1 Samuel 25 - Mukanda Wa Zambi 1970

Kufwa cha hako Samuel

¹ Hako Samuel yafwa. Aisraele eswe yaalikungulula, yaamulila, yaamufunda ku mahineyi mu limbo lia Rama. Mwabwamuze David yaya ku puya ya Parane.

David ni Abigaile

^2-3 Ku vungu lia Kaleba kwabwile umwe lunga jina lienyi Nabale, wa ku limbo lia Maone. Munda wenyi wabwile hehi ni limbo lia Karmele. Te pichi munene, yabwa ni mapanga 3,000, ni pembe 1,000. Pwo lienyi Abigaile, te chileza ni mukwa malinjekela, alioze mwe Nabale te mubi, chifwatulo. Nabale te kanakambe mapanga jenyi mu Karmele.

⁴ David yabwa mu puya, yachivwa.

⁵ Kashika yatuma akweze kumi nikwamba ngwenyi: “Yenu ku Karmele nungumenekene yo.

⁶ Nukamumeneka ngwenu: ‘David sepa lie kanakumeneka ni akwa jiko lie ni usoko we eswe.

⁷ Hevwa ngwo, yena unakambe mapanga je. Kanazange unyingike ngwe, tufunga twe abwile hamwe ni tujita twenyi, alioze kaalingile ko chibi. No kaatokesele nichimwe ha matangwa eswe waze abwile ku Karmele.

⁸ Hula tufunga twe kumaakulweza. Musono ha tangwa lia chiwayino, David kaneza, kanazange waatambule kanawa. Kanalembe ngwenyi, ahe kama tuvumbi twenyi chize Unahase kwaaha.’ ”

⁹ Akweze ja David yaaheta, yaambulwila Nabale maliji waze eswe mu jina lia David, mba yaashimbwishila.

¹⁰ Nabale yalihulika nee, mba yakumbulula ngwenyi: “David kali iya? Chamunyingikine kwami. Ha matangwa wano mu chifuchi himunazala ndungo waze haanachina akako!

¹¹ Ayenwe, kuma ngwande mbolo yami, ni meya jami, ni yifwo yami yize hinashihila akwa kukamba mapanga jami ni kuyihana kuli amwe malunga waze Chanyingikine kuze anakatuka, nyi? Ka lume.”

¹² Hohene akweze ja David yaakatuka kwo, yeeza, yaamwambulwila yeswe

¹³ David yambila tujita twenyi ngwenyi. “Mutu mweswe aswelele mukwale wenyi.” Malunga eswe yaaswelela mikwale yo. David neye yaswelela niwenyi. Mba yakatuka ni tujita ngwe 400. Kulakaji jaali yaasala ni kufunga yikashi.

¹⁴ Alioze umwe ngamba yambulwila Abigaile, pwo lia Nabale, ngwenyi: “David katumanga tunganda ni kumeneka mwata wetu, iye yaachoka.

¹⁵ Alioze tujita twenyi chibema atulingile, kaatulingile ko chibi nichimwe matangwa eswe waze twabwile mu yambu hamwe no, kutwatokesele ko Chuma nichimwe.

¹⁶ Yaatufunga mwalwa ni ufuku muze te twakwenda no ni kufunga mapanga.

¹⁷ Shinginyeka hanga ubatule kama chize muulinga. Nyi ka, chino muchibwa chibi kuhiana hali mwata wetu ni akwa jiko lienyi eswe. Mwata wetu kali ngwe chihungumuke, keshi kubanjika kuli mutu niumwe.”

¹⁸ Mba Abigaile yazomboka fuji, yanda kulakaji jaali ja mbolo, ni tuku jaali ja malambu ja vinyi, ni mapanga atano akuhangula akwocha kulu, ni kilo kumi ni shimbiali ja mbuto ya kukanga, ni kulakaji lia yichakata ya vinyu yumu, ni kulakaji jaali ja mbolo ya kulinga ni makuyu, yeswe yaayitwika ha yimbulu.

¹⁹ Mba yambila ngamba jenyi ngwenyi: “Tetekelenu, ngunanukaula.” Alioze lunga lienyi Nabale kamulwezele ko.

²⁰ Shimbu lize te anende ha chimbulu ni kujinga mulundu, kuma David ni tujita twenyi no kaaneza.

²¹ David yalihanjikisa ngwenyi: “Kuchi kevwe nafungile yuma yeswe ya lunga yono mu puya? Nichimwe kuchamutokele ko. Kuchi mba iye hangulinga chibi, yami namulingile yibema?

²² Zambi angushihe nyi chashihile malunga wano eswe shimbu kanda kucha?”

²³ Abigaile, muze hamona David, yalipupwisa kusunuka ha chimbulu, yafulamana ku meso ja David,

²⁴ yamwamba ngwenyi: “Vulie mwanangana! Ngubanjikenu kama. Uhiso ubwe wa yami.

²⁵ Mwene wami, kanda walula mutu yono wamokomoko, Nabale. Kali lume chihepuke, ngwe chize libwa jina lienyi! Alioze yami kavumbi kenu chabwile ko kwami muze ngamba jenu anakaheta.

²⁶ Mwene Zambi mwe wanukanda kulikala ni kushiha akwa kole jenu. Ni mwe Mwene Zambi ni mwe yenwene ngwami, akwa kole jenu, ni eswe waze anazange kunulinga chibi, amone lamba hamuwika ni Nabale.

²⁷ Nalemba mwane, tambulenu mulambu uno hinanunehena, nuhane kuli tujita twenu.

²⁸ Ngukonekenenu kama mulonga wami, yami kavumbi kenu, Mwene Zambi makanupwisa mwanangana ni vungu lienu nawa, mumu nwakumwashila Mwene Zambi jita, ni kunuchi kalinga chibi nichimwe mu mwono wenu weswe.

²⁹ Nyi umwe makasa jita ni yenu ni kweseka kunushiha, Mwene Zambi, Zambi yenu, makanufunga kanawa ni mwono. Alioze hakutwala kuli akwa kole jenu, makaakonga ngwe chize atu akukonga mawe ni chikaba.

³⁰ Mba muze Mwene Zambi halinga yibema yize hananulakenya, nyi hanupwisa mwanangana wa Aisraele,

³¹ mwene wami kunuchi kevwa chinyengo hanji kubiha mu mbunge ha kumwanga manyinga waze keeshi chitela hanji ha kulikala yenwene. Mba muze Mwene Zambi hanuwahisa, nalemba mwane, nukangwiwuluka kama yami kavumbi kenu.”

³² David yamukumbulula ngwenyi: “Mwene Zambi, Zambi ya Aisraele, yoze wakutumanga ni kungubatwiza afumane.

³³ Ngunasakwila Zambi mumu ha mana je ni mumu ha yeswe yize hiwalinga musono kungukwika kushiha atu ni kulikala yami mwene.

³⁴ Mwene Zambi, hangukanda kukulinga chibi. Nyi mwe Zambi ya Aisraele, nyi te kuwatambukile ni kungubatwiza, kachi ndoo hamene chichamene lunga mweswe wa Nabale niumwe masala ni mwono.”

³⁵ Mba David yatambula yuma yize amunehenene, yamwamba ngwenyi: “Yako kanawa ku zuwo lie. Nabanjika liji lie, nakutayiza.”

³⁶ Abigaile yahiluka ku zuwo lienyi kuli Nabale, kumuwana halinga chiteleka chinene ngwe cha mwanangana. Te hazenga, kanawahilila. Kashika kamulwezele liji nilimwe ndoo chichamene.

³⁷ Muze hikwacha, walwa hiwamubatwoka, mba yamulweza yuma yize yeswe, ni ye mbunge muchima chau, yabwa lume hongonoo.

³⁸ Yikubalika matangwa kumi mba Mwene Zambi yalamba Nabale, neye yafwa.

³⁹ Muze David hevwa ngwo, Nabale hafwa yamba ngwenyi: “Mwene Zambi afumane! Mumu hangukala kuli Nabale, yoze unakangusaula, ni hangukanda yami kavumbi kenyi kulinga yibi. Mwene Zambi hahilwisa Nabale yibi yenyi mwene.” Mba David yatuma liji amwambishile Abigaile amumbate.

⁴⁰ Tuvumbi twa David yaaheta kuli Abigaile ku Karmele, yamulweza ngwo: “David hatutuma tukwambise hanga ubwe pwo lienyi.”

⁴¹ Abigaile yafulamana, ngwenyi: “Yami nguli ndungo yenyi, ngunalulika ngubwe nikusanyisa molu ja tuvumbi twenyi.”

⁴² Abigaile yakatuka nikawashi, yanyina ha chimbulu chenyi, yaya hamwe ni tuvumbi twenyi atano a mapwo, yakaula tuvumbi twa David. David yamumbata.

⁴³ David te hambata kulu Ahinoame, Kajezrele. No eswe aali yaabwa mapwo jenyi.

⁴⁴ Mwanangana Saulu te hahana mwanenyi Mikale, pwo lia David, kuli Palti, mwana wa Laishe wa ku limbo lia Galime.