1 Samuel 27 - Mukanda Wa Zambi 1970

David yachinyina ku chifuchi cha Afilistia

¹ David yalihanjikisa ngwenyi: “Ngunamona ngwe, limwe tangwa mwanangana Saulu ku mangushiha. Chuma chibema chize mungulinga chakuhi, shina nguchinyine ku chifuchi cha Afilistia. Mba Saulu mujimuhwa ni kungufupa mu chifuchi cha Israele, mungubwa ni uhwimino.”

² Chenacho David akatukile ni tujita twenyi 600, yaaya maha Akishe, mwana wa Maoke, mwanangana wa limbo lia Gate.

³ David ni tujita twenyi yaatwama mu Gate ni akwa majiko jo, David te kali ni mapwo aali Ahinoame, Kajezrele, ni Abigaile, yoze ahichikile Nabale wa ku Karmele.

⁴ Muze mwanangana Saulu hevwa ngwo, David hachinyina ku Gate hi kamufupile ko nawa.

⁵ David yambila Akishe ngwenyi: “Nyi nwakunguzanga, ungwehe kama chimwe chihunda chikepe hanga ngukatwame mo, mumu hi chibema ko yami kavumbi kenu kutwama mu limbo linene hamwe ni yenu.”

⁶ Kashika Akishe yamwaha David limbo lia Ziklage. Ha chikuma chino Ziklage yilibwa lia mbala lia mianangana ja Auyda ndoo ni musono.

⁷ David yatwama mu chifuchi cha Afilistia tukweji kumi ni asambano.

⁸ Ha matangwa waze David ni tujita twenyi te kaakuya ni kwasa jita ni Ageshure, ni Agirzi, ni Aamaleke, mumu chize ku shakulu, wano te enya chifuchi. Te kaakububa yuma mu chifuchi cho ndoo ku limbo lia Shure mu chifuchi cha Egiptu.

⁹ David yashiha malunga ni mapwo eswe, nikububa mapanga ni ngombe, ni yimbulu, ni tumelu, ni mahina. Mba te kaakuhiluka kuli Akishe.

¹⁰ Muze Akishe mamuhula ngwenyi: “Kulihi wayanga ni kububa musono?” David makumbulula ngwenyi: “Ku sude mu chifuchi cha Yuda,” hanji ngwenyi: “Mu chifuchi cha jimo lia Jeramele,” hanji ngwenyi, “Mu chifuchi cha Akene.”

¹¹ David kahichikile ko niumwe ni mwono, chibwe lunga, hanji pwo. Ngwenyi: “Nyi ka, maneha lusango ku Gate.” Chenacho yabwile ndako yenyi shimbu heswe lize atwamine mu chifuchi cha Afilistia.

¹² Alioze Akishe yafuliela David, yalihanjikesa ngwenyi: “David halipwisa mukwa kole Wahiana kuli atu jenyi Aisraele, kumabwa kavumbi kami ku miaka yeswe.”