1 Samuel 31 - Mukanda Wa Zambi 1970

Kufwa cha Saulu ni ana jenyi a malunga

¹ Afilistia yasa jita ni Aisraele ha mulundu wa Gilboa. Tujita twa Aisraele anji afwile; akwo eswe yaachina, ni mwanangana Saulu ni e ana jenyi a malunga nawa.

² Afilistia yaaheta, yaashiha Jonatane, ni Abinadabe, ni Malkishua, ana ja mwe mwanangana.

³ Jita yiibwa yikalu hali mwanangana Saulu. Yaamwasa kuli akwa kole jenyi ni mata a kwasa, yaamulemeka chikolo.

⁴ Neye yambila mukwa kumumbachila yitwa ngwenyi; “Tomona mukwale we, ungumanune. Nyi ka, yilima waze meeza ni kunguseha ni kungumanuna.” Alioze mwe mukweze yalituna mumu yevwa woma unji. Kashika mwanangana yanda mukwale wenyi mwene, yalishinda ho.

⁵ Muze mukweze hamona ngwenyi, mwe mwanangana hafwa, neye nawa yalishinda ha mukwale wenyi, eswe aali yaafwa hamuwika.

⁶ Chenacho mwanangana Saulu afwile hamwe ni anenyi atatu a malunga ni atu jenyi eswe.

⁷ Muze Aisraele, waze te atwama musali lia chikulo cha Jezrele ku chivumbuko cha lwiji Yordau, heevwa ngwo, tujita twa Aisraele haachina, nawa ngwo, mwanangana Saulu ni ana jenyi haafwa, yaahichika membo jo, yaachina. Mba Afilistia yeeza, yaatwama mo.

⁸ Muze hikwacha, Afilistia yeeza ni kuchiza mahina ja afu, yaawana mwanangana ni ana jenyi atatu a malunga haafwila ha mulundu wa Gilboa.

⁹ Yaabatula mutwe wa mwe mwanangana, yaazula yitwa yenyi ya jita, yaatuma tunganda ni ye yitwa mu chifuchi cheswe cha Filistia ni kwambulula sango jibema ku mahamba jo ni kuli atu.

¹⁰ Mba yaasa yitwa yenyi ya jita mu zuwo lia zambi yo wa pwo, Astarte. Yaahachila mujimba wa mwanangana Saulu ha chipanga cha limbo lia Bete Shane.

¹¹ Muze atu ja Jabeshe mu chifuchi cha Gileade heevwa chize Afilistia haalinga mwanangana,

¹² malunga a hamu kuhiana yaatuhuka, yeenda ufuku weswe ni kuya ku Bete Shane. Yaachiza mijimba ya Saulu ni ana jenyi ha chipanga, yaayineha ku Jabeshe, yaayochela ko.

¹³ Yaanda yifwaha, yaayifunda mushi lia mutondo tamariske mu limbo. Mba yaalitwamina kulia matangwa shimbiali.