1 Samuel 6 - Mukanda Wa Zambi 1970

Mushete wa Usendo yiuhiluka ku Israele

¹ Mushete wa Usendo wa Mwene Zambi ni Aisraele yiubwa mu chifuchi cha Afilistia tukweji shimbiali.

² Mba Afilistia yaatambika mahako jo ni tahi jo nikwahula ngwo: “Kuchi mutulinga ni mushete wa Usendo wa Mwene Zambi ni Aisraele? Nyi mutuuhilwisa ku Israele yuma yika chatutamba kuuhilwisa nawo?”

³ No yaakumbulula ngwo: “Nyi munuhilwisa mushete wa Usendo wa Mwene Zambi ni Aisraele, kanda nuuhilwisa wamokomoko. Chatamba kumutumina mulambu amufwete mumu ha uhiso wenu. Mba manuwuka, ni mununyingika Chuma chize anumwesenene lamba.”

⁴ Mba atu yaahula ngwo: “Mulambu uka mutumutumina?” Ayo ngwo: “Yivunda yitano ni tumbi atano akufula ni oru, chivunda chimuwika ni tumbi umuwika hali mwanangana mweswe, mumu yenu ni mianangana jenu nwabwile ni musongo umuwika.

⁵ Lingenu tuponya a yivunda ni a tumbi waze anabihisa chifuchi chenu. Lemesenu Zambi ya Aisraele, hanji mecha kunumwesa lamba, yenu ni mazambi jenu, ni chifuchi chenu.

⁶ Kuchi mba munukalisa mbunge jenu ngwe chize alingile mwanangana wa Egiptu ni atu jenyi? Iwulukenu chize Zambi waahepwishile ndoo haatayiza Aisraele kukatuka mu Egiptu.

⁷ Kashika lulikenu temba haha ni ngombe aali waze anamwisa, kanda achasa mu kanga. Kashilenu ngombe ku temba, alioze handununenu ana jo, nukaanehe ku chihunda.

⁸ Nwande mushete wa Usendo wa Mwene Zambi, nukause ha temba. Senu umwe mushete hehi ni uze wa Usendo, senumo tuponya a oru yize nunatumu ngwe milambu ya yibi yenu, mba echenu ngombe aye kwo.

⁹ Hohene talenu kuze maaya. Nyi maaya mu jila ku limbo lia Bete Shemeshe, mutunyingika ngwetu, Zambi ya Aisraele mwe unakatumwesa lamba. Nyi ka, mutunyingika ngwetu, iye katumwesene ko lamba; alioze che Chuma lume chatuwana chiwanyina.”

¹⁰ Chenacho alingile e malunga, yaanda ngombe aali waze te anamwisa, yaakashila ku temba, yaakashila ana jo mu limbo.

¹¹ Yaasa mushete wa Usendo wa Mwene Zambi ha temba hamwe ni mushete uze uli ni tuponya a oru a tumbi ni yivunda.

¹² Ngombe yaabutuka kuya mu jila ya ku Bete Shemeshe, yaaya pundu, kaahambulukile ko chibwe ku chimeso hanji ku chindume, yaateta muze te anayi. Mianangana atano ja Afilistia yaakaula ndoo ku njiza ya Bete Shemeshe.

¹³ Akwa Bete Shemeshe te tiriku anazungula mu chikulo. Yaatala, yaamona mushete wa Usendo, yaawahilila kuhiana.

¹⁴ Temba yilinjila mu munda wa Yoshua mukwa Bete Shemeshe, yilimana kuze hehi ni luliwe. Atu yaabulabula mabaya a temba, yaashiha ngombe, yaalambula mulambu wa kwocha kuli Mwene Zambi.

¹⁵ Alevi yaachiza mushete wa Usendo wa Mwene Zambi ni mushete uze wabwile tuponya a oru, yaayinangika ha luliwe. Mba akwa Bete Shemeshe yaalambula Mwene Zambi mulambu wa kwocha ni milambu yikwo.

¹⁶ Mianangana atano ja Afilistia, muze haachimona, yaahiluka ku limbo lia Ekrone tangwa lioliene.

¹⁷ Afilistia yaatuma yivunda yize yitano ya oru ngwe mulambu wa yibi yo mumu ha membo wano: Ashdode chimuwika, ni Gaza chimuwika, ni Ashkelone chimuwika, ni Gate chimuwika, ni Ekrone chimuwika.

¹⁸ Yaatuma nawa tumbi a oru mumu ha membo eswe a mianangana waze atano ja Afilistia, membo a yipanga ni yihunda ya mu yambu. Ku luliwe kuze atulilile mushete wa Usendo wa Mwene Zambi luli chela cho ndoo ni musono uno mu munda wa Yoshua, mukwa Bete Shemeshe.

¹⁹ Mwene Zambi yashiha malunga makumi shimbiali a ku Bete Shemeshe mumu atalile mu mushete wa Usendo. Atu yaalinyenga mumu ha lamba lize aamwesene kuli Mwene Zambi.

Mushete wa Usendo ku Kiriate Jearime

²⁰ Mba malunga a ku Bete Shemeshe yaalihula ngwo: “Iya mahasa kumana kama ku meso ja Mwene Zambi, Zambi munangi? Kulihi mutuutwala hanga atweche kama?”

²¹ No yaatumina akwa Kiriate Jearime tunganda ni kwamba ngwo: “Afilistia haahilwisa mushete wa Usendo wa Mwene Zambi. Tweyenu nuwande.”