolo cha Betleheme?”

¹⁸ E miata atatu yaaya ni hamu lio ndusu mu musumba wa Afilistia, yaataha meya ku shima, yaatwala kuli mwanangana David. Alioze iye kaanwine ko, yaazujila hashi ngwe mulambu kuli Mwene Zambi,

¹⁹ yamba ngwenyi: “Chichi kunwa meya wano nihakepe! Nyi ka, muchibwa ngwe kunanwa manyinga ja atu wano haakunjika mwono wo ku kufwa!” Chenacho alitunyine kwaanwa. Yenayo alingile miata waze atatu a lufuma.

²⁰ Abishai mwanakwo ya mwata Joabe mwenawo wabwile mwata mukachi ka “Tujita Makumi Atatu”. Yasa jita ni tujita 300, yaashiha eswe ni kunga lienyi ha chisuho chimuwika, mba yabwa kajita wa lufuma mukachi ka “Tujita Makumi Atatu.”

²¹ Yafumana kuhiana mukachi ka “Tujita Makumi Atatu,” te mwe mwata wo. Chibwe chocho kabwile ko ni lufuma ngwe “Miata Atatu a Tujita.”

²² Benaya mwana wa Jehoyada wa ku limbo lia Kabzele yabwa kajita mukwo wa lufuma. Yalinga yuma yinji ya hamu mu jita, yashiha tujita aali a tachi a ku chifuchi cha Moabe. Limwe tangwa ha mwaka wa chishika muze neve (neige) hiyanoka hashi, yanjila mu wina, yashiha tambwe.

²³ Yashiha nawa umwe mukwa Egiptu, te lunga munene, wataluka kusuhwa chenyi metro jaali, yabwa ni kunga lisuku. Benaya yamulinjika ni mulumbu, yamuchangumuna lie kunga, yamushiha nalio.

²⁴ Yino ye yitanga ya hamu ya Benaya, umwe wa kuli “Tujita Makumi Atatu.”

²⁵ Yafumana mukachi ko. Chibwe chocho kabwile ko ni lufuma ngwe waze “Miata Atatu a Tujita.” Mwanangana David yamupwisa mwata wa tujita waze te akumufunga.

^26-47 Tujita akwo waze afumanyine wano: Asahele, mwanakwo ya mwata Joabe; Elhanane, mwana wa Dodo wa ku Betleheme; Shamote wa ku Harode; Heleze wa ku Pelete; Ira, mwana wa Ikeshe wa ku Tekoa; Abiezere wa ku Anatote; Sibikai wa ku Husha; Ilai wa ku Ahohe; Maharai wa ku Netofa; Helede mwana wa Bana wa ku Netofa; Itai mwana wa Ribai wa ku Gibea mu Benjamine; Benaya wa ku Piratone; Hurai wa ku yikulo hehi ni Gasha; Abiele wa ku Arba; Azmavete wa ku Bahurume; Eliaba wa ku Shalbone; Hasheme wa ku Gizone; Jonatane mwana wa Shage wa ku Harare; Ahiame mwana wa Sakare wa ku Harare; Elifale mwana wa Ure; Hefere wa ku Mekera; Ahija wa ku Pelone; Hezro wa ku Karmele; Narai mwana wa Ezbai; Joele mwanakwo ya Natane; Mibhare mwana wa Hagri; Zeleke wa ku Amone; Naharai wa ku Berote, yoze te wakumbachila mwata Joabe yitwa ya jita; Ira ni Garebe wa ku Jatire; Uria Kahite; Zabade mwana wa Alai; Adina mwana wa Shiza (umwe mwata wa ku vungu lia Rubene, yoze wabwile ni mbunga yenyi ya tujita makumi atatu); Hanane mwana wa Maka; Joshafate wa ku Mitane; Uzia wa ku Ashtera; Shama ni Jehiele ana ja Hotame a ku Aroere; Jediaele ni Joha ana ja Shimri a ku Tize; Eliele wa ku Mahava; Jeribai ni Joshavia ana ja Elname; Uma wa ku Moabe; Eliele ni Obeti ni Jasiele a ku Zoba.