1 Samuel 30 - Mukanda Wa Zambi 1970

David yasa jita ni Aamaleke

¹ Ha tangwa lia muchitatu muze David ni tujita twenyi heeza ku Ziklage, kuma Aamaleke haabuba yuma ya mu membo a ku sude mu Yuda, haasa jita ni akwa Ziklage, ni hoocha lie limbo.

² Haakwata mapwo eswe ni kuya no, alioze kaashihile ko niumwe.

³ Muze David ni tujita twenyi heeza yaawana limbo haaliocha kahia, ni mapwo jo ni ana jo haatwala funge.

⁴ David ni tujita twenyi yaabutuka kulila mbimbi, yaalila ndoo ni muze kaahashile ko nawa kulila.

⁵ Ni e mapwo aali a David haatwala funge, Ahinoame ni Abigaile.

⁶ David yalibikala kuhiana mumu tujita twenyi yaabwa ni ufwatulo kuhiana ha kutoka cha ana jo eswe. Yaamba kushiha David ni mawe, alioze Mwene Zambi, Zambi yenyi, yamutakamisa.

⁷ David yambila hako Abiatare, mwana wa Ahimeleke, ngwenyi: “Ngunehene chikuto chihi cha uhako”. Abiatare yamunehena cho.

⁸ Mba David yahula ngwenyi: “A Mwene Zambi! Ngukaule mbunga yino, mungwakwata, nyi?” Mwene Zambi yamukumbulula ngwenyi: “Ewa, akaule, muwaaheta mba muulamwina atu je eswe.”

⁹ Chichamene David yakatuka ni tujita 600. Muze haaheta ku lwiji Besore, yahichika tujita amwe kuze.

¹⁰ David ni tujita 400 yaaya lume. 200 yaasala munyima, te haahonga kuhiana, kaahashile kuzauka lwiji Besore.

^11-12 Tujita waze abwile hamwe ni David yaawana mukweze mukwa Egiptu mu yambu, yaamuneha kuli David. Te hafwa zala mumu matangwa atatu kanwine meya ni kalile nichimwe. Tujita yaamwaha meya ni Chipinji cha chindanda cha makuyu, ni yichakata yaali ya vinyu yumu. Muze halia, mwe mukweze yahuzuluka.

¹³ David yamuhula ngwenyi: “Uli mukweze waya? Kulihi unakatuka?” Iye ngwenyi: “Nguli mukweze wa ku Egiptu, nakulingila Kaamaleke. Mwata wami kanakanguhichika mumu te ngunayiji. Hinabomba matangwa atatu mu yambu.

¹⁴ Tunakabuba chifuchi cha Acherete, ku sude mu Yuda, ni chifuchi cha jimo lia Kaleba; yitwocha Ziklage.”

¹⁵ David yamuhula ngwenyi: “Muututwala kama ku mbunga yize, nyi?” Mukweze ngwenyi: “Lishingenu ni jina lia Zambi ngwenu, kunuchi kungushiha hanji kungukunjika mu moko ja mwata wami, mba ngunutwale ku mbunga yize.”

¹⁶ Mba mukweze yatwala David kuli ayo. Muze hamutwala ko, kuwana ayo eswe haalimwanga ni kulia, ni kunwa, ni kuhangana, mumu ha ubite unji uze abubile mu chifuchi cha Afilistia ni cha Yuda.

¹⁷ Mba David yasa no jita chize ku kunjila cha tangwa ndoo ku chingoloshi cha tangwa likwo. Lunga niumwe walilamwinyine shina akweze 400 waze achinyine ha tumelu.

¹⁸ David yatambula yuma yeswe yize Aamaleke abubile, Yalamwina nawa mapwo jenyi aali.

¹⁹ Nichimwe kuchahonene ko, chibwe chikepe hanji chinene, chibwe ana a malunga ni a mapwo, chibwe ubite hanji Chuma chikwo, David yatambula atu eswe ni yuma yeswe.

²⁰ Yatambula nawa mapanga, ni pembe, ni ngombe. Tujita twenyi yaatwala yimuna yeswe kulutwe lio nikwamba ngwo: “Yuma yino ya mbala ya David.”

²¹ Mba David yaheta kuli tujita 200 waze kaahashile ko kumukaula mumu te haahonga kuhiana, waze asalile ku lwiji Besore. No yaatuhuka ni kubatwiza eswe waze endele ni David. Muze David haakundama yaameneka.

²² Hohene amwe yingulungulu ni atu a mokomoko waze ayile mu jita ni David yaamba ngwo: “Kaanakalituna kuya hamwe ni yetu, kashika kutuchi kuteta hamwe no ubite uno. Maahasa kutambula mapwo jo ni ana jo kwahwa.”

²³ Alioze David ngwenyi: “Akwetu, kunwahashile kulinga chocho ni Chuma chize Mwene Zambi hatwaha. Mutufunga, hatukwasa kukumba tujita waze anakeza ni kulimika ni yetu.

²⁴ Iya manubanjika ku liji lino? Chihanda cha yoze unakasala ni kufunga yuma muchibwa hamuwika ni cha yoze unakaya ku jita. Eswe maatambula chimuwika.”

²⁵ David yasa Shimbi yino, yenayo afunga mu Israele ndoo tangwa lino.

²⁶ Muze haaheta mu Ziklage, David yatumina masepa jenyi, miata ja Auyda, Chihanda cha ubite ngwenyi: “Tambulenu chawana chenu cha ku ubite wa akwa kole ja Mwene Zambi,”

²⁷ Yautama kuli akwa Betele, ni kuli akwa Rama ku sude mu chifuchi cha Yuda, ni kuli atu mu membo ja Jatiri,

²⁸ ni Aroere, ni Sifemote, ni mu Eshtemoa,

²⁹ ni Rakale, ni kuli akwa jimo lia Jeramele, ni kuli Akene,

³⁰ ni kuli atu mu membo ja Horma, ni Borashane, ni Atake,

³¹ ni Hebrone, kafwa mu yifuchi yeswe kuze David ni tujita twenyi endanganyine.