1 Samuel 29 - Mukanda Wa Zambi 1970

Afilistia yaahilwisa David ku jita yo

¹ Afilistia yaakungulula tujita two eswe ku limbo lia Afeke. Aisraele no yaajika musumba wo ku shima lia meya mu chikulo cha Jezrele.

² E mianangana atano ja Afilistia yaatuhuka mu mbunga ja kanunu ni ja kulakaji. David ni tujita twenyi te kaanakaula kunyima hamwe ni mwanangana Akishe.

³ Muze miata ja tujita twa Afilistia haamona, yaahula ngwo: “Wano Ahebreu yika analingi kuno?” Akishe yakumbulula ngwenyi: “Ngwami, au kali David, mukwa kuyula wa Saulu, mwanangana wa Aisraele. Hatwama ni yami matangwa anji. Haanga chejilile kuli yami kanda achilinga kama Chuma chibi nichimwe.”

⁴ Alioze miata ja tujita yaamutenukina, yaamwamba ngwo: “Muhilwise kuze atwama. Kechi kuya ni yetu mu jita. Nyi ka, mu jita malumuka ni kulimika ni yetu. Ngwe kuchi mahasa kuwana ni mwata wenyi? Ngwami, mahasa kuchilinga nyi washiha yetu.

⁵ Ngwami, kali David yoze embilile mwaso ni kuhangana ngwo: ‘Saulu hashiha tununu twenyi, David hashiha makumi jenyi a tununu.’ ”

⁶ Mba Akishe yatambika David, yamwamba ngwenyi: “Ni mwe Mwene Zambi, yena uli mukwa kushishika kuli yami. Mungwivwa kuwaha nyi muuya hamwe ni yami mu jita, chawanyine chitela nichimwe haanga chiwejilile kuli yami. Alioze mianangana akwo kaasolo.

⁷ Kashika hiluka kwe ni uhwimino. Nyi ka, miata ja Afilistia maakuvutwokela.”

⁸ David yakumbulula ngwenyi: “A mwanangana, chibi chika nalinga kama? Chize kuze nabutwile kunulingila ndoo ni musono, yibi yika nwawana kama muli yami kavumbi kenu yize muyingukwika ha kuya nikwasa jita ni akwa kole ja mwene wami?”

⁹ Akishe ngwenyi: “Ngunanyingika, unangubemena ngwe umwe kanganda ka mwilu, alioze mianangana akwo ja Afilistia haamba ngwo: ‘Keechi kuya ni yetu mu jita,’

¹⁰ Kashika David, chichamene cheswe, yenu eswe waze nwahichikile mwanangana Saulu ni kwiza kuli yami nukalimeneka, nukaye kwenu.”

¹¹ Chenacho David akatukile ha chichamene hamwe ni tujita twenyi, yaahiluka ku chifuchi cha Afilistia. Alioze Afilistia yaaya ku limbo lia Jezrele.