1 Samuel 9 - Mukanda Wa Zambi 1970

Saulu yalitakana ni Samuel

¹ Kwabwile umwe lunga pichi, mukwa ndundo wa ku vungu lia Benjamine, jina lienyi Kishi. Te mwana wa Abiele, mujikulu wa Zerore, wa ku jiko lia Bekorate, wa ku jimo lia Afia.

² Neye yabwa ni mwanenyi wa lunga, jina lienyi Saulu, mukweze mubema ku meso. Hakachi ka Aisraele wakuhi niumwe yoze wamuhianyine kubema hanji kusuhwa. Atu eswe yaasulila ha yipaya yenyi.

³ Limwe tangwa yimbulu ja Kishi yaajimbala. Kashika yambila mwanenyi Saulu ngwenyi: “Yako ni umwe ngamba, ufupe yimbulu.”

⁴ No yaabalika mu chifuchi cha milundu ya Efraime ni mu chifuchi cha Shalisha, hindu kaawanyine ko. Yaabalika mu chifuchi cha Shalime, ni mu chifuchi cha Benjamine, hindu kenu.

⁵ Muze haaheta mu chifuchi cha Zufu, Saulu yambila ngamba yenyi ngwenyi: “Tuhiluke ku mahietu. Nyi ka, tata malitwamina kunyonga yimbulu, mabutuka kulibikala hakutwala kuli yetu.”

⁶ Ngamba yamukumbulula ngwenyi: “Tala mu limbo lino umwe mutu wa Zambi ulimo. Atu kaakumulemesa kuhiana. Cheswacho mamba kuchakubwa. Tuchiyenu ko hanji matujimbwila kuze kuli yimbulu.”

⁷ Saulu ngwenyi: “Nyi twaya ko, yika mutumwaha? Mumu mbolo mu yikashi yetu hiyahwa, mba mulambu uka mutumwaha mwe mutu wa Zambi, chika tuli nacho kama?”

⁸ Ngamba ngwenyi: “Tala nguli ni lumbongo wa prata. Mungumwaha yo hanga atulweze kuze kuli e yimbulu.”

^9-11 Saulu ngwenyi: “Chibema wamba, tuye.” Chenacho ayile ku limbo kuze te kwatwama mutu wa Zambi. Shimbu lize maachikanduka ha mulundu wa ku limbo, yaatakana ni ana mapwo te anayi ni kutaha meya, yaahula ngwo: “Mukwa kumona kwali, nyi ka?” (Ha matangwa waze atu te kaakuvuluka mukwa munanyi ngwo: mukwa kumona. Kashika nyi umwe mutu unayi ni kuhula chimwe chuma kuli Zambi, mamba ngwenyi: “Tuye tuhule mwe mukwa kumona.”)

^12-13 No yaakumbulula ngwo: “Ewa, kulutwe ali. Tambukenu ko, muze mununjila mu limbo munumumona. Musono lume lie aheta mu limbo, mumu atu maalambula mulambu ha chilumbilo ha mulundu. Atu waze alakenyene keechi kubutuka kulia ndoo meza, mumu iye chamutamba kuwahisa mulambu hatangu. Nyi munutambuka ko munumumona muze kanda achikanduka ni kulia.”

¹⁴ Saulu ni ngamba yenyi yaakanduka mu limbo. Mba muze haanjila mo, kuma Samuel kaneza, yatakana no, te himakanduka homa ha kuwayila.

¹⁵ Mumu tangwa ngwe lia zau, Mwene Zambi te halweza kulu Samuel ngwenyi:

¹⁶ “Hamene ha ola yinoyene mungukakutumina umwe lunga wa ku vungu lia Benjamine, ukamuwayise maji akabwe mwanangana wa atu jami Aisraele. Neye makatusula atu jami ku moko ja Afilistia, mumu hinatala atu jami, hinevwa kulila cho.”

¹⁷ Muze Samuel hamona Saulu, Mwene Zambi yamwamba ngwenyi: “Yono mwe mutu yoze ngunakamba. Mwenawo makayula atu jami.”

¹⁸ Mba Saulu yakundama ku chikolo kuli Samuel, yamuhula ngwenyi: “Ngulweze kama zuwo lia mukwa kumona.”

¹⁹ Samuel ngwenyi: “Mukwa kumona yami. Tetekelenu ha mulundu homa ha kuwayila. Munulia hamwe ni yami musono, mba hamene chichamene mungukakumbulula ku yihula yenu yeswe ni kunushika.

²⁰ Hakutwala ku yimbulu waze ajimbalile matangwa atatu a kunyima, kanda nwanyonga nawa, mumu haawana kulu. Alioze yoze Aisraele anazange kuhiana kali iya? Ngwami yena, ni akwa jiko lia tatenu.”

²¹ Saulu yakumbulula ngwenyi: “Yami nguli Kabenjamine, vungu likepe liahiana lia mu Israele, ni jiko liami likepe liahiana lia ku vungu liami. Kuchi mba unahanjika Chenacho ni yami?”

²² Hohene Samuel yatwala Saulu ni ngamba yenyi mu chibatulo chinene, yaaha chitwamo cha kulutwe hakachi ka waze te hanalakenya, ngwe atu makumi atatu.

²³ Samuel yambila mwe mukwa kuteleka ngwenyi: “Neha chilio chize ngunakakwaha ngwami, chisweke.”

²⁴ Neye yaneha kulu libema liahiana, yalisa ku meso ja Saulu. Samuel ngwenyi: “Tala chitundo chize tunakakutulikila. Tambula ulie, mumu hitwakuswekela cho ndoo ha ola yino hinalakenya atu wano.” Chenacho Saulu alile hamwe ni Samuel tangwa lize.

²⁵ Muze haakatuka homa ha kuwayila ha mulundu, yaapalumuka ku limbo, yaalulikila Saulu muhela helu lia zuwo,

²⁶ yaabomba ko. Muze hikwacha, Samuel yatambika Saulu helu lia zuwo ngwenyi: “Hinduka, ngukushike uye kwe.” Saulu yahinduka, mba eswe aali, iye ni Samuel, yaatuhuka.

Samuel yawayisa Saulu, yamupwisa mwanangana

²⁷ Ha kuheta ku songo lia limbo, Samuel yambila Saulu ngwenyi: “Ambila ngamba abalike kulutwe lietu.” Neye yatetekela. Mba Samuel yambila Saulu ngwenyi: “Mana hakepe, ngukulweze chize Zambi hamba.”