1 Sango Ja Mianangana 10 - Mukanda Wa Zambi 1970

Kufwa cha mwanangana Saulu

¹ Afilistia yaasa jita ni Aisraele ha mulundu wa Gilboa. Tujita twa Aisraele anji afwile. Akwo eswe yaachina, ni mwanangana Saulu ni e ana jenyi nawa.

² Alioze Afilistia yaaheta, yaashiha Jonatane, ni Abinadabe, ni Malkishua, ana ja mwe mwanangana.

³ Jita yiibwa yikalu hali mwanangana Saulu. Yaamwasa kuli akwa kole jenyi ni mata a kwasa, yaamulemeka chikolo.

⁴ Neye yambila mukwa kumumbachila yitwa ngwenyi: “Tomona mukwale we ungumanune. Nyi ka, yilima waze meeza ni kunguseha ni kungumanuna.” Alioze mwe mukweze yalituna mumu yevwa woma unji. Kashika mwanangana yanda mukwale wenyi mwene, yalishinda ho.

⁵ Muze mukweze hamona ngwenyi mwe mwanangana hafwa, neye nawa yalishinda ha mukwale wenyi, yafwa.

⁶ Chenacho afwile mwanangana Saulu ni ana jenyi atatu a malunga ni mukweze wenyi eswe hamuwika.

⁷ Muze Aisraele waze te atwama mu chikulo cha Jezrele ni ku chivumbuko cha lwiji Yordau heevwa ngwo, tujita twa Aisraele haachina, nawa ngwo, mwanangana Saulu ni ana jenyi haafwa, yaahichika membo jo, yaachina. Mba Afilistia yeeza, yaatwama mo.

⁸ Muze hikwacha, Afilistia yeeza ni kuzula mahina ja afu, yaawana mwanangana ni ana jenyi a malunga haafwila ha mulundu wa Gilboa.

⁹ Yaabatula mutwe wa mwe mwanangana, yaazula yitwa yenyi ya jita, yaatuma tunganda ni ye yitwa mu chifuchi cheswe cha Filistia ni kwambulula sango Jibema ku mahamba jo ni kuli atu.

¹⁰ Mba yaasa yitwa yenyi ya jita mu limwe zuwo lia mahamba jo, yaasukika mutwe wenyi mu zuwo lia zambi yo Dagone.

¹¹ Muze atu ja Jabeshe mu chifuchi cha Gileade heevwa chize Afilistia haalinga mwanangana,

¹² malunga a hamu kuhiana yaaya, yaanda mijimba ya Saulu ni ana jenyi, yaaya nayo ku Jabeshe. Yaayifunda mushi lia mutondo shene yaalitwamina kulia matangwa shimbiali.

¹³ Chenacho Saulu afwile mumu ha utanguko wenyi kuli Mwene Zambi. Yakolema Shimbi jenyi, chikwo nawa, yahula chiyulo kuli mukwa mahamba

¹⁴ hi kuli Mwene Zambi ko. Kashika Mwene Zambi wamushihile, yahana wanangana kuli David mwana wa Jese.