1 Samuel 28 - Mukanda Wa Zambi 1970

Jita ya Afilistia ni Aisraele

¹ Ha matangwa waze Afilistia yaakungula tujita two akase jita ni Aisraele. Akishe yambila David ngwenyi: “Nyingika ngwe, yena ni tujita twe munubwa hamwe ni yami mu jita.”

² David ngwenyi: “Vulie mwane, yami nguli kavumbi kenu!” Akishe ngwenyi: “Chibema, yena muubwa kafunga kami ndoo ku miaka yeswe.”

Mwanangana Saulu yahula tahi

³ Hako Samuel te hanafu kulu, Aisraele haanamulili, haanamufundu mu Rama mu limbo lienyi mwene. Mwanangana Saulu te hanahumu kulu tahi eswe mu chifuchi.

⁴ Afilistia yaakunguluka, yaasa musumba wo hehi ni limbo lia Shuneme. Mwanangana Saulu neye yakungulula Aisraele, yaasa musumba wo ha mulundu wa Gilboa.

⁵ Muze Saulu hamona tujita twa Afilistia yevwa mwongo, yachikima kuhiana,

⁶ yahula Mwene Zambi chize chatamba kulinga. Alioze kamukumbulwile, chibwe ku yilota, chibwe ku Urime, chibwe kuli akwa munanyi.

⁷ Kashika mwanangana yambila akwa kuyula ngwenyi: “Ngufupilenu umwe pwo tahi, hanga ngumuhule.” Akwa kuyula yaamulweza ngwo: “Umwe tahi uli ku limbo lia Endore.”

⁸ Kashika mwanangana yazala mahina eka, yaya ni atu jenyi aali, yaheta kuli mwe pwo yoze ha ufuku. Ngwenyi: “Ngutambikile umwe mukwa munanyi yoze mungukulweza.”

⁹ Mwe pwo ngwenyi: “Kuwanyingikine chize mwanangana Saulu hanalingi, nyi? Hanakuwisa tahi eswe mu chifuchi. Mumu yika unangutela muheto ungushihe?”

¹⁰ Mwanangana ngwenyi: “Ni mwe Mwene Zambi, niumwe kechi kukulinga chibi.”

¹¹ Mba pwo ngwenyi: “Iya mungukutambikila?” Mwanangana ngwenyi: “Ngutambikile Samuel.”

¹² Muze mwe pwo hamona hako Samuel, yakololoka, yahula mwanangana ngwenyi: “Kuchi mba wangwonga? Kuma yena mwanangana Saulu!”

¹³ Mwanangana ngwenyi: “Kanda wivwa woma! Yika wamona?” Pwo ngwenyi: “Ngunamono umwe mujimu unavumbuka hashi.”

¹⁴ Mwanangana ngwenyi: “Kuchi abwa?” Pwo ngwenyi: “Kali kashinakaji unavumbuka, kanazala kazaku.” Mba mwanangana yanyingika ngwenyi, kali hako Samuel, yafulamana, yamuwayila.

¹⁵ Mwe hako yamuhula ngwenyi: “Mumu yika unangubinjishila, ni kunguhindwisa?” Mwanangana ngwenyi: “Ngunabinji kuhiana, mumu Afilistia kaanase jita ni yami. Zambi hanangumbu nyima. Kasolo kungukumbulula nawa, chibwe kuli akwa munanyi, chibwe ku yilota. Kashika nakutambika ungulweze kama chize Changutamba kulinga.”

¹⁶ Hako Samuel ngwenyi: “Nyi Mwene Zambi hakumba nyima, habwa mukwa kole ye, kuchi mba unanguhula yami?

¹⁷ Mwene Zambi halinga nikulita ni liji lize angulwezele ngukwambulwile. Hachangumuna wanangana mu kwoko lie, hauhana kuli mwenyembo we David.

¹⁸ Mumu kuwononokenene maliji ja Mwene Zambi muze kuwashilile ko Aamaleke ni yuma yo yeswe.

¹⁹ Chikwo nawa nyingika ngwe, Mwene Zambi makanukunjika yena ni Aisraele mu moko ja Afilistia. Hamene yena ni ana je munukabwa hamwe ni yami, ni Mwene Zambi makakunjika tujita twa Aisraele mu moko ja Afilistia.”

²⁰ Hohene mwanangana yalimbuka hashi yololoo ni woma unji muze hevwa maliji waze. Hikabwile ko nawa ni tachi, mumu tangwa lize kalile ko kama nichimwe, chibwe mwalwa chibwe ufuku weswe.

²¹ Mwe pwo yeza kuli mwanangana, mba muze hamona chize anevu mwongo, yamwamba ngwenyi: “Vulie mwanangana! Hinakunjika mwono wami ku utoji ni kulinga chize wangwamba.

²² Kashika haliabwila ngubanjikenu yami kavumbi kenu. Ngunangike chimwe chakulia ku meso jenu, nulie, hanga nwivwe tachi ja kwenda.”

²³ Alioze yalituna, ngwenyi: “Chichi kulia.” Hindu miata jenyi a tujita, ni pwo yoze yaamulembejeka, mba yaabanjika. Yakatuka hashi, yatwama ha muhela.

²⁴ Mwe pwo te kali ni mwana ngombe yenyi wa maji, yamushiha nikawashi, yanda wunga, yachika mbolo kuyishi yitumbo, yayocha.

²⁵ Yayisa ku meso ja mwanangana ni e miata. No yaalia, mba yaaya kwo ufuku uzewene.