1 Samuel 7 - Mukanda Wa Zambi 1970

¹ Akwa Kiriate Jearime yeeza, yaanda mushete wa Usendo wa Mwene Zambi, yaautwala mu zuwo lia umwe lunga, jina lienyi Abinadabe, yoze te watwama ha mulundu. Yaakunjika mwanenyi Eleazare ni kuufunga.

Samuel yayula Aisraele

² Mushete wa Usendo wa Mwene Zambi ni Aisraele yiusala ku Kiriate Jearime miaka yinji, ngwe miaka makumi aali. Aisraele eswe yaalinyenga ni kufupa Mwene Zambi.

³ Samuel yambila Aisraele ngwenyi: “Nyi munuhiluka kuli Mwene Zambi ni mbunge jenu jeswe, chizenu mazambi eswe a yilambala hakachi kenu, ni mahamba ja zambi wa pwo Astarte. Likunjikenu liakulu kuli Mwene Zambi ni kumulingila iye wika. Mba makanulamwina ku moko ja Afilistia.”

⁴ Hohene Aisraele yaachiza mahamba jo a Bale ni Astarte, yaalingila Mwene Zambi wika.

⁵ Samuel yatuma liji kuli Aisraele eswe alikungulwile ku limbo lia Mizpa nikwamba ngwenyi: “Kwenako mungunulembela Zambi.”

⁶ Chenacho alikungulwile eswe ku Mizpa. Yaataha meya, yaazujila hashi ku meso ja Mwene Zambi ngwe mulambu, yaalitwamina kulia ha lie tangwa lize, yaamba ngwo: “Hitwavulumuna Mwene Zambi.” (Ku Mizpa kwenako te Samuel akubatwila milonga ya Aisraele.)

⁷ Muze Afilistia heevwa ngwo, Aisraele haakunguluka ku Mizpa, mianangana jo yaakatuka hanga ase no jita. Muze Aisraele haachivwa, yeevwa woma,

⁸ yaambila Samuel ngwo: “Kanda uli twamina kutuhakwila ku meso ja Mwene Zambi, Zambi yetu, atulamwine kama ku moko ja Afilistia.”

⁹ Mba Samuel yanda mwana panga, yoze te machamwa, yamushiha, yamulambula mulambu wa kwocha. Neye yawema mweswe upu ku meso ja Mwene Zambi. Hohene yahakwila Aisraele, Mwene Zambi yamwivwa.

¹⁰ Shimbu te Samuel machocha mulambu, Afilistia yaalundumuka mu kwasa jita ni Aisraele. Alioze shimbu lizeliene Mwene Zambi yakulunguza kwilu hali Afilistia; no yaasuswamiana lume, yaachina Aisraele.

¹¹ Aisraele yaakatuka ku Mizpa, yaahanga Afilistia ndoo ku mwanda wa Bete Kare ni kwashiha mu jila.

¹² Henaho Samuel yanda liwe, yalimika hakachi ka Mizpa ni Shene, yaliluka jina ngwenyi: Ebenezere, ni kwamba ngwenyi: “Mwene Zambi hatukwasa ndoo ni musono.”

¹³ Chenacho Aisraele akumbile Afilistia. Ha matangwa eswe a mwono wa Samuel Mwene Zambi yakwika Afilistia kunjila mu chifuchi cha Israele ni tachi.

¹⁴ Afilistia yaahilwisa membo eswe waze atambwile kuli Aisraele, chize ku Ekrone ndoo ku Gate. Chenacho Aisraele atambwile chifuchi cho cheswe. Chikwo nawa, hakachi ka Aisraele ni Akanana jita yiihola.

¹⁵ Samuel yayula Aisraele matangwa eswe a mwono wenyi.

¹⁶ Mwaka ha mwaka yajingajinga ku membo ja Betele, ni Gilgale, ni Mizpa mu kuyula Aisraele.

¹⁷ Mba yahilwoka ku mahienyi ku Rama. Kwenako te akuyula nawa. Yatunga ko chilumbilo cha Mwene Zambi.