1 Samuel 5 - Mukanda Wa Zambi 1970

Mushete wa Usendo hakachi ka Afilistia

¹ Muze Afilistia haatambula mushete wa Usendo wa Zambi ni atu, yaauchiza ku limbo lia Ebenezere, yaautwala ku limbo lio Ashdode

² Yaausa mu zuwo lia hamba lio Dagone, yaautumbika hehi ni mwe hamba.

³ Muze hikwacha akwa Ashdode yaalimeneka kuwana Dagone halimbuka meso hashi kulutwe lia mushete wa Usendo. No yaamwanda, yaamumika nawa homa lienyi.

⁴ Muze hikwacha nawa, yaalimeneka, kuwana hamba halimbuka nawa kulutwe lia mushete wa Usendo. Chisuho chino, kuwana mutwe ni moko jenyi hiyamakwoka, te kanabombo ha ngazulwilo ya chajilo, chivuvu chenyi wika che chinasala. (

⁵ Kashika ndoo ni musono mahako ja Dagone ni akwa kukombelela eswe keeshi kuliata ha ngazulwilo chajilo cha zuwo lia Dagone.)

⁶ Mwene Zambi yamwesa akwa Ashdode lamba linji, yeevwisa mwongo, yaalamba ni musongo wa yivunda hamwe ni akwa yifuchi yeswe yize te yinajingilika.

⁷ Muze hachimona, yaamba ngwo: “Zambi ya Aisraele kanatumwesa lamba hamwe ni zambi yetu, Dagone. Kutuchi kutayiza nawa mushete wa Usendo wa Zambi ni Aisraele kutwama mukachi ketu.”

⁸ Kashika yaasaka mianangana eswe atano ja Afilistia, yaahula ngwo: “Kuchi mutulinga ni mushete wa Usendo wa Zambi ya Aisraele?” No yaakumbulula ngwo: “Autwale ku Gate.” Chenacho autwalile ku Gate, limbo likwo lia Afilistia.

⁹ Muze haautwala ko, Mwene Zambi yamwesa nawa akwa limbo lize lamba, yeevwisa mwongo. Atu eswe, twanuke ni makulwana yaayiza yivunda.

¹⁰ Mba yaanda nawa mushete wa Usendo, yaautwala ku Ekrone, limbo likwo lia Afilistia. Alioze shimbu mushete wa Usendo muuchiheta ko, akwa Ekrone yaakololoka ngwo: “Haatunehena mushete wa Usendo wa Zambi ya Aisraele, atushihe yetu eswe!”

¹¹ Kashika yaatambika nawa mianangana eswe ja Afilistia, yaamba ngwo: “Hilwisenu mushete wa Usendo wa Zambi ya Aisraele ku mahiawo. Nyi ka, kumuutushiha hamwe ni akwa majiko jetu.” Akwa limbo eswe yeevwa mwongo unji, mumu Zambi yaamwesa lamba kuhiana.

¹² Chibwe waze kaafwile ko, yaalokwoka ni yivunda. Atu yaakololoka kuli mazambi jo aakwase.