1 Samuel 26 - Mukanda Wa Zambi 1970

David yecha nawa mwanangana Saulu ni mwono

¹ Limwe tangwa amwe malunga, a ku limbo lia Zife, yeeza kuli mwanangana Saulu, yaamulweza ngwo: “David kanaswame ha mulundu wa Hachila ku songo lia puya ya Yuda.”

² Neye yakatuka nikawashi, yaya ku puya ya Zife hamwe ni tujita 3,000 twa Israele a hamu, yafupa David.

³ Yajika musumba ha mulundu wa Machila, ku kulwa jila. Alioze David yatwama hehi mu puya. Muze hevwa ngwo: “Mwanangana heza ni kukufupa.”

⁴ David yatuma ngendeshi ase chinyingi, no yaashindakenya ngwo, heza.

^5-6 Mba David iye mwene yakatuka, yaya hamwe ni Kahite Ahimeleke ni Abishai, mwanakwo ya Joabe ku musumba wa mwanangana. Yaamona haze anabombo hamwe ni mwata wenyi wa tujita Abnere, mwana wa Nere, mwanangana te mukachi, tujita eswe kaanamujingilika. David yahula Ahimeleke ni Abishai ngwenyi; “Iya manjila hamwe ni yami mu musumba wa mwanangana?” Abishai ngwenyi: “Yami.”

⁷ Chenacho David ni Abisahi anjilile ha ufuku mu musumba wa mwanangana, yaamumona kanabombo mukachi ka musumba, kunga lienyi lia kujika ku mutwe wenyi. Abnere ni tujita eswe kaanabombo, anamujingilika.

⁸ Mba Abishai yambila David ngwenyi: “Zambi hakunjika mukwa kole ye mu moko je musono. Ngutayize hanga ngumutuwe ni lie kunga lienyi kamuwika lume. Chichi kumutuwa kaali!”

⁹ Alioze David yambila Abishai ngwenyi: “Kanda umushiha, mumu iya mahasa kusamba nyi mashiha yoze Zambi hanawayisa?”

¹⁰ David ngwenyi: “Ni mwe Mwene Zambi, iye mwene mamushiha, hanji ni yikola hanji ku jita.”

¹¹ Mwene Zambi angukande kanda ngulinga chibi yoze Mwene Zambi hanawayisa maji. Alioze mwande lie kunga lienyi lize lili ku mutwe wenyi, ni mulondo wa meya, hanga tuye kwetu.

¹² Chenacho David anjile kunga ni mulondo wa meya wa mwanangana, mba David ni Abishai yaakatuka, yaaya kwo. Niumwe kachimwene ko, chibwe kuchinyingika. Niumwe kalawile ko, mumu te Mwene Zambi haaha tulo anji.

¹³ Hohene David yakanduka ha mulundu, yamana ho, yihabwa pinji yisuku.

¹⁴ David yatambika tujita ni Abnere ngwenyi: “Abnere! Unangwivu, nyi ka?” Abnere yakumbulula ngwenyi: “Yena iya unasela mwanangana zungo?”

¹⁵ David ngwenyi: “Ngwami yena lunga munene Wahiana mu Israele, cheka? Mba kuchi kuushi kufunga kanawa mwanangana we? Shimbu linoliene mutu wanjila mu musumba hanga amushihe.

¹⁶ Chuma chino walinga hi chibema ko. Ni mwe Mwene Zambi, yenu eswe nunatela kufwa, mumu kunwafungile mwanangana wenu yoze Mwene Zambi hanawayisa maji. Achitala kunga lia mwanangana ni mulondo wa meya, kuyili nyi ka?”

¹⁷ Mwanangana Saulu yanyingika liji lia David, yahula ngwenyi: “Alio liji lia yena mwanami David, nyi?” David ngwenyi: “Ewa, mwanangana wami.”

¹⁸ David yaweza ho ngwenyi: “Mwene wami, kuchi mba nwakunguhanga chichize, yami kavumbi kenu? Yika nalinga kama? Chibi chami chika kevwe?

¹⁹ Vulie mwanangana! Banjikenu kama ku maliji jami. Nyi ngwe Mwene Zambi hananuvundula kulimika ni yami, atambule mulambu alumune mbunge yenyi. Alioze nyi atu haachilinga, Mwene Zambi aashinge, mumu hanguhuma mu chifuchi cha Mwene Zambi, ni kutwama kuze Changutamba kuwayila mazambi eka.

²⁰ Kashika manyinga jami kanda amwangana kama kusuku ni Mwene Zambi. Mumu yika yenu mwanangana wa Aisraele hinweza ni kunguhanga yami mbwangala. Mumu yika nunanguhange ngwe chize atu akuhanga ngwali ha milundu?”

²¹ Mwanangana Saulu ngwenyi: “Mwanami David, hinavulumuna. Hiluka kwe. Chichi kukulinga nawa chibi, mumu ufuku wa musono wangwecha ni mwono. Hinalinga ni uhenge. Hinapiasuka chikolo kuhiana.”

²² David yakumbulula ngwenyi: “Vulie mwanangana! Kunga lienu lino, tumenu umwe mukweze eze alitambule.

²³ Mwene Zambi kakufweta akwa kushimbika ni akwa ululi. Musono Zambi hanukunjika mu moko jami, hindu chanulingile nichimwe, yenu mutu yoze Mwene Zambi hanawayisa maji.

²⁴ Ngwe chize nanwaha mwono musono, Chenacho Mwene Zambi angulinge cho ni kungulamwina ku lamba liami heswe.”

²⁵ Mba mwanangana yamba ngwenyi: “Mwanami David, Zambi akuwahise! Kumuukawaha mu yuma yeswe yize muukalinga.” Hohene David yaya kwenyi, mwanangana Saulu neye yahiluka ku mahio.