1 Samuel 4 - Mukanda Wa Zambi 1970

Afilistia yaanda mushete wa Usendo wa Mwene Zambi ni atu jenyi

¹ Ha matangwa waze Afilistia yaalikungulula ni kwasa jita ni Aisraele. Kashika Aisraele yaatuhuka, yaajika musumba wo ku Ebenezere. Afilistia no yaajika musumba ku Afeke.

² Afilistia yaalilonga ngango ja kwasa jita ni Aisraele. Muze ashile jita Afilistia yaakumba Aisraele, yaashiha tujita twa Aisraele ngwe 4,000.

³ Muze tujita waze asalile ho haaheta ku musumba, miata ja Aisraele yaalihula ngwo: “Kuchi mba Mwene Zambi hatayiza Afilistia musono kutushiha chichize? Tusakenu mushete wa Usendo wa Mwene Zambi ku limbo lia Shilo. Mba muze muuheta hakachi ketu muutulamwina kuli akwa kole jetu.”

⁴ Kashika yaatuma tunganda ku Shilo. No yaaneha mushete wa Usendo wa Mwene Zambi Mukwa Ndundo Jeswe, yoze watwama mukachi ka akwa mwono a mwilu. Ana ja Eli a malunga aali, Hofni ni Finehase, yeeza ni mushete wa Usendo.

⁵ Muze we mushete wa Usendo hiwaheta mu musumba, Aisraele eswe yaakololoka kuhiana ndoo ni hashi yihanyika.

⁶ Muze Afilistia heevwa zungo lia kukololoka, yaalihula ngwo: “Zungo liaka ku musumba wa Aisraele?” Muze heevwa ngwo: “Mushete wa Usendo hiweza mu musumba,”

⁷ yeevwa mwongo, ngwo: “Umwe Zambi heza mu musumba wo, tunafu! Chuma chino kanda chibwa kama nilimwe tangwa!

⁸ Iya mahasa kutulamwina kama ku moko ja mazambi waze a ndundo? Wano e mazambi waze ashihile akwa Egiptu mu puya.

⁹ Yenu Afilistia, takamenu! Bwenu malunga! Nyi ka, mutubwa ndungo ja Ahebreu ngwe chize ayo abwile ndungo jetu. Asenu no jita, tuli malunga!”

¹⁰ Mba Afilistia yaasa jita chikolo, yaakumba Aisraele. No yaachina mutu ni mutu ku zuwo lienyi. Kwabwile kushiha chinene! Kuli Aisraele yikufwa tujita waze te akwenda hashi 30,000.

¹¹ Mushete wa Usendo Afilistia yaautambula, yashiha nawa Hofni ni Finehase, ana aali a Eli.

Kufwa cha Eli

¹² Umwe kajita wa ku vungu lia Benjamine yakatuka ku jita, yazomboka minanga mu jila yeswe ndoo ku limbo lia Shilo tangwa lioliene, mahina jenyi akutanuna ni mavu ha mutwe.

¹³ Eli te kanatwama ha chitwamo ku sesa lia jila nikutala, mumu te mbunge yenyi yinachikima mumu ha mushete wa Usendo. Mwe lunga, muze haheta ku limbo, yatwa lusango; atu eswe yaabutuka kulila ni mwongo.

¹⁴ Eli, muze hevwa zungo lize, yahula ngwenyi: “Ayenwe, zungo libwa haha liaka?” Mwe kajita yazomboka kuli iye, yamulumbunwina sango. (

¹⁵ Eli te habwa ni miaka makumi livwa ni nake, meso jenyi haalaa.)

¹⁶ Mwe kajita yamwambulwila ngwenyi: “Yami mwene nakatuka ku jita, kwe unakatuka musono, kunachina.” Eli ngwenyi: “Mwanami, kuchi kwabwa?”

¹⁷ Kajita ngwenyi: “Aisraele haachina ku meso ja Afilistia. Hikwabwa kushiha chinene hakachi ka atu, ni ana je aali, Hofni ni Finehase, no haafwa, ni mushete wa Usendo haautambula!”

¹⁸ Eli muze hevwa kuvuluka mushete wa Usendo, hohene yalimbuka ni chitwamo unyimenyime hehi ni chikolo. Te habwa kashinakaji, halemenena. Kashika yamakuka kota, yafwa kwenyi. Eli te hayula Aisraele miaka makumi awana.

Kufwa cha pwo lia Finehase

¹⁹ Tembwa mwana wa Eli, pwo lia Finehase, te kafumbakaji, yabwa hehi ni kusema. Muze hevwa sango ja lunga lienyi ni ja kutambula cha mushete wa Usendo ni ja kufwa cha tato weno, yevwa musongo, yasema mwana.

²⁰ Muze pwo himamba kufwa, yifunguji yaamwamba ngwo: “Kanda wivwa woma; hiwasema mwana wa lunga!” Alioze kasele ko mbunge, kakumbulwile ko.

²¹ Iye yaluka mwanenyi ngwenyi: Ikabode, nikulumbununa ngwenyi: “Uhenya wa Zambi hiwakatuka kuli Aisraele,” mumu akwa kole haatambula mushete wa Usendo ni mumu ha kufwa cha tato weno ni lunga lienyi.

²² Yamba ngwenyi: “Uhenya wa Zambi hiwakatuka kuli Aisraele, mumu mushete wa Usendo haautambula.”