1 Samuel 3 - Mukanda Wa Zambi 1970

Mwene Zambi yasolokela Samuel

¹ Mwe mwana Samuel yalingila Mwene Zambi mu chiyulo cha Eli. Ha matangwa waze Mwene Zambi te keshi kuhanjika ni atu yisuho yinji, chibwe mu yilota.

² Eli te meso jenyi haabutuka kulaa. Limwe tangwa ha ufuku yabomba ha muhela wenyi.

³ Samuel te kanabombo mu zuwo lia Zambi, hehi ni mushete wa Usendo wa Zambi ni atu jenyi. Muze te kanda kucha, shimbu ndeya kanda yichijima,

⁴ Mwene Zambi yatambika Samuel. Neye yakumbulula ngwenyi: “Ewa mwane.”

⁵ Yazomboka kuli Eli: “Vulie tata! Yenu nwangutambika, yami uno.” Eli yamukumbulula ngwenyi: “Mwanami, chakutambikile kwami, yako ubombe.” Neye yahiluka, yabomba.

⁶ Mwene Zambi yatambika nawa ngwenyi: “Samuel.” Neye yahinduka, yaya nawa kuli Eli nikwamba ngwenyi: “Vulie tata! Yenu nwangutambika, yami uno.” Alioze Eli ngwenyi: “Mwanami, chakutambikile kwami. Yako kwe ubombe.”

⁷ Mwenamo Samuel kanda achinyingika liji lia Mwene Zambi, mumu te kanda achihanjika nenyi nilimwe tangwa.

⁸ Mba Mwene Zambi yamutambika nawa chisuho cha muchitatu. Samuel yahinduka, yaya kuli Eli ni kwamba ngwenyi: “Vulie tata! Yenu nwangutambika, yami uno.” Mba Eli yanyingika ngwenyi, kuma Mwene Zambi mwe unatambika mwana.

⁹ Kashika yamulweza ngwenyi: “Hiluka, ubombe. Nyi makutambika nawa, amba ngwe, ‘Mwene Zambi hanjika, yami kavumbi ke ngunabanjika.’ ”

¹⁰ Mwene Zambi yeza, yamana, yatambika ngwe yisuho yikwo: “Samuel! Samuel!” Samuel yakumbulula ngwenyi: “Vulie mwane! Hanjikenu, yami kavumbi kenu ngunahanjika.”

¹¹ Mba Mwene Zambi yamulweza ngwenyi: “Tala, mungukalinga chimwe Chuma chikalu kuli Aisraele. Atu eswe waze maakachivwa, chimbangwinya maakevwa.

¹² Ha tangwa lize mungukalinga nikulita ni kuhala chami kuli akwa jiko lia Eli, chize ku kabutu ndoo ku songo.

¹³ Hinamulweza kulu ngwami, kumungukabatwila jiko lienyi ndoo ku miaka yeswe, mumu ana jenyi a malunga abwile ni kungushililika. Eli yachinyingika alioze kaakanjishile ko.

¹⁴ Kashika hinalishinga hakutwala ku jiko lia Eli ngwami, uhenge wa ku jiko lia Eli kechi kauchiza ni yawana hanji ni milambu ndoo ku miaka yeswe.”

¹⁵ Samuel yabomba ndoo chichamene, mba yahinduka, yazulula ku zuwo lia Mwene Zambi, te woma anevu kulweza Eli Usolwelo.

¹⁶ Alioze Eli yamutambika ngwenyi: “Mwanami Samuel!” Samuel ngwenyi: “Vulie mwane.”

¹⁷ Eli ngwenyi: “Liji lika akulweza Mwene Zambi? Kanda unguswekela lio. Nyi kuwangulwezele eswe, Mwene Zambi makumwesa lamba.”

¹⁸ Kashika Samuel yamulweza yeswe, kamuswekelele nichimwe. Eli ngwenyi: “Iye kali Mwene Zambi; alinge chize anazange.”

¹⁹ Samuel yatatuka. Mwene Zambi yabwa hamwe nenyi, yashindakenya maliji jenyi eswe.

²⁰ Kashika Aisraele eswe, chize ku limbo lia Dane ku norde ndoo ku limbo lia Bersheba ku sude, yaanyingika ngwo, chamwenemwene Samuel kali mukwa munanyi wa Mwene Zambi.

²¹ Mwene Zambi te kakusoloka nawa ni nawa kuli Samuel ku Shilo, ni kuhanjika nenyi. Mba muze Samuel mahanjika, Aisraele eswe maabanjika.