1 Samuel 8 - Mukanda Wa Zambi 1970

Aisraele yeeta mwanangana

¹ Muze Samuel te habwa kashinakaji, yapwisa ana jenyi akwa kuyula mu Israele.

² Mwanenyi mutangu jina lienyi, Joele; ni wa muchaali Abija. Eno te akuyula ku limbo lia Bersheba.

³ Alioze ana jenyi keembulwile ko ndako ja tato. Yazanga ubite wika, Chenacho atambwile ubite wa mbenga ni kuhengesa ubatwilo.

⁴ Mba makulwana eswe ja Aisraele yaalikungulula kuli Samuel ku Rama,

⁵ yaamwamba ngwo: “Tala yena hiwahwa kashinakaji, ni ana je keeshi kwimbulula ndako je. Kashika utusele mwanangana hanga atuyule ngwe mavungu akwo.”

⁶ Alioze Samuel yabihilila ha liji lino ngwo: “Utusele mwanangana hanga atuyule.” Kashika yalemba kuli Mwene Zambi.

⁷ Neye yakumbulula ngwenyi: “Banjika maliji eswe waze atu maakwamba, mumu kalitunyine ko yena, alioze kaalituna yami. Kaazangile yami kubwa mwanangana wo.

⁸ Chize ku tangwa lize naatuhwishile mu chifuchi cha Egiptu ndoo ni musono, kaakungwehuka ni kulingila mazambi eka. Ni haliabwila kaanakulingi cheswe chize akungulinga yami matangwa eswe.

⁹ Kashika banjika ku maliji jo, alioze waatoweza chikolo ni kwalumbunwina ngwe chize mianangana jo maakamwesa lamba.”

¹⁰ Samuel yambulula maliji eswe a Mwene Zambi kuli atu waze echile mwanangana.

¹¹ Ngwenyi: “Mwanangana wenu makanulinga ngwe chino: ana jenu a malunga makaapwisa tujita; amwe maakenda ha matemba jenyi a jita, amwe maakenda ha tuvwalu twenyi a jita, akwo maakazomboka kulutwe lia matemba jenyi.

¹² Amwe makaapwisa miata ja mbunga ya tujita 1,000, akwo miata ja 50. Ana jenu amwe a malunga maakamulimina minda, akwo maakazungula mbuto yenyi, akwo maakamufulila yikungo ya jita ni yikungo ya matemba jenyi.

¹³ Mwanangana wenu makakwata ana jenu a mapwo hanga akamukamine maji a vumba libema, akamutelekele yakulia, akamulingile mbolo.

¹⁴ Makatambula minda yenu yibema, ya tiriku, ni ya vinyu, ni ya olive. Makayihana kuli akwa kuyula.

¹⁵ Makatambula Chihanda cha kumi cha mbuto ni cha vinyu yenu ni kuchihana kuli akwa kuyula ni akwa lutwe jenyi.

¹⁶ Makatambula ngamba jenu ni ngombe ni yimbulu jenu abema kuhiana ni tachi, ni kwaasa ku milimo yenyi.

¹⁷ Makatambula Chihanda cha kumi cha yimuna yenu, ni yenwene makanupwisa ndungo jenyi.

¹⁸ Ha matangwa waze munukalila chikolo mumu hali mwanangana yoze nwalitongwelele yenwene, alioze Mwene Zambi kechi kanukumbulula.”

¹⁹ Chibwe chocho hindu atu kaabanjikile ko liji lia Samuel. No yaamba ngwo: “Kaa! Tunazange mwanangana,

²⁰ hanga ni yetu tukabwe ngwe mavungu akwo. Mwanangana wetu akatuyule ni akatutetekele nikutwashila jita.”

²¹ Samuel yabanjika maliji eswe ja atu, mba yaya ni kwambulwila Mwene Zambi.

²² Mwene Zambi yamukumbulula ngwenyi: “Banjika ku maliji jo, ahe mwanangana.” Mba Samuel yambila malunga ja Aisraele ngwenyi: “Hilukenu eswe ku membo jenu.”